ពានរង្វាន់ព្រះនាងឥន្ទ្រទេវីឆ្នាំ២០២០ ចាប់ផ្ដើមទទួលស្នាដៃហើយ

ជាតិ

ពានរង្វាន់ព្រះនាងឥន្ទ្រទេវីឆ្នាំ២០២០ ចាប់ផ្ដើមទទួលស្នាដៃហើយ

22, Dec 2019 , 5:39 pm

រូបភាព

ដោយ: ប៉ូ សាគុន

ភ្នំពេញ៖ ក្នុងបំណងថែរក្សា និងលើកតម្កើងអក្សរសាស្ត្រ អក្សរសិល្ប៍ជាតិ ឱ្យកាន់តែប្រសើរឡើងថែមទៀត ក្រសួងវប្បធម៌និងវិចិត្រសិល្បៈ នឹងរៀបចំប្រឡងជ្រើសរើសស្នាដៃតែងនិពន្ធ ប្រលោមលោកនិងកំណាព្យរឿង ពានរង្វាន់ "ព្រះនាង ឥន្ទ្រទេវី” ឆ្នាំ២០២០ ក្នុងប្រធានបទសេរី។

ការវិនិច្ឆ័យរឿង គឺផ្ទៃរឿងទាំងមូលត្រូវមានលក្ខណៈកំណត់៣ចំណុច។ ទី១ អត្ថន័យ ត្រូវប្រកបដោយ សច្ចធម៌ សីលធម៌ និងគុណធម៌។ ទី២ អត្ថរូប ត្រូវមានវិធីតែង រចនាបថ និងសិល្ប៍សោភ័ណ។ និងទី៣ អត្ថរស ត្រូវបង្ហាញឱ្យឃើញពីការអប់រំ ការអភិវឌ្ឍ និងការរក្សាតម្លៃអត្តសញ្ញាណជាតិ។

ការវាយតម្លៃលើអក្ខរាវិរុទ្ធ យកតាមវចនានុក្រមខ្មែរ (សម្ដេចព្រះសង្ឃរាជ ជួន ណាត ជោតញ្ញាណោ)។ អត្ថបទត្រូវវាយដោយកំព្យូទ័រ ( Front យូនីកូដ Khmer OS Metal Chrieng ទំហំ ១២)។ ខ្នាតក្រដាស A4 (ចាប់ពី ១៥ដល់៣០ទំព័រ)។

ស្នាដៃតែងនិពន្ធដែលជាប់ជយលាភីលេខ ១ដល់លេខ៣ (ប្រលោមលោក៣រូបនិងកំណាព្យរឿង៣រូប) ទទួលបានពានរង្វាន់ចំនួនមួយ និងអមដោយទឹកប្រាក់។ ស្នាដៃដែលទទួលបានរង្វាន់កិត្តិយសលេខ ៤និង៥ (ប្រលោមលោក២រូបនិងកំណាព្យរឿង២រូប) ទទួលបានបណ្ណសរសើរ១និងអមដោយទឹកប្រាក់។

បេក្ខជនដែលមានចំណាប់អារម្មណ៍ អាចយកស្នាដៃរបស់ខ្លួនទៅប្រកួតប្រជែង ចាប់ពីថ្ងៃជូនដំណឹងនេះរហូតដល់ថ្ងៃទី៣០ខែឧសភា ឆ្នាំ២០២០ ។

ទីកន្លែងទទួលស្នាដៃប្រឡង នៅនាយកដ្ឋានសៀវភៅនិងការអាន អគារលេខ៤៤ ផ្លូវសម្ដេចប៉ាន (លេខ២១៤) សង្កាត់បឹងរាំង ខណ្ឌដូនពេញ រាជធានីភ្នំពេញ នៅរៀងរាល់ម៉ោងធ្វើការ ឬតាមរយៈ Telegrm លោក កុក រស់ ០១១ ៨៥០ ០៩៤ ឬអ្នកស្រី ញឹក ថារី ០១២ ៨០១ ១២២។ សម្រាប់ព័ត៌មានលំអិត សូមទាក់ទងតាមរយៈទូរសព្ទលេខ ០១៧ ៤៧៤ ១១៦/ ០១៧ ៧៨៩ ០២៩៕