ភ្នំពេញ៖ មជ្ឈមណ្ឌលធនធានសោតទស្សន៍បុប្ផាណា បានរៀបចំវេទិកាពិភាក្សានិងឆ្លុះបញ្ចាំងពីទស្សនៈរបស់យុវជននិងអ្នករស់រានមានជីវិតពីរបបខ្មែរក្រហម ទៅលើកិច្ចសន្ទនាគ្រួសារ ឬ អន្តរជំនាន់ រវាងសមាជិកគ្រួសារ ឬសាច់ញាតិ នៅថ្ងៃទី២៣ខែធ្នូ ឆ្នាំ២០១៩នេះ ។ កម្មវិធីនេះបង្កើតឡើងដើម្បី ជាការលើកទឹកចិត្តយុវជនជំនាន់ក្រោយដទៃទៀត ឱ្យមានភាពក្លាហានក្នុងការបង្កើតកិច្ចសន្ទនាអន្តរជំនាន់ជាមួយសមាជិកគ្រួសារ ឬសាច់ញាតិរបស់ខ្លួន ដែលបានឆ្លងកាត់របបខ្មែរក្រហម។
យុវជននិងយុវនារីចំនួន៥៣រូប បានមកចូលរួមក្នុងវេទិកាពិភាក្សាមួយ ដែលឆ្លុះបញ្ចាំងពីទស្សនៈរបស់យុវជន និងអ្នករស់រានមានជីវីតពីរបបខ្មែរក្រហម ចំពោះការបង្កើតឱ្យមានកិច្ចសន្ទនាគ្រួសារ ឬកិច្ចសន្ទនាអន្តរជំនាន់ ។
ការរៀបចំឱ្យមានកម្មវិធីនេះឡើង គឺក្នុងគោលបំណងកត់ត្រារឿងរ៉ាវប្រវត្តិសាស្ត្រ សម្រាប់មនុស្សជាតិ និងជាការចែករំលែកនូវការចងចាំរបស់មនុស្សជំនាន់មុន ដល់មនុស្សជំនាន់ក្រោយ ក្នុងការចូលរួមទប់ស្កាត់ការត្រឡប់មកវិញ នូវរបបដ៏សាហាវយង់ឃ្នងមកលើកម្ពុជាជាថ្មី។
យុវជនទាំងអស់ដែលបានចូលរួមវេទិការនេះ នឹងបង្កើតក្រុមពិភាក្សាអំពីការយល់ឃើញរបស់ពួកគេ ជុំវិញមូលហេតុដែលបណ្ដាលឱ្យមានសង្គ្រាម និងការយល់ឃើញរបស់ពួកគេទាក់ទងនឹងសង្គ្រាម។
សកម្មភាពសិក្ខាកាមចូលរួមក្នុងវេទិកាពិភាក្សាឆ្លុះបញ្ចាំងពី ទស្សនៈរបស់យុវជននិងអ្នករស់រានមានជីវិតពីរបបខ្មែរក្រហម
កិច្ចសន្ទនាគ្រួសារឬកិច្ចសន្ទនាអន្តរជំនាន់នេះ ធ្វើឡើងក្រោម “កម្មវិធីរំឭក" ដែលជាសកម្មភាពមួយនៃគម្រោង«អេប-កម្មវិធីសិក្សាប្រវត្តិសាស្ត្រខ្មែរក្រហម» ដែលអនុញ្ញាតឱ្យយុវជនយល់កាន់តែស៊ីជម្រៅ អំពីប្រវត្តិសាស្ត្រខ្មែរក្រហម និងអនុញ្ញាតឱ្យអ្នករស់រានមានជីវិត អាចចែករំលែកនូវរឿងរ៉ាវនិងបទពិសោធជីវិតរបស់ខ្លួន ក្នុងរបបខ្មែរក្រហម ។
នៅក្នុងឆ្នាំ២០១៨ និងឆ្នាំ២០១៩ "កម្មវិធីរំឭក" បានបណ្ដុះបណ្ដាលយុវជនកម្ពុជាជាច្រើននាក់ អំពីប្រវត្តិសាស្ត្រខ្មែរក្រហម តាមរយៈការប្រើប្រាស់ «អេប-កម្មវិធីសិក្សាប្រវត្តិសាស្ត្រខ្មែរក្រហម» ពីបច្ចេកទេសក្នុងការសម្ភាស និងការគាំទ្រផ្លូវចិត្ត ទៅដល់អ្នករស់រានមានជីវិតពីរបបខ្មែរក្រហម។
បន្ទាប់ពីទទួលបានការបណ្ដុះបណ្ដាលនេះ មានយុវជនចំនួន៧០រូប បានចូលរួមកត់ត្រាការចងចាំរបស់សមាជិកគ្រួសារ និងសាច់ញាតិរបស់ខ្លួន ទាក់ទងនឹងរឿងរ៉ាវដែលពួកគាត់បានឆ្លងកាត់ ក្នុងរបបខ្មែរក្រហម តាមរយៈការធ្វើកិច្ចសន្ទនាអន្តរជំនាន់។ ជាលទ្ធផល មជ្ឈមណ្ឌលធនធានសោតទស្សន៍បុប្ផាណា ទទួលបានបទពិសោធរបស់អ្នករស់រានមានជីវិត ពីរបបខ្មែរក្រហមចំនួន៨៧សាច់រឿង ពី១៣រាជធានី-ខេត្ត រួមមានរាជធានីភ្នំពេញ ខេត្តកណ្ដាល សៀមរាប ត្បូងឃ្មុំ កំពង់ចាម កំពង់ឆ្នាំង កំពង់ធំ ពោធិ៍សាត់ ស្វាយរៀង ព្រៃវែង កំពង់ស្ពឺ តាកែវ និងព្រះវិហារ។
សិក្ខាកាមឡើងមានមតិយោបល់ក្រោយចូលរួម កិច្ចសន្ទនាគ្រួសារ ឬកិច្ចសន្ទនាអន្តរជំនាន់ ក្រោមកម្មវិធីរំឭក
«អេប-កម្មវិធីសិក្សាប្រវត្តិសាស្ត្រខ្មែរក្រហម» គឺជាគម្រោងសំណងមួយរបស់អង្គជំនុំជម្រះវិសាមញ្ញក្នុងតុលាការកម្ពុជា។ គម្រោងនេះត្រូវបានបង្កើតឡើង និងអនុវត្តដោយមជ្ឈមណ្ឌលធនធានសោតទស្សន៍បុប្ផាណា ក្រោមជំនួយហិរញ្ញវត្ថុរបស់សហគមន៍អឺរ៉ុប តាមរយៈការិយាល័យអង្គការសហប្រជាជាតិ សម្រាប់សេវាកម្មគម្រោង (United Nations Office for Project Services) និងទទួលបានជំនួយហិរញ្ញវត្ថុពីមូលនិធិរៃ (Rei Foundation Limited) ដោយមានការគាំទ្រពីក្រសួងអប់រំ យុវជន និងកីឡា និងក្រសួងវប្បធម៌និងវិចិត្រសិល្បៈ។ គម្រោងនេះ បានចាប់ផ្ដើមដំណើរការចាប់តាំងពីខែឧសភា ឆ្នាំ២០១៦។
ចំណាំ៖ របៀបទាញយក«អេប-កម្មវិធីសិក្សាប្រវត្តិសាស្ត្រខ្មែរក្រហម» ត្រូវចូលទៅកាន់ Google play ឬ App Store ហើយនៅលើប្រអប់ Search វាយពាក្យ Pol Pot ឬ Khmer Rouge History បន្ទាប់មកចុច INSTALL ឬ GET។ ក្រោយពីដំឡើងចប់ នុះអាចបើកដំណើរការកម្មវិធីនេះបានហើយ។