អន្តរជាតិ
រដ្ឋាភិបាលថៃ គ្រោងផ្តល់កម្ចីជិត៤០លានដុល្លារដល់កម្ពុជាសង់ផ្លូវប្រវែង១៣១គីឡូម៉ែត្រ សម្តេចនាយករដ្ឋមន្ត្រី ហ៊ុន សែន (ឆ្វេង) និងលោកនាយករដ្ឋមន្ត្រីថៃ ប្រយុទ្ធ ចន្ទអូចា ជិះរថភ្លើង អំឡុងពិធីសម្ពោធឲ្យប្រើប្រាស់បណ្តេញផ្លូវដែករវាងកម្ពុជា និងថៃ កាលពីថ្ងៃ ២២ ខែមេសា ឆ្នាំ ២០១៩ (AFP)
× រាជាណាចក្រថៃ មានគម្រោងផ្តល់កម្ចី ៨,៥ពាន់លានបាត ឬស្មើនឹង ២៨១,៥៦លានដុល្លារនាឆ្នាំក្រោយ ដល់កម្ពុជា មីយ៉ាន់ម៉ា និងឡាវ ដើម្បីសាងសង់ផ្លូវឆ្លងប្រទេសថ្មីចំនួន ៤ ក្រោមគំនិតផ្តួចផ្តើមការតភ្ជាប់អាស៊ាន។ ក្នុងចំណោមកម្ចីនេះ កម្ពុជា នឹងទទួលបានជិត៤០លានដុល្លារ។
«អត្រាការប្រាក់សម្រាប់គម្រោងផ្លូវជាតិនីមួយៗ គឺគ្មានប្រែប្រួលឡើយ ត្រឹមតែ ០,១ ភាគរយ ប៉ុណ្ណោះ»។ លោក Perames Vudthitornetiraks ប្រធានទីភ្នាក់ងារកិច្ចសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាង លើកឡើងបែបនេះ ដោយបន្ថែមថា រដ្ឋាភិបាលក្រុងបាងកក ចង់យកគម្រោងទាំងនេះជួយពង្រឹងកិច្ចសហប្រតិបត្តិការមហាអនុតំបន់ទន្លេមេគង្គ (GMS) ។
ក្នុងចំណោមកម្ចីទាំង៨,៥ពាន់លានបាតនេះ រដ្ឋាភិបាលថៃ នឹងផ្តល់កម្ចី១,២ពាន់លានបាត ឬស្មើនឹងជិត៤០លានដុល្លារដល់ប្រទេសកម្ពុជា ដើម្បីកសាងផ្លូវមួយខ្សែប្រវែង ១៣១គីឡូម៉ែត្រ។ ផ្លូវដែលតភ្ជាប់ប្រទេសទាំងពីរនេះ នឹងឆ្លងកាត់តំបន់សំខាន់ៗក្នុងប្រទេសកម្ពុជា ដូចជា ស្រុកអន្លង់វែង ខេត្តឧត្តរមានជ័យ និងខេត្តសៀមរាប។ នេះបើតាមការចុះផ្សាយរបស់កាសែតបាងកកប៉ុស្តិ៍ នៅថ្ងៃទី២៣ ខែធ្នូ ។
ក្នុងប្រទេសមីយ៉ាន់ម៉ាឯណោះវិញ ផ្លូវប្រវែង១៣៨គីឡូម៉ែត្រមួយខ្សែ ដែលគិតជាទឹកប្រាក់តម្លៃ ៤ពាន់លានបាត ឬស្មើនឹងជាង ១៣២,៥លានដុល្លារ នឹងត្រូវសាងសង់ផ្លូវ ដើម្បីតភ្ជាប់តំបន់សេដ្ឋកិច្ចពិសេស Dawei របស់មីយ៉ាន់ម៉ាជាមួយខេត្ត Kanchanaburi នៃប្រទេសថៃ។ តាមបាងកកប៉ុស្តិ៍ លោក Perames អះអាងថា រដ្ឋាភិបាលមីយ៉ាន់ម៉ា បង្ហាញការចាប់អារម្មណ៍ខ្លាំងក្នុងការអភិវឌ្ឍផ្លូវនេះ។
ម្យ៉ាងវិញទៀត រដ្ឋាភិបាលថៃ ក៏មានផែនការផ្តល់កម្ចីដល់ការសាងសង់ស្ពានមិត្តភាព ថៃ-ឡាវ ទី ៥ ដែលតភ្ជាប់ខេត្ត Bueng Kan ភាគខាងជើងនៃប្រទេសថៃ និងខេត្ត Bolikhamsai ក្នុងប្រទេសឡាវ ។ លុយប្រមាណ ១,៣ពាន់លានបាត នឹងត្រូវចំណាយដើម្បីកសាងផ្នែកមួយនៃស្ពានដែលស្ថិតលើទឹកដីឡាវ។ ចំណែកគម្រោងផ្លូវថ្នល់មួយទៀតក្នុងប្រទេសថៃ គឺការកសាងផ្លូវប្រវែង ១៤៧គីឡូម៉ែត្រ ដែលមានតម្លៃ២ពាន់លានបាត ដែលនឹងចាប់ផ្តើមក្នុងខេត្ត Nakhon Phanom ប្រទេសថៃ ឆ្ពោះទៅកាន់ទីក្រុង Thakhek ប្រទេសឡាវ ហើយហួសទៅដល់រដ្ឋធានីហាណូយ នៃប្រទេសវៀតណាម ផងដែរ។
សូមបញ្ជាក់ថា គណៈរដ្ឋមន្ត្រីថៃ នឹងទទួលបានសំណើឲ្យផ្តល់ការយល់ព្រមសម្រាប់ការអភិវឌ្ឍហេដ្ឋរចនាសម្ព័ន្ធនេះ។ បើតាមកាសែត បាងកកប៉ុស្តិ៍ អ្នកឃ្លាំមើល យល់ឃើញថា ប្រទេសដែលមានកំណើនសេដ្ឋកិច្ចជឿនលឿន ដូចជា កម្ពុជា និងមីយ៉ាន់ម៉ា ដែលពុំទាន់មានបំណុលច្រើន គួរតែសាកសមនឹងទទួលបានគំនិតផ្តួចផ្តើមបែបនេះ៕
Tag:
ថៃ
កម្ពុជា
ឡាវ
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com