ដោយ៖ ស៊ីធី
Saemapetch Fairtex មានជីវិតតស៊ូយ៉ាងលំបាក ដោយរូបគេជាអ្នកជួយឪពុកម្ដាយដែលមានមុខរបរជាអ្នករើសប្លាស្ទិក និង ពុះឧសលក់ដើម្បីចិញ្ចឹមជីវិតប្រចាំថ្ងៃ។ យ៉ាងណាក្ដី កីឡាករប្រដាល់មួយថៃរូបនេះបានធ្វើឲ្យជីវភាពគ្រួសារធូរធារឡើងវិញ និងអាចរស់នៅបានសមរម្យ តាមរយៈការឡើងសង្វៀនម្តងៗ។
ក្នុងគ្រាលំបាក ឪពុកម្ដាយរបស់ Saemapetch រកលុយបានមិនដល់ ៣ ដុល្លារទេក្នុងមួយថ្ងៃ។ បែបណាក្ដី Saemapetch បានកំណត់អំពីគោលដៅធ្វើអ្វីៗដើម្បីជួយមនុស្សជាទីស្រលាញ់ និង គ្រួសារ ហើយធ្វើឲ្យជីវភាពប្រសើរឡើង។ «ខ្ញុំចង់ជួយគ្រួសារខ្ញុំណាស់ទើបខ្ញុំចាប់ផ្ដើមហាត់ក្បាច់មួយថៃ។ ឪពុកម្ដាយរបស់ខ្ញុំជាអ្នកដើររើសថង់ប្លាស្ទិក យកទៅលក់។ ពួកគាត់ប្រមូលរបស់អេតចាយយកលក់ឲ្យខ្ញុំចូលសាលា។ ខ្ញុំតែងតែរកវិធីដើម្បីជួយគ្រួសាររបស់ខ្ញុំ។ ខ្ញុំសូមអរគុណដល់មេភូមិរបស់ខ្ញុំ ដែលជួយឲ្យខ្ញុំហាត់មួយថៃនៅផ្ទះគាត់មុនផ្លាស់ទៅក្លិបថ្មី»។
ម្ចាស់ខ្សែក្រវាត់កម្រិតពិភពលោក រំលឹកទៀតថា៖«គាត់សួរខ្ញុំថាចង់ប្រកួតមួយថៃទេ ហើយខ្ញុំប្រាប់ថា ខ្ញុំចង់។ ពូមេភូមិដាក់ឲ្យខ្ញុំប្រកួតដំបូង។ ខ្ញុំចាំមិនភ្លេច ខ្ញុំប្រកួតដំបូងចាញ់ ហើយខ្ញុំមិនដឹងធ្វើយ៉ាងណាទេ។ ពេលចាញ់ប្រកួតនោះទើប អាចរកវិធីឈ្នះបាន។ ខ្ញុំធ្វើបានល្អ និងសុំាទៅនឹងការប្រកួត»។
បន្ទាប់ពីនោះមក រូបគេបានប្រកួតញឹកញាប់តាមកម្មវិធីបុណ្យនានា។ កីឡាករជើងខ្លាំងថៃដដែលគូសបញ្ជាក់ថា៖«ខ្ញុំសប្បាយចិត្ត ខ្ញុំទទួលបាន ១៧ ដុល្លារក្នុងជ័យជម្នះដំបូង។ ខ្ញុំជូនលុយទៅ ម្ដាយរបស់ខ្ញុំទាំងអស់ព្រោះពួកគាត់មិនដែលរកលុយបានច្រើន។ ខ្ញុំសប្បាយចិត្តបំផុត ដែលបានជួយគ្រួសាររបស់ខ្ញុំ។ វាពិតចំណូលសំខាន់ណាស់ ។ ឥឡូវនេះ ខ្ញុំសែនរីករាយដែលបានប្រកួតនៅ សង្វៀន ONE។ ខ្ញុំវ៉ៃតំណាងឲ្យថៃ ក្នុងពិភពលោក»។
Saemapetch Fairtex មានស្រុកកំណើតនៅខេត្ត Chiang Mai ប៉ុន្តែរូបគេធំធាត់ Chiang Rai ដោយមានឳពុកម្ដាយជាអ្នកស៊ីឈ្នួលពុះឧសដើម្បីចិញ្ចឹមជីវិត។
Saemapetch Fairtex ដែលជាម្ចាស់ខ្សែក្រវាត់ MTGP Welterweight World Champion បានកើតនៅក្នុងត្រកូលក្រីក្រមួយ និងបានជួយឳពុកម្ដាយប្រមូលដប និងប្លាស្ទិក សម្រាប់លក់ដើម្បីចិញ្ចឹមជីវភាពប្រចាំថ្ងៃ។ ដោយចៃដន្យ មេភូមិស្ថិតក្នុងភូមិតូចមួយបានឃើញរូបគេតាមផ្លូវ និង បានណែនាំរូបគេឲ្យទៅហ្វឹកហាត់ក្បាច់គុនមួយថៃ។ បន្ទាប់មកជីវិតរបស់គេក៏មានការផ្លាស់ប្ដូរជាបន្តបន្ទាប់មិនធ្លាប់មាន។
ដោយសារមានទេពកោសល្យល្អផងនោះ Saemapetch បានឡើងប្រកួតនៅសង្វៀនលើកដំបូងត្រឹមអាយុ ១១ ឆ្នាំប៉ុណ្ណោះ ហើយ ៣ ឆ្នាំបន្ទាប់ បានឡើងទៅប្រកួតនៅសង្វៀនល្បីនៅថៃ Rajadamnern Stadium នៅរាជធានីបាងកក។ បច្ចុប្បន្ននេះ Saemapetch ជាកូនសិស្សនៅក្លិប Fairtex Pattaya ដែលមានមូលដ្ឋាននៅប្រទេសថៃជាមួយវីរបុរសថៃកីឡាករ Yodsanklai IWE Fairtex និងម្ចាស់ខ្សែក្រវាត់ពិភពលោកពីរកីឡាការិនី Stamp Fairtex។ Saemapetch ឈ្នះខ្សែក្រវាត់ Tiger Cement Tournament ពីសង្វៀនប៉ុស្តិ៍លេខ៧ (Channel 7 Stadium) ទើបមានអាយុ១៧ឆ្នាំប៉ុណ្ណោះ និង ខែមេសា ឆ្នាំ ២០១៨ អាចឈ្នះខ្សែក្រវាត់ MTGP Welterweight World Title បន្ថែមទៀត។
Saemapetch ទទួលបានបទពិសោធន៍យ៉ាងច្រើន និង បានឡើងទៅប្រកួតនៅសង្វៀនល្បីៗនៅប្រទេសថៃទល់នឹងកីឡាករល្បីៗ និង ជើងចាស់ជាច្រើន។ គេជាកីឡាករលេចធ្លោមានការយកចិត្តទុកដាក់ខ្ពស់ពេលហ្វឹកហាត់ ហើយក៏បានសាងកេរ្តិ៍ ឈ្មោះយ៉ាងល្អបំផុតនៅសង្វៀនលំដាប់ពិភពលោក ONE ជាពិសេសឡើងប្រកួតក្នុងកម្មវិធី ONE Super Series។ កីឡាករដដែលនេះបានបង្ហាញឲ្យឃើញថារូបគេជាអ្នកលេងក្បាច់គុនមួយថៃល្អបំផុតម្នាក់កម្រិតពិភពលោក។
កុំភ្លេចទស្សនា កម្មវិធីបន្ទាប់របស់ស្ថាប័ន ONE Championship សូមទស្សនា ONE: A NEW TOMORROW នៅថ្ងៃទី ១០ ខែ មករា ចាប់ពីវេលាម៉ោង ៧ ល្ងាចតទៅដែលមានផ្សាយផ្ទាល់តាមរយៈ Facebook, Twitter, YouTube,និង ONE Super App៕