អន្តរជាតិ
រូបភាព៖ China Daily
×![]()
ដោយ: ធៀន ភារិន្ទ
រដ្ឋាភិបាលជប៉ុន នៅថ្ងៃទី ២០ ខែធ្នូ បានយល់ព្រមដំឡើងថវិកាយោធាបន្ថែមទៀត ដើម្បីការពារពីការវាយប្រហារពីសំណាក់ប្រទេសណាមួយ។ ការណ៍នេះ ត្រូវបានគេមើលឃើញថា ជប៉ុនបានដំឡើងថវិកាយោធា ក្នុងរយៈពេល៨ឆ្នាំជាប់ៗគ្នា និងមានកម្រិតខ្ពស់បំផុតមិនធ្លាប់មាន។
បើសិនគ្មានការប្រែប្រួលទេ រដ្ឋសភាជប៉ុន នឹងអនុម័តច្បាប់ស្តីពីថវិកាយោធា នៅថ្ងៃទី១ ខែមេសា ឆ្នាំ ២០២០។ តាមគម្រោងថវិកានេះ ជប៉ុន នឹងដំឡើងថវិកាយោធាចំនួន ១,១ភាគរយបន្ថែមទៀត បើប្រៀបធៀបនឹងឆ្នាំ២០១៩ ពោលគឺកើនរហូតដល់ ៤៨,៥៦ពាន់លានដុល្លារ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
តាមរយៈគម្រោងមួយនេះ ជប៉ុន នឹងយកលុយទៅទិញយន្តហោះចម្បាំង F-35 ចំនួន ៩គ្រឿង ពីក្រុមហ៊ុន Lockheed Martin ដើម្បីជាជំនួយសម្រាប់កងកម្លាំងស្វ័យការពាររបស់ជប៉ុន។ ក្នុងនោះ យន្តហោះ F-35A មាន ៦ គ្រឿង ដែលមានសមត្ថភាពហោះឡើងក្នុងចំងាយផ្លូវរត់ខ្លី និងយន្តហោះ F-35B ដែលអាចហោះត្រង់ឡើងលើមិនដោយត្រូវការផ្លូវរត់ឡើយ។
ក្រៅពីយន្តហោះ ក្រសួងការពារជាតិជប៉ុន នឹងទិញប្រព័ន្ធការពារមីស៊ីលបាលីស្ទិកជំនាន់ថ្មី ដែលមានសមត្ថភាពបាញ់កម្ទេច ក្បាលគ្រាប់មីស៊ីលនៅក្នុងលំហបាន ពីក្រុមហ៊ុន Raytheon ផងដែរ ក្នុងទំហំទឹកប្រាក់ប្រមាណជាង ១ពាន់លានដុល្លារ។ សព្វថ្ងៃ ជប៉ុន កំពុងបង្កើតមូលនិធិ ដើម្បីសាងសង់ស្ថានីយបាញ់មីស៊ីស Aegis Ashore ចំនួនពីរកន្លែង ដោយមានបំពាក់ជាមួយប្រព័ន្ធរ៉ាដាថ្មីផងដែរ។
គម្រោងបំពាក់អាវុធ និងសម្ភារយោធាទំនើបៗរបស់ជប៉ុន ធ្វើឡើងដែលអ្នកជិតខាងជប៉ុនពង្រឹងសមត្ថភាពរបស់ខ្លួន។ ចិន កំពុងធ្វើទំនើបកម្មយោធារបស់ខ្លួន កាន់តែទំនើបឡើង។ ជាក់ស្តែងទីក្រុងប៉េកាំង បានដាក់ឲ្យប្រើប្រាស់នាវាដឹកយន្តចម្បាំងក្នុងស្រុក នាពេលថ្មីៗនេះ។ ក្រៅចិន នៅមានកូរ៉េខាងជើងទៀត ដែលកំពុងអភិវឌ្ឍមីស៊ីល និងអាវុធនុយក្លេអ៊ែររបស់ខ្លួន កាន់តែខ្លាំងឡើង។ កូរ៉េខាងត្បូង ក៏បានប្រកាសបង្កើនថវិការការពារជាតិដែរ។
សូមបញ្ជាក់ថា បើទោះបីជា ជប៉ុន ត្រូវបានហាមឃាត់ដោយរដ្ឋធម្មនុញ្ញរបស់ខ្លួន មិនឲ្យមានអាវុធវាយប្រហារក៏ពិតមែន ប៉ុន្តែជប៉ុនគឺជាប្រទេសមួយ ដែលបានចំណាយថវិកាលើវិស័យយោធាយ៉ាងច្រើនសន្ធឹក។ មិនដល់រយៈពេល មួយទសវត្សរ៍ទេ ជប៉ុន បានតម្លើងថវិកាយោធារបស់ស្ទើរតែ ១៥ភាគរយ ដើម្បីបំពាក់កងស្វ័យការពាររបស់ខ្លួន។ ដូនេះហើយ ទើបជប៉ុនបានក្លាយជាប្រទេសលំដាប់ទី៨ ក្នុងពិភពលោក ដែលបានចំណាយថវិកាក្នុងវិស័យការពារជាតិ ក្នុងឆ្នាំ២០១៩ ៕
Tag:
ជប៉ុន
© រក្សាសិទ្ធិដោយ thmeythmey.com
