អន្តរជាតិ
ចិន នឹងបន្ថយពន្ធនាំចូលលើសាច់ជ្រូក ថ្នាំពេទ្យនិងឧបករណ៍អេឡិចត្រូនិក ប្រភព៖ China Daily
× ចាប់ពីឆ្នាំក្រោយ រដ្ឋាភិបាលក្រុងប៉េកាំង នឹងកាត់បន្ថយពន្ធនាំចូលលើទំនិញរាប់់រយប្រភេទ រាប់ចាប់ពីសាច់ជ្រូកក្លាសេ ថ្នាំពេទ្យ និងឧបករណ៍អេឡិចត្រូនិកបច្ចេកវិទ្យាខ្ពស់។ គោលដៅគឺដើម្បីបន្ទាបរបាំងពាណិជ្ជកម្មដើម្បីជំរុញសេដ្ឋកិច្ចចិន ខណៈកំណើនសេដ្ឋកិច្ចធ្លាក់ចុះយឺតព្រោះសង្គ្រាមពាណិជ្ជកម្មជាមួយសហរដ្ឋអាមេរិក។
ក្នុងសេចក្តីថ្លែងការណ៍មួយ ក្រសួងហិរញ្ញវត្ថុចិន នៅថ្ងៃចន្ទ ២៣ ខែឆ្នូ បញ្ជាក់ថា ពន្ធនាំចូលលើផលិតផល ៨៥៩ ប្រភេទ នឹងត្រូវបន្ធូរបន្ថយ ចាប់ពីថ្ងៃ ០១ មករា ឆ្នាំ២០២០ តទៅ។ ក្រសួងបន្តថា ការកែប្រែអត្រាពន្ធជាបណ្តោះអាសន្ននេះ គឺធ្វើឡើងដើម្បីបង្កើនការនាំចូលផលិតផល ដែលកំពុងប្រឈមនឹងការខ្វះខាតក្នុងស្រុក ឬទំនិញពិសេសរបស់បរទេសសម្រាប់ការប្រើប្រាស់ប្រចាំថ្ងៃ។
តាមការចុះផ្សាយរបស់ទីភ្នាក់ងារព័ត៌មាន Reuters អត្រាពន្ធនាំចូលលើសាច់ជ្រូកក្លាសេ នឹងត្រូវបន្ថយពី ១២ ភាគរយមកត្រឹម ៨ ភាគរយ សម្រាប់ប្រទេសមួយចំនួន ខណៈចិនកំពុងប្រយុទ្ធប្រឆាំងនឹងការរីករាលដាលនៃជំងឺប៉េស្តជ្រូកអាហ្វ្រិក ។ ជំងឺដ៏កាចសាហាវនេះ បានសម្លាប់ជ្រូកពាក់កណ្ដាលក្នុងប្រទេសចិន ហើយប៉ះពាល់ខ្លាំងដល់ឧស្សាហកម្មសាច់ជ្រូក។ ក្រុងប៉េកាំង កំពុងព្យាយាមបំពេញចន្លោះប្រហោងដ៏ធំនៃការផ្គត់ផ្គង់សាច់ដែលប្រជាជនចិនពេញនិយមបរិភោគ និងទប់ស្កាត់ការឡើងតម្លៃហួសហេតុពេក។
ទំនិញនាំចូលផ្សេងទៀត ដែលនឹងធ្លាក់អត្រាពន្ធ រួមមាន ផ្លែប៊័រក្លាសេ (avocado) និងផលិតផលក្រដាស និងឈើផ្សេងទៀត។ ទន្ទឹមនេះ ចិន ក៏នឹងលុបចោលពន្ធគយលើថ្នាំព្យាបាលជំងឺហឺតនិងទឹកនោមផ្អែមមួយចំនួន ក៏ដូចជា ឧបករណ៍អេឡិចត្រូនិកមួយចំនួនផងដែរ។ ការបន្ថយពន្ធនេះ នឹងផ្តល់អត្ថប្រយោជន៍ច្រើនដល់ដៃគូពាណិជ្ជកម្មចិន រួមមាន នូវែលសេឡង់ ប៉េរូ សិង្ហបុរី និងប៉ាគីស្ថាន។
សូមបញ្ជាក់ថា កំណើនសេដ្ឋកិច្ចចិន ធ្លាក់ចុះយឺតខ្លាំងបំផុត ក្នុងរយៈពេលជិត ៣០ឆ្នាំចុងក្រោយ ហើយអាចប្រឈមនឹងសម្ពាធបន្ថែមទៀតនាឆ្នាំក្រោយ។ នោះគឺដោយសារសង្គ្រាមពាណិជ្ជកម្មជាមួយសហរដ្ឋអាមេរិក។ មន្ត្រីពាណិជ្ជកម្មសហរដ្ឋអាមេរិក បានអះអាងថា ចិន បានយល់ព្រមទិញផលិតផលនិងសេវាកម្មអាមេរិកបន្ថែម ដែលស្មើនឹង ២០០ពាន់លានដុល្លារ ក្នុងរយៈពេល ២ ឆ្នាំខាងមុខ។ វាគឺជាផ្នែកនៃកិច្ចព្រមព្រៀងពាណិជ្ជកម្មដំណាក់កាលទី ១ ដែលគ្រោងនឹងចុះហត្ថលេខា នាដើមខែឆ្នាំ២០២០។ ប្រសិនបើការបញ្ជាទិញ ត្រូវបានធ្វើឡើងមែននោះ នេះនឹងតំណាងឲ្យការនាំចូលបរិមាណដ៏ធំមួយរបស់អាមេរិកទៅកាន់ប្រទេសចិន៕
Tag:
ចិន
សហរដ្ឋអាមេរិក
សង្គ្រាមពាណិជ្ជកម្ម
© រក្សាសិទ្ធិដោយ thmeythmey.com