ចាក់ដីចូលសមុទ្រ៖ សម្ដេច ហ៊ុន សែន បញ្ជាឱ្យលោក ជា សុផារ៉ា ចុះស្រាវជ្រាវ ហើយព្រមានដកតំណែងអ្នកពាក់ព័ន្ធ

ជាតិ

២៥ខេត្ត/រាជធានី

ចាក់ដីចូលសមុទ្រ៖ សម្ដេច ហ៊ុន សែន បញ្ជាឱ្យលោក ជា សុផារ៉ា ចុះស្រាវជ្រាវ ហើយព្រមានដកតំណែងអ្នកពាក់ព័ន្ធ

21, Dec 2019 , 10:40 pm

រូបភាព

សម្ដេច ហ៊ុន សែន នាពិធីបុណ្យសមុទ្រលើកទី៨ ជុំទី២ ក្នុងខេត្តកំពត

ដោយ: រំដួល ចិត្រា (Romdoul Chetra)

ភ្នំពេញ៖ ពីពិធីបុណ្យសមុទ្រលើកទី៨ ក្នុងខេត្តកំពត សម្ដេចនាយករដ្ឋមន្ត្រី ហ៊ុន សែន បានបញ្ជាឱ្យ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចុះពិនិត្យនិងស្រាវជ្រាវករណីចាក់ដីចូលសមុទ្រនៅខេត្តកោះកុង ដើម្បីទប់ស្កាត់និងការពារតំបន់ឆ្នេរសមុទ្រកម្ពុជា។

នាយករដ្ឋមន្ត្រី ហ៊ុន សែន ដែលទទួលបានព័ត៌មានរហៀងៗមកថា មានជនខិលខូចលួចចាក់ដីចូលសមុទ្រ ដែលគ្មានការអនុញ្ញាតត្រឹមត្រូវឡើយ ហើយក៏មានមន្ត្រីទាហានកាងនៅពីក្រោយផងដែរ។«ខ្ញុំហាក់ដូចជាមានព័ត៌មានថា នៅខេត្តកោះកុង ក៏នៅបន្តមានការចាក់ដីចូលទៅក្នុងសមុទ្រ ដោយគ្មានការអនុញ្ញាត ខ្ញុំស្នើឱ្យឯកឧត្តម ជា សុផារ៉ា ក៏ដូចជាអភិបាលខេត្តកោះកុង ពិនិត្យជាបន្ទាន់តើវាមានពិតទេ ហាក់ដូចជាមាននាយទាហានផងដែរ ដែលចូលរួមសកម្មភាពទាំងនេះ»។ នេះជាការលើកឡើងរបស់សម្ដេច ហ៊ុន សែន ដែលបានរម្លឹកទៀតថា «ហាមចាក់ដីនៅទីកន្លែងណា ដែលគ្មានការអនុញ្ញាត»។

ត្រង់ចំណុចនេះសម្ដេច ហ៊ុន សែន បានសង្កត់ធ្ងន់ថា ប្រសិនជារកឃើញនាយទាហានរូបណា ពិតជាពាក់ព័ន្ធនឹងករណីចាក់ដីចូលសមុទ្រមែននោះ ពួកគេនឹងត្រូវដកចេញពីតំណែងភ្លាមតែម្ដង។ ប្រមុខរដ្ឋាភិបាល បានព្រមានដូច្នេះថា៖«ខ្ញុំសូមបញ្ជាក់ជូនថា បើសិនជារកឃើញករណីនេះ ខ្ញុំមិនអនុញ្ញាតឱ្យពួកគេ ស្ថិតនៅជានាយទាហានកម្ពុជាបន្តទៀតទេ។ បើទុកឱ្យពួកគេ(នាយទាហានទាំងនោះ)នៅធ្វើរឿងយ៉ាងដូច្នេះ នោះពួកគេទាំងនោះនឹងក្លាយជាអ្នកកសាងរដ្ឋនៅក្នុងរដ្ឋហើយ ។ដូច្នេះ គឺមិនអនុញ្ញាតឱ្យមានករណីនេះទេ»។

ដ្បិតការចាក់ដីត្រូវបានហាមឃាត់ ប៉ុន្តែក៏មានករណីខ្លះត្រូវបានលើកលែងផងដែរ។ ក្នុងន័យនេះលោកនាយករដ្ឋមន្ត្រី ហ៊ុន សែន បាននិយាយថា ការអនុញ្ញាតឱ្យចាក់ដីចូលសមុទ្របាន លុះត្រាជាករណីចាំបាច់ដូចជា ការកសាងកំពង់ផែ សម្រាប់ការដឹកជញ្ជូន, ការចាក់ថ្ម ដើម្បីទឹករាំងរលក សម្រាប់បង្កើតតំបន់កម្សាន្តខ្លះ ដែលស្ថិតនៅក្រោមការសិក្សាច្បាស់លាស់ពីអាជ្ញាធរជំនាញ មុននឹងត្រូវបានអនុញ្ញាតឱ្យចាក់ដី ពោលគឺមិនមែនជាការចាក់ដីទាំងបំពានច្បាប់ឡើយ។

«កុំឱ្យឆ្នេរសមុទ្ររបស់យើង ត្រូវបំផ្លាញដោយសារការទម្លាក់បង្ហូរទឹកស្អុយចូលទៅក្នុងសមុទ្រ ការចាក់ដីបំពាន ទៅលើសមុទ្រ ការកាប់ព្រៃកោងកាងចោល ដើម្បីទន្ទ្រានយកដី ។ចំណុចទាំងអស់នេះ គឺជាចំណុចដែលរដ្ឋបាលខេត្តនីមួយៗ ត្រូវធ្វើ(យកចិត្តទុកដាក់ទប់ស្កាត់)»។ នេះជាការបញ្ជាក់របស់សម្ដេច ហ៊ុន សែន ដែលអំពាវនាវឱ្យមន្ត្រី និងអាជ្ញាធរពាក់ព័ន្ធនាំគ្នាទប់ស្កាត់ និងការពារតំបន់ឆ្នេរ ក៏ដូចជាតំបន់ទេសចរផ្សេងទៀតផង៕