ជាតិ
NGO Forum ៖ ៥ចំណុច ដែលកម្ពុជាគួរតែរៀនពីហ្វីលីពីន ក្នុងការគ្រប់គ្រងធនធានធម្មជាតិ
× ហ្វីលីពីន៖ ក្នុងដំណើរទស្សនកិច្ចសិក្សាយ៉ាងយកចិត្តទុកដាក់ រយៈពេល៥ថ្ងៃនៅប្រទេសហ្វីលីពីន វេទិកានៃអង្គការមិនមែនរដ្ឋាភិបាលស្ដីពីកម្ពុជា (NGO Forum on Cambodia) បានកំណត់ចំណុចខ្លាំង៥យ៉ាងរបស់ហ្វីលីពីន លើការគ្រប់គ្រងព្រៃឈើ ដែលកម្ពុជាគួរតែរៀនសូត្រតាម។
លោក អ៊ុក វណ្ណារ៉ា នាយកប្រតិបត្តិរង នៃវេទិកាអង្គការមិនមែនរដ្ឋាភិបាលស្ដីពីកម្ពុជា (NGO Forum on Cambodia) បានប្រាប់សារព័ត៌មានថ្មីៗ ក្នុងថ្ងៃទស្សនកិច្ចសិក្សានៅទីក្រុងម៉ានីឡា ប្រទេសហ្វីលីពីនថា កម្ពុជាគួរតែយកគំរូល្អពីប្រទេសហ្វីលីពីន ក្នុងការគ្រប់គ្រងធនធានធម្មជាតិ ក៏ដូចជាយន្តការលើកកម្ពស់សិទ្ធិនិងជីវភាពជនជាតិដើមភាគតិច។
លោក អ៊ុក វណ្ណារ៉ា បញ្ជាក់បន្ថែម៖«មកហ្វីលីពីន ខ្ញុំបានសង្កេតឃើញថា ប្រទេសនេះមានចំណុចល្អច្រើនក្នុងការគ្រប់គ្រងធនធានធម្មជាតិ គ្រប់គ្រងព្រៃឈើ និងធ្វើឱ្យប្រសើរឡើងនូវជីវភាពជនជាតិដើមភាគតិច។ ខ្ញុំគិតថាចំណុចទាំងនេះ កម្ពុជាគួរតែរៀនសូត្រតាម»។
នាយកប្រតិបត្តិរងរូបនេះបានលើកឡើង៥ចំណុចដែលហ្វីលីពីនអនុវត្តន៍បានល្អ ហើយកម្ពុជាគួររៀនសូត្រតាមនោះ គឺទី១ ហ្វីលីពីនបានបង្កើតគោលនយោបាយគតិយុត្តិ ដើម្បីលើកកម្ពស់សិទ្ធិជនជាតិដើមភាគតិច ក៏ដូចជាការការពារធនធានធម្មជាតិ។ ទី២ ហ្វីលីពីន បានអនុវត្តន៍តាមច្បាប់ដែលបានកំណត់បានល្អ ដោយមិនមានអ្នកណាហ៊ានបំពានច្បាប់។
ទី៣ សមត្ថភាពរបស់សហគមន៍ជនជាតិដើមភាគតិច មានភាពល្អប្រសើរ មានន័យថាជនជាតិដើមភាគតិចហ្វីលីពីន ក៏អាចមានមុខតំណែងខ្ពស់ក្នុងជួររដ្ឋាភិបាលដែរ។ ចាស់ព្រឹទ្ធាចារ្យនៃជនជាតិដើមភាគតិច បានឱ្យតម្លៃលើការសិក្សា ជាពិសេសពួកគេលើកទឹកចិត្តក្មេងជំនាន់ក្រោយគ្រប់រូបភាពឱ្យរៀនកាន់តែខ្ពស់ ដើម្បីត្រឡប់មកអភិវឌ្ឍន៍សហគមន៍វិញ។
ទី៤ ហ្វីលីពីន មានគោលការណែនាំពីរដ្ឋាភិបាល ក្នុងការវិភាគថវិកាគាំទ្រនូវការអភិវឌ្ឍជីវភាពរស់នៅរបស់ជនជាតិដើមភាគតិចក្នុងសហគមន៍ ក៏ដូចជាការការពារធនធានធម្មជាតិប្រកបដោយចីរភាព។ ចុងក្រោយ ហ្វីលីពីនមានយុន្តការការពារធនធានធម្មជាតិ ក៏ដូចជាការលើកកម្ពស់សិទ្ធិជនជាតិដើមភាគតិចតាំងពីថ្នាក់ជាតិរហូតដល់ថ្នាក់មូលដ្ឋាន។
សូមបញ្ជាក់ថា វេទិកានៃអង្គការមិនមែនរដ្ឋាភិបាលស្ដីពីកម្ពុជា (NGO Forum on Cambodia) បានអញ្ជើញមន្ត្រីក្នុងជួររដ្ឋាភិបាលរួមមានតំណាងក្រសួងមហាផ្ទៃ ក្រសួងអភិវឌ្ឍន៍ជនបទ ក្រសួងកិច្ចការនារី ក្រសួងដែនដី មន្ទីរបរិស្ថាន និងរដ្ឋបាលសាលាខេត្តជាដើម។ ហើយក្នុងនោះក៏មានសមាជិកបណ្ដាញព្រៃឈើ និងបណ្ដាញជនជាតិដើមភាគតិច ហៅកាត់ថា( IPFN) រួមទាំងបណ្ដាញសិទ្ធិលំនៅស្ថាននិងដីធ្លី ហៅកាត់ថា (LAHRIN) ទៅចូលរួមដំណើរទស្សនកិច្ចសិក្សានៅប្រទេសហ្វីលីពីន។ ដំណើរទស្សនកិច្ចនេះមានរយៈពេល៥ថ្ងៃ គឺពីថ្ងៃទី៩ដល់១៣ធ្នូឆ្នាំ២០១៩៕
Tag:
ហ្វីលីពីន
NGO Forum
កម្ពុជា
ធនធានធម្មជាតិ
ជនជាតិដើមភាគតិច
© រក្សាសិទ្ធិដោយ thmeythmey.com