ជាតិ
សម្ដេច ស ខេង៖ សំណង់ក្នុងពុទ្ធសាសនា ចំណាយធំណាស់
× ភ្នំពេញ៖ ឧបនាយករដ្ឋមន្ត្រីសម្ដេច ស ខេង លើកឡើងថា ការកសាងផ្នែករចនាសម្ព័ន្ធ សំណង់ផ្សេងៗក្នុងវត្តអារាមព្រះពុទ្ធសាសនា បានចំណាយច្រើនណាស់ បើធៀបនឹងសាសនាដទៃដែលមិនសូវចំណាយលើការសាងសង់បែបនេះឡើយ។ «បើយើងប្រៀបធៀបនឹងសាសនាផ្សេងៗ សាសនាគ្រិស្ដអត់សូវមានអគារហេដ្ឋារចនាសម្ព័ន្ធស្កឹមស្កៃទេ ហើយឥស្លាមមានគ្រាន់បើដែរ តែក្នុងអគារវិហារគាត់អត់មានអ្វីទេ ដល់ព្រះពុទ្ធយើងអត់អ៊ីចឹងទេ មានវិហារផង មានព្រះតូចព្រះធំ មានរូប មានទង់ មានសាលាធម្មសភា មានកុដិ ហូរហែច្រើន ចំណាយធំណាស់»។ រដ្ឋមន្ត្រីក្រសួងមហាផ្ទៃ បានថ្លែងបែបនេះក្នុងពិធីសម្ពោធឆ្លងសមិទ្ធផលក្នុងវត្តពោធិសត្ថារាម ក្នុងស្រុកកញ្ច្រៀច ខេត្តព្រៃវែង នៅថ្ងៃទី២១ខែធ្នូនេះ។
ប្រសាសន៍សម្ដេច ស ខេង ៖
សម្ដេច ស ខេង បានលើកឡើងពីការចំណាយច្រើនទៅលើសំណង់ផ្សេងៗក្នុងវត្តអារាម។ តែសម្ដេចមិនបានមានប្រសាសន៍ថា ត្រូវបញ្ឈប់ ឬកាត់បន្ថយការចំណាយសាងសង់ទាំងនោះឡើយ។ រដ្ឋមន្ត្រីក្រសួងមហាផ្ទៃរូបនេះ បានជំរុញការគិតគូរធ្វើឲ្យព្រះពុទ្ធសាសនាឋិតនៅយូរអង្វែង តាមរយៈអ្នកកាន់ព្រះពុទ្ធសាសនា ត្រូវខិតខំធ្វើអំពើល្អ តាមគន្លងធម៌ព្រះពុទ្ធ។ សម្ដេចបានថ្លែងដូច្នេះថា៖«តែខ្ញុំព្រះករុណាខ្ញុំនិយាយអ៊ីចឹង ចង់បានអ្វីមកវិញ គឺចង់បានតែមួយគឺធ្វើយ៉ាងម៉េចឲ្យព្រះពុទ្ធសាសនាគង់វង្ស។ ដើម្បីឲ្យពុទ្ធសាសនារបស់យើងគង់វង្សឋិតថេរ តទៅមុខទៀតនោះ គឺយើងធ្វើដូចម្ដេច? ខ្ញុំព្រះករុណាខ្ញុំគិតថា ទាំងព្រះសង្ឃ ទាំងអាចារ្យ ទាំងគ្រហស្ថ នាំគ្នាគោរពបូជាតាមធម៌ព្រះពុទ្ធ គឺធ្វើអំពើល្អ អំពើជាកុសល ហើយលុបបំបាត់អំពើមិនល្អ អំពើមិនកុសល»។
កាលពីខែឧសភាឆ្នាំនេះ ក្នុងពីធីឆ្លងសមិទ្ធផលក្នុងវត្តមួយនៃខេត្តព្រៃវែង សម្ដេច ស ខេង ប៉ាន់ស្មានថា ការសាងសង់សមិទ្ធផលនានាក្នុងវត្តអារាមនៅកម្ពុជា ចំណាយដល់ខ្ទង់ពាន់លានដុល្លារ ឬយ៉ាងហោចក៏រាប់រយលានដុល្លារដែរ។ សព្វថ្ងៃកម្ពុជាមានវត្តជាង ៥០០០ នៅទូទាំងប្រទេស៕
Tag:
ស ខេង
ពុទ្ធសាសនា
វត្ត
© រក្សាសិទ្ធិដោយ thmeythmey.com