អន្តរជាតិ
មេទ័ពអាមេរិក៖ អាមេរិកត្រៀមជាស្រេចសម្រាប់កាដូថ្ងៃបុណ្យគ្រិស្តម៉ាសពីកូរ៉េខាងជើង ឧត្តមសេនីយ៍ផ្កាយបួន Mike Milley នាយសេនាធិការចម្រុះកងទ័ពអាមេរិក។ រូបភាពពី Flickr ក្រសួងការពារជាតិអាមេរិក
× មេបញ្ជាការកំពូលកងទ័ពអាមេរិក ឧត្តមសេនីយ៍ផ្កាយបួន Mark Milley នៅថ្ងៃទី២០ ខែធ្នូ បានប្រកាសថា យោធាអាមេរិកត្រៀមខ្លួនជាស្រេចហើយដើម្បីទទួលកាដូថ្ងៃបុណ្យគ្រិស្តម៉ាសដែលកូរ៉េខាងជើងចង់ផ្ញើឲ្យ។ កូរ៉េខាងជើង បានគំរាមផ្ញើកាដូឲ្យអាមេរិកនៅអំឡុងបុណ្យឈប់សម្រាកដ៏ធំនេះ ប្រសិនវ៉ាស៊ីនតោនមិនដាក់លក្ខខណ្ឌចរចាថ្មីទេនោះ។ គេជឿថា កូរ៉េខាងជើងអាចសាកល្បងមីស៊ីលបាលីស្ទិកដើម្បីផ្គើនអាមេរិក។
អ្វីដែលកូរ៉េខាងជើងធ្វើនៅថ្ងៃបុណ្យគ្រិស្តម៉ាស យោធាអាមេរិកត្រៀមខ្លួនទទួលទាំងអស់។ នេះជាការបញ្ជាក់របស់ឧត្តមសេនីយ៍ Mark Milley នាយសេនាធិការចម្រុះកងទ័ពអាមេរិកក្នុងសន្និសីទសារព័ត៌មានថ្ងៃទី២០ ខែធ្នូ នៅមន្ទីរបញ្ចកោណ។ លោក Milley ឆ្លើយបែបនេះ ដើម្បីតបទៅនឹងការគំរាមរបស់កូរ៉េខាងជើងដែលប្រុងផ្ញើវត្ថុអនុស្សាវរីយ៍ឲ្យអាមេរិកនៅថ្ងៃបុណ្យចុងឆ្នាំមួយនេះ បើអាមេរិកនៅតែមិនធ្វើសកម្មភាពថ្មីដើម្បីឈានទៅការចាប់ផ្ដើមការចរចាឡើងវិញ។
កូរ៉េខាងជើង មិនបញ្ជាក់ទេថា វត្ថុអនុស្សាវរីយ៍អ្វីដែលខ្លួនចង់ឲ្យអាមេរិកឡើយ។ ប៉ុន្តែគេជឿថា កូរ៉េខាងជើងអាចសាកល្បងមីស៊ីលលចម្ងាយវែងឡើងវិញ បន្ទាប់ពីអាក់ខានមួយឆ្នាំមកនេះ។ ការសាកល្បងសំខាន់ៗពីរនៅឯមជ្ឈមណ្ឌលបាញ់ផ្កាយរណប Sohae ដែលកូរ៉េខាងជើងអះអាងថា ទទួលជោគជ័យ ត្រូវគេជឿថា ជាការធ្វើតេស្តម៉ាស៊ីនបាញ់មីស៊ីលដើម្បីត្រៀមទៅបាញ់មីស៊ីលបាលីស្ទិកចម្ងាយវែងនៅពេលខាងមុខ។
ជុំវិញរឿងនេះ មេទ័ពអាមេរិកបញ្ជាក់ថា កូរ៉េខាងជើងបានផ្ដល់ពន្លឺផ្សេងគ្នាៗជាសាធារណៈ ដូច្នេះយោធាអាមេរិក ក៏ត្រៀមទទួលអ្វីៗគ្រប់យ៉ាងដែរ។ លោកបន្តថា កូរ៉េ ស្ថិតក្នុងចំណោមទីតាំងលើពិភពលោកដែលកងទ័ពអាមេរិកតែងតែងរក្សាការត្រៀមខ្លួនកម្រិតខ្ពស់ជាប់ជានិច្ច។
មិនចាំបាច់រង់ចាំដល់ថ្ងៃបុណ្យគ្រិស្តម៉ាសឡើយ បើទទួលបញ្ជានៅពេលនេះ ក៏យោធាអាមេរិកអាចចេញប្រតិបត្តិការបានដែរ។ នេះជាការបន្ថែមរបស់រដ្ឋមន្ត្រីការពារជាតិអាមេរិក ម៉ាក អេស្ពើ ក្នុងសន្និសីទខាងលើ។ លោក អេស្ពើ បញ្ជាក់ថា៖ «ខ្ញុំមានតួនាទីពីរ គឺមួយធានាពីការត្រៀមខ្លួនកម្រិតខ្ពស់ ត្រៀមខ្លួនប្រយុទ្ធ ហើយឈ្នះសង្គ្រាមនៅយប់នេះក៏បាន ក្នុងករណីចាំបាច់។ ទីពីរ គឺជួយផ្នែកការទូត។ ខ្ញុំរំពឹងថា ការចរចាអាចចាប់ផ្ដើមឡើងវិញ ហើយអ្វីៗបន្តលើផ្លូវការទូតដដែល។»
យ៉ាងណាមិញ គេមិនរំពឹងថា នឹងមានការចរចាណាមួយឡើយចាប់ពីពេលនេះដល់ដំណាច់ឆ្នាំ២០១៩ ដែលជាឱសានវាទរបស់កូរ៉េខាងជើងឲ្យអាមេរិកនោះ។ ប្រេសិតពិសេសអាមេរិក Stephen Biegun ទើបបញ្ចប់ទស្សនកិច្ចនៅសេអ៊ូល និងប៉េកាំង តែមិនបានជួបជាមួយមន្ត្រីរបបក្រុងព្យុងយ៉ាងឡើយ។
នៅថ្ងៃទី២០ ខែធ្នូ ប្រធានាធិបតី ដូណាល់ ត្រាំ បានបង្ហោះសារតាម Twitter ថា លោកបានជជែកបញ្ហាកូរ៉េខាងជើងជាមួយសមភាគីចិន ស៊ី ជិនភីង ប៉ុន្តែមិនបានផ្ដល់ព័ត៌មានលម្អិតឡើយ។ លោក ត្រាំ ទំនងស្នើឲ្យលោក ស៊ី ជួយបញ្ចុះបញ្ចូលកូរ៉េខាងជើងកុំធ្វើអ្វីបង្កហេតុ ហើយងាកចូលតុចរចាវិញ។ នៅដើមសប្ដាហ៍ក្រោយ លោក ស៊ី ក៏នឹងជួបជាមួយប្រធានាធិបតីកូរ៉េខាងត្បូង មូន ចេអ៊ីន និងនាយករដ្ឋមន្ត្រីជប៉ុន ស៊ិនហ្សូ អាបេ ទៀត ដែលបញ្ហាកូរ៉េខាងជើងអាចជារបៀបវារៈសំខាន់៕
Tag:
អាមេរិក
កូរ៉េខាងជើង
Mike Milley
© រក្សាសិទ្ធិដោយ thmeythmey.com