ជាតិ
សេដ្ឋកិច្ច
សម្ដេច ហ៊ុន សែន៖ ការលុបបំបាត់ល្បែងអនឡាញ ដើម្បីធានាសុវត្ថិភាពអ្នកជំនួញធំៗ
×![]()
ដោយ: ធឿន បញ្ញាឬទិ្ធ
ភ្នំពេញ៖ ជាថ្មីម្ដងទៀត សម្ដេច ហ៊ុន សែន បានប្រកាសថា កម្ពុជា មិនអនុញ្ញាតឱ្យមានល្បែងអនឡាញបែបអនាធិបតេយ្យឡើយ ហើយសេដ្ឋកិច្ចកម្ពុជា ក៏មិនពឹងផ្អែកលើវិស័យនេះដែរ។ លោកនាយករដ្ឋមន្ត្រី ថ្លែងបែបនេះ នៅក្នុងពិធីបើកបុណ្យសមុទ្រលើកទី៨ ដែលធ្វើឡើងនៅក្នុងខេត្តកំពត កាលពីថ្ងៃទី២១ ធ្នូ។
សម្ដេច ហ៊ុន សែន បាននិយាយថា ការបើកឱ្យមានល្បែងអនឡាញនេះ វាធ្វើកម្ពុជាជួបបញ្ហាប្រឈមពីរ គឺ បញ្ហាលាងលុយកខ្វក់ និងបញ្ហាអសន្តិសុខ ដែលបង្កឡើងដោយក្រុមម៉ាហ្វីយ៉ា (ក្រុមជនពាល)។ សម្រាប់នាយករដ្ឋមន្ត្រី ហ៊ុន សែន បញ្ហាទាំងនេះ វានឹងធ្វើឱ្យប៉ះពាល់ដល់ការវិនិយោគ និងសេដ្ឋកិច្ចកម្ពុជា ដូច្នេះមានតែការលុបបំបាត់ចោលល្បែងអនឡាញទេ ទើបកម្ពុជាអាចរក្សាស្ថិរភាពសេដ្ឋកិច្ចបាន។
«មនុស្សមួយចំនួនព្រួយបារម្ភអំពីបញ្ហាបាត់អនឡាញ នៅពេលដែលមានអនឡាញ នាំគ្នាព្រួយបារម្ភអំពីវត្តមានជនជាតិចិននៅកម្ពុជា។ នៅពេលដែលយើងបិទអនឡាញគេព្រួយបារម្ភអំពីការបាត់ជនជាតិចិនពីកម្ពុជា។ តើអ្នកចង់បានអ្វីពិតប្រាកដ? សម្រាប់ខ្ញុំ ខ្ញុំសង្កេតឃើញថា បើសេដ្ឋកិច្ចកម្ពុជាពឹងពាក់តែលើអនឡាញ កម្ពុជានឹងក្លាយទៅជាអ្នករងគ្រោះសម្រាប់បញ្ហាសន្ដិសុខជាតិរបស់ខ្លួន យើងស្ថិតនៅក្រោមការគំរាមកំហែង នៃក្រុមម៉ាហ្វីយ៉ាដែលជ្រៀតចូលមកក្នុងប្រទេសរបស់យើង ដើម្បីធ្វើសកម្មភាព យើងក៏ស្ថិតនៅក្នុងស្ថានភាព ដែលនឹងក្លាយទៅជាប្រទេសនៃគោលដៅ នៃការលាងលុយកខ្វក់ តាមរយៈអនឡាញ»។ នេះជាការអះអាងរបស់សម្ដេច ហ៊ុន សែន។
សម្ដេច ហ៊ុន សែន បានប្រកាសក្ដែងៗថា សេដ្ឋកិច្ចកម្ពុជា មិនត្រូវពឹងផ្អែកលើវិស័យអនឡាញនេះទេ ហើយកម្ពុជាត្រូវការតែអ្នកវិនិយោគសុច្ចរិតប៉ុណ្ណោះ។ ប្រមុខរដ្ឋាភិបាល និយាយដូច្នេះថា៖«យើងនឹងបាត់បង់នូវសុវត្ថិភាពអ្នកជំនួញធំៗ អ្នករកស៊ីធំៗដែលជាអ្នកមានប្រាក់មិនហ៊ានចូលមកកម្ពុជា ដោយសារខ្លាចពួកក្រុមម៉ាហ្វីយ៉ា ដូច្នេះអ្វីក៏ដោយត្រូវមានការបង់ថ្លៃ ។យើងសុខចិត្តមិនមានអនឡាញ ក៏ប៉ុន្ដែយើងច្បាស់ជានាំមកនូវប្រទេសរបស់យើងប្រកបដោយមានសន្ដិសុខ ហើយយើងនាំមកនូវដោយអ្នកវិនិយោគសុច្ចរិត និងអ្នកវិនិយោគដែលមានប្រាក់កាសមករស់នៅកម្ពុជា»។
បើតាមលោកនាយករដ្ឋមន្ត្រី ហ៊ុន សែន នៅសល់តែប៉ុន្មានថ្ងៃទៀតប៉ុណ្ណោះ ល្បែងអនឡាញនឹងលែងមានវត្តមានទាំងស្រុងនៅកម្ពុជា ក្រោយដល់ពេលកំណត់នៃការពន្យាសុពលភាពអាជីវកម្មនេះ។
កាលពីថ្ងៃទី១៨ សីហាកន្លងមក សម្ដេចនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរ បង្ក្រាបអាជីវកម្មល្បែងភ្នាល់តាមអ៊ីនធឺណិត ដែលគ្មានអាជ្ញាប័ណ្ណ និងហាមមិនឲ្យចេញអាជ្ញាប័ណ្ណថ្មី ឬបន្តអាជ្ញាបណ្ណ ដល់ក្រុមហ៊ុនល្បែងតាមអនឡាញគ្រប់ប្រភេទឡើយ។ សម្តេច ហ៊ុន សែន បានបញ្ជាក់ថា ល្បែងភ្នាល់តាមប្រព័ន្ធអ៊ីនធឺណិត បានធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គម។
សារាចរណែនាំរបស់នាយករដ្ឋមន្ត្រីកម្ពុជា បានសរសេរដូច្នេះថា៖ «ពួកឧក្រិដ្ឋជនបរទេសមួយចំនួន បានជ្រកក្រោមរូបភាពល្បែងភ្នាល់ប្រភេទនេះ ដើម្បីបោកប្រាស់ជំរិតទារប្រាក់ពីជនរងគ្រោះ ទាំងក្នុងនិង ក្រៅប្រទេស ធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយក្នុងសង្គម»។
អត្ថបទទាក់ទង
ការប្រកាសបិទល្បែងកាស៊ីណូងនឡាញនេះ ធ្វើឡើងបន្ទាប់ពីរដ្ឋាភិបាលចាប់បញ្ជូនជនជាតិចិន១៨០នាក់នៅខេត្តព្រះសីហនុចេញពីកម្ពុជា ដោយសារពាក់ព័ន្ធបទល្មើសជំរិតទារប្រាក់តាមប្រព័ន្ធអ៊ីនធឺណិត Voice Over Internet Protocol (VOIP)។ បើគិតចាប់តាំងពីឆ្នាំ ២០១៤ មកដល់ខែកក្កដា ឆ្នាំ២០១៩ នេះ អាជ្ញាធរកម្ពុជា បានបណ្ដេញជនល្មើសជនជាតិចិនប្រមាណ ២, ៧០០នាក់ហើយ ចេញពីកម្ពុជា។
ក្រោយពីរដ្ឋាភិបាលកម្ពុជា ចេញវិធានការតឹងរឹងក្នុងការបិទ និងបង្ក្រាបកាស៊ីណូអនឡាញនេះ វាបានធ្វើឱ្យជនជាតិចិនចាកចេញពីកម្ពុជា ជាបន្តបន្ទាប់ ។ ក្នុងនោះមានជនជាតិចិនប្រហែល៦ពាន់នាក់ចាកចេញ ខណៈជនជាតិ៥ពាន់នាក់មកកាន់កម្ពុជា។ នេះបើតាមមន្ត្រីជាន់ខ្ពស់ក្រសួងមហាផ្ទៃ ៕
Tag:
ហ៊ុន សែន
សេដ្ឋកិច្ច
© រក្សាសិទ្ធិដោយ thmeythmey.com
