អន្តរជាតិ
លោក អ៊ែរដូហ្កាន់ ប្រាប់អឺរ៉ុប៖ តួកគីមិនអាចសែងអម្រែកជនភៀសខ្លួនស៊ីរីតែឯងឡើយ ប្រធានាធិបតីតួកគី តៃយីប អ៊ែរដូហ្កាន់ ថ្លែងក្នុងសន្និសីទអន្តរជាតិស្ដីពីជនភៀសខ្លួន។ រូបភាព AFP
× ប្រតិបត្តិការផ្លូវអាកាសរបស់រដ្ឋាភិបាលស៊ីរី និងទ័ពអាកាសរុស្ស៊ីនៅខេត្តអ៊ីដលីប កំពុងបង្កការឈឺក្បាលឲ្យតួកគី ដោយសារលំហូរជនភៀសខ្លួនឥតស្រាកស្រាន្ត។ ប្រធានាធិបតីតួកគី រ៉េស៊ីប តៃយីប អ៊ែរដូហ្កាន់ នៅថ្ងៃទី២២ ខែធ្នូ បានព្រមានអឺរ៉ុបថា ក្រុងអង់ការ៉ា មិនអាចទ្រាំទ្រចំនួនជនភៀសខ្លួនស៊ីរីដ៏ច្រើនតែម្នាក់ឯងបានឡើយ។ តួកគី អាចបង្ខំចិត្តបើកផ្លូវឲ្យជនភៀសខ្លួនទាំងបន្តដំណើរទៅអឺរ៉ុបមិនខាន បើព្រុចសែលមិនជួយទេនោះ។
ជនភៀសខ្លួនស៊ីរីរាប់ពាន់នាក់ បានភៀសខ្លួនទៅកាន់ព្រំដែនជាមួយតួកគីដើម្បីគេចពីការទម្លាក់គ្រាប់បែករបស់យោធាស៊ីរី និងរុស្ស៊ីនៅ Maaret al-Numan ចាប់តាំងពីថ្ងៃទី១៦ ខែធ្នូមក។ តំបន់ក្នុងខេត្តអ៊ីដលីបនេះ ជាមូលដ្ឋានចុងក្រោយមួយរបស់ក្រុមឧទ្ទាមមានប្រជាជនប្រមាណបីលាននាក់ ដែលរាប់បញ្ចូលទាំងជនភៀសខ្លួនពីតំបន់នានាផងដែរ។ រដ្ឋាភិបាលក្រុងដាម៉ាស់ ប្រកាសម្ដងជាពីរដងថា ខ្លួននឹងវាយដណ្ដើមខេត្តនេះមកវិញ។
យុទ្ធនាការយោធារបស់កងទ័ពស៊ីរី ដែលមានជំនួយពីទ័ពរុស្ស៊ី បង្កឲ្យមានការភៀសខ្លួនមិនចេះដាច់។ តួកគី គឺជាគោលដៅរបស់ជនភៀសខ្លួនដែលស្វែងរកទីសុវត្ថិភាព។ ទីក្រុងអង់ការ៉ា កំពុងបារម្ភយ៉ាងខ្លាំងចំពោះរលកជនភៀសខ្លួនថ្មីនេះ ខណៈខ្លួនបានផ្ដល់ជម្រកដល់ជនភៀសខ្លួនស៊ីរីជាងបីលាននាក់ហើយនោះ។ ប្រធានាធិបតីតួកគី រ៉េស៊ីប តៃយីប អ៊ែរដូហ្កាន់ និយាយថា តួកគីមិនទាន់ទ្រាំទ្រលំហូរជនភៀសខ្លួនលើកនេះឡើយ។
បើតាមទីភ្នាក់ងារព័ត៌មាន AFP លោក អ៊ែរដូហ្កាន់ អះអាងថា មកទល់ពេលនេះ ជនភៀសខ្លួនពីស៊ីរីជាង៨ម៉ឺននាក់ហើយ បានភៀសខ្លួនមកក្បែរព្រំដែនតួកគី។ លោកប្រធានាធិបតីក៏ព្រមានចំៗទៅកាន់អឺរ៉ុបថា ប្រសិនជនភៀសខ្លួនស៊ីរីបន្តកើនឡើងទៀតនោះ តួកគី នឹងមិនសែងអម្រែកនេះតែឯងឡើយ ហើយអឺរ៉ុប នឹងស្គាល់ពីការលំបាកក្នុងការសែងអម្រែកនេះ ពិសេសក្រិក។ ក្រិកជាច្រកដ៏សំខាន់មួយរបស់ជនភៀសខ្លួនពីតំបន់នានាឆ្លងចូលអឺរ៉ុប។
មេដឹកនាំតួកគី ក៏ឆ្លៀតរំឭកអឺរ៉ុបទៀតថា ស្ថានភាពឆ្នាំ២០១៥ អាចកើតឡើងម្ដងទៀតមិនខាន។ លោក អ៊ែរដូហ្កាន់ ចង់លើកឡើងពីលំហូរជនភៀសខ្លួនច្រើនជាងមួយលាននាក់ចូលអឺរ៉ុបដែលបង្កើតទៅជាវិបត្តិមួយដ៏ធំមិនធ្លាប់មានអឺរ៉ុបតាំងសង្គ្រាមលោកលើកទីពីរមក។ ក្រោយមក អឺរ៉ុប ក៏ចុះកិច្ចព្រមព្រៀងជាមួយតួកគីដើម្បីទប់ស្កាត់លំហូរជនភៀសខ្លួននេះ ដោយអឺរ៉ុបផ្ដល់លុយឲ្យក្រុងអង់ការ៉ាដើម្បីផ្ដល់ជម្រកឲ្យជនភៀសខ្លួន។
ក្រោមកិច្ចព្រមព្រៀងនេះ អឺរ៉ុបសន្យាផ្ដល់លុយឲ្យតួកគីចំនួន៦,៦ពាន់លានដុល្លារដើម្បីជួយទប់ស្កាតលំហូរជនភៀស ក៏ដូចជាការរឹតបន្តឹងព្រំដែនផងដែរ។ យ៉ាងណាមិញ ក្រុងអង់ការ៉ាធ្លាប់អះអាងថា អឺរ៉ុបមិនទាន់ឲ្យលុយគ្រប់តាមការសន្យាឡើយ។ បច្ចុប្បន្ន តួកគី ជាជម្រកជនភៀសខ្លួនមកពីមជ្ឈិមបូព៌ាជាង៥លាននាក់ហើយ ហើយជិតបួនលាននាក់ ជាជនភៀសខ្លួនស៊ីរី។ ដូចនេះ បើតួកគីមិនបិទព្រំដែនទេនោះ ជនភៀសខ្លួនទាំងនោះ ប្រាកដជាសម្រុកចូលអឺរ៉ុបមិនខាន៕
Tag:
តួកគី
អឺរ៉ុប
តៃយីប អ៊ែរដូហ្កាន់
© រក្សាសិទ្ធិដោយ thmeythmey.com