ជាតិ
ធ្វើផ្លូវ៖ លោក ស៊ុន ចាន់ថុល ថា កន្លងមកទុកចិត្តអ្នកបច្ចេកទេសអន្តរជាតិពេក
× ភ្នំពេញ៖ ផ្លូវជាតិមួយចំនួនត្រូវបានសាងសង់ខុសបច្ចេកទេស ដែលប៉ះពាល់ដល់គុណភាពផ្លូវ។ ផ្លូវទាំងនោះមានដូចជាផ្លូវជាតិលេខ៧ ផ្លូវជាតិលេខ២១ និងកំណាត់ផ្លូវជាតិលេខ៣ពីទីរួមខេត្តកំពត ទៅរង្វង់មូលវាលរេញ។ កំហុសទាំងនេះកើតចេញពីអ្នកប្រឹក្សាបច្ចេកទេស ដែលមានតួនាទីត្រួតពិនិត្យមើលដំណើរការធ្វើផ្លូវរបស់ក្រុមហ៊ុនម៉ៅការសាងសង់។ តែក្រសួងក៏ ទទួលស្គាល់លើការបណ្ដែតបណ្ដោយឲ្យក្រុមហ៊ុនប្រឹក្សាបច្ចេកទេសទាំងនេះធ្វើការមិនបានល្អផងដែរ។ នាពេលចុះត្រួតពិនិត្យការជួសជុលកំណាត់ផ្លូវកំពត-វាលរេញ នៅថ្ងៃទី២០ខែធ្នូនេះ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងប្រាប់អ្នកកាសែតដូច្នេះថា៖«យើងទទួលខុសដែរ យើងប្រហែស យើងបណ្ដោយពេក យើងទុកចិត្តគេពេក។ គេអ្នកបច្ចេកទេសអន្តរជាតិ ថាគេគ្រាន់បើ តែគេគ្មានគ្រាន់បើឯណា»។
សូមស្ដាប់ប្រសាសន៍លោក ស៊ុន ចាន់ថុល ដូចតទៅនេះ៖
ក្រៅពីស្ដីបន្ទោសអ្នកប្រឹក្សាបច្ចេកទេស និងមន្ត្រីក្រោមឱវាទចំពោះការបណ្ដែតបណ្ដោយឲ្យធ្វើផ្លូវខុសបច្ចេកទេស លោក ស៊ុន ចាន់ថុល បានគូសបញ្ជាក់ថា ក្រសួងនឹងកាន់តែម៉ឹងម៉ាត់ចំពោះការសាងសង់ផ្លូវនានា និងចាត់វិធានការចំពោះអ្នកពាក់ព័ន្ធ ព្រមទាំងមានការពិនិត្យសើរើកិច្ចសន្យារបស់ក្រុមហ៊ុនម៉ៅការដែលធ្វើផ្លូវមិនបានល្អ។ លោកក៏បានបង្កើតក្រុមការងារពិសេសចាំឆ្មក់ត្រួតពិនិត្យលើការដ្ឋានសាងសង់ផ្លូវ ដោយមិនឲ្យដឹងមុន ដើម្បីដឹងច្បាស់ពីការសាងសង់ទាំងនោះ។
គួរបញ្ជាក់ថា ក្រសួងបានបញ្ឈប់អ្នកប្រឹក្សាបច្ចេកទេសចំនួន៧នាក់ ដែល៦នាក់ចេញពីគម្រោងសាងសង់ផ្លូវជាតិលេខ៧ កាលពីខែកក្កដាឆ្នាំនេះ និង១រូបចេញពីគម្រោងផ្លូវជាតិលេខ៣៕
© រក្សាសិទ្ធិដោយ thmeythmey.com