អន្តរជាតិ
វៀតណាមស្នើអឺរ៉ុបពន្លឿនការអនុម័តកិច្ចព្រមព្រៀងពាណិជ្ជកម្មសេរី ដើម្បីប្រយោជន៍ពលរដ្ឋទាំងសងខាង ឧបនាយករដ្ឋមន្ត្រីវៀតណាម ផាម ប៊ិញមិញ ជួបជាមួយតំណាងជាន់ខ្ពស់សហភាពអឺរ៉ុបសម្រាប់កិច្ចការការបរទេស និងគោលនយោបាយសន្តិសុខ Josep Borrell ។ រូបភាពក្រសួងការបរទេសវៀតណាម
× រដ្ឋាភិបាលក្រុងហាណូយ បានស្នើត្រង់ៗឲ្យមន្ត្រីជាន់ខ្ពស់សហភាពអឺរ៉ុបជួយពន្លឿន និងជំរុញសភាសហភាពអឺរ៉ុបដើម្បីអនុម័តលើកិច្ចព្រមព្រៀងពាណិជ្ជកម្មសេរីរបស់អឺរ៉ុប និងវៀតណាម ដែលពុំទាន់ចូលជាធរមាននៅឡើយនោះ។ ក្រុងហាណូយ ថ្លែងបែបនេះ ដោយអះអាងថា ដើម្បីជាប្រយោជន៍ដល់ប្រជាជនរបស់ភាគីទាំងពីរ។
លោកឧបនាយករដ្ឋមន្ត្រី និងជារដ្ឋមន្ត្រីការបរទេសវៀតណាម Phạm Bình Minh នៅសប្តាហ៍មុនបានឲ្យដឹងថា វៀតណាម បានត្រៀមខ្លួនរួចជាស្រេចក្នុងការពិភាក្សា និងសម្របសម្រួលការងារជាមួយនឹងសហភាពអឺរ៉ុបលើបញ្ហាដែលជាក្តីបារម្ភរួមរបស់ភាគីទាំងពីរ។ នេះបើយោងតាមការចុះផ្សាយរបស់ភ្នាក់ងារព័ត៌មានវៀតណាម Vietnam News។
សេចក្តីថ្លែងការណ៍របស់លោកឧបនាយករដ្ឋមន្ត្រី ធ្វើឡើងនាជំនួបក្រៅផ្លូវការនៃកិច្ចប្រជុំរដ្ឋមន្ត្រីការបរទេសអាស៊ី-អឺរ៉ុបលើកទី១៤ ក្នុងប្រទេសអេស្ប៉ាញ ជាមួយនឹងលោក Josep Borrell តំណាងជាន់ខ្ពស់សហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ និងជាអនុប្រធានគណៈកម្មការសហភាពអឺរ៉ុបផងដែរ ។
តាមប្រភពព័ត៌មានដដែល ឆ្លៀតឱកាសនោះ នៅចំពោះមុខតំណាងជាន់ខ្ពស់សហភាពអឺរ៉ុប ប្រមុខការទូតវៀតណាមរូបនេះ បានស្នើត្រង់ៗឲ្យសហភាពអឺរ៉ុបជំរុញសភាសហភាពអឺរ៉ុបអនុម័តលើកិច្ចព្រមព្រៀងសំខាន់ពីរ រួមមានកិច្ចព្រមព្រៀងស្តីពីពាណិជ្ជកម្មសេរី សហភាពអឺរ៉ុប-វៀតណាម (EVFTA) និងកិច្ចព្រមព្រៀងស្តីពីការការពារការវិនិយោគសហភាពអឺរ៉ុប-វៀតណាម ( IPA)។
សម្រាប់វៀតណាម នៅពេលដែលកិច្ចព្រមព្រៀងទាំងពីរ ដែលជាកិច្ចព្រមព្រៀងបើកផ្លូវដល់វៀតណាមក្នុងការទទួលបានលក្ខខណ្ឌអនុគ្រោះដ៏សម្បូរបែបពីសហភាពអឺរ៉ុបក្នុងការនាំចេញ និងនាំចូលផលិតផល និងទំនិញផ្សេងៗ ចូលជាធរមាន នោះអ្នកដែលទទួលបានផលប្រយោជន៍ច្រើនជាងគេ គឺអ្នកជំនួញ និងប្រជាជននៃប្រទេសទាំងពីរតែម្តង។
តាម Vietnam News តំណាងជាន់ខ្ពស់សហភាពអឺរ៉ុប មិនបានអះអាង និងសន្យាតាមសំណើរបស់វៀតណាមទេ ក៏ប៉ុន្តែតំណាងរូបនេះ បានបង្ហាញពីការចំណុចវិជ្ជមានរបស់ប្រជាជន និងប្រទេសវៀតណាម ដោយលោក គូសបញ្ជាក់ថា វៀតណាម គឺជាប្រទេសមួយ ដែលមានការលូតលាស់ឆាប់រហ័ស និងសេដ្ឋកិច្ចមានសក្តានុពលបំផុតនៅក្នុងតំបន់អាស៊ី។
គួរជម្រាបថា សហភាពអឺរ៉ុប-វៀតណាម បានចុះហត្ថលេខាជាមួយគ្នាលើកិច្ចព្រមព្រៀងពាណិជ្ជកម្មសេរីនៅពាក់កណ្តាលឆ្នាំ២០១៩កន្លងទៅ។ កិច្ចព្រមព្រៀងនេះ នៅមិនទាន់ចូលជាធរមាននៅឡើយនោះទេ ដ្បិតត្រូវរង់ចាំការសម្រេចអនុម័តពីសភាសហភាពអឺរ៉ុបជាមុនសិន។ វៀតណាម រំពឹងខ្ពស់ ថា នឹងទទួលបានផលប្រយោជន៍ច្រើន ដ្បិតសហអឺរ៉ុប គឺជាទីផ្សារដ៏មានសក្តានុពលមួយរបស់ពិភពលោក៕
Tag:
វៀតណាម
សហភាពអឺរ៉ុប
© រក្សាសិទ្ធិដោយ thmeythmey.com