អន្តរជាតិ
លោកម៉ាក្រុង៖ ការធ្វើអាណានិគម ជាកំហុសធ្ងន់ធ្ងរមួយរបស់បារាំង ប្រធានាធិបតីបារាំង អេម៉ានុយអែល ម៉ាក្រុង និងប្រធានាធិបតីកូតឌីវ័រ Alassane Ouattara ។ រូបភាព AFP
× ប្រធានាធិបតីបារាំង អេម៉ានុយអែល ម៉ាក្រុង កាលពីចុងសប្ដាហ៍មុន និយាយថា ការធ្វើអាណានិគមជាកំហុសដ៏ធំមួយរបស់បារាំង។ ថ្លែងក្នុងដំណើរទស្សនកិច្ចនៅតំបន់អាហ្វ្រិក លោក ម៉ាក្រុង ដែលអះអាងថា លោកជាមនុស្សជំនាន់ក្រោយអាណានិគមនោះ ស្នើឲ្យមនុស្សជំនាន់ក្រោយបើកទំព័រថ្មីដើម្បីសរសេរប្រវត្តិសាស្ត្រថ្មី។
នៅថ្ងៃទី២១ ខែធ្នូ លោក អេម៉ានុយអែល ម៉ាក្រុង ប្រធានាធិបតីបារាំង បានធ្វើទស្សនកិច្ចនៅទីក្រុងអាប៊ីដហ្សង់ ប្រទេសកូតឌីវ័រដែលជារដ្ឋក្រោមអាណានិគមបារាំងនៅអាហ្វ្រិក។ ពីទីនោះ លោក ម៉ាក្រុង ក៏និយាយដល់ការដាក់អាណានិគមរបស់បារាំងលើប្រទេសដទៃពិសេសនៅអាហ្វ្រិក ដែលលោកចាត់ទុកថា ជាកំហុស។
ក្នុងសន្និសីទសារព័ត៌មានជាមួយសមភាគីកូតឌីវ័រ Alassane Ouattara លោក ម៉ាក្រុង និយាយថា បារាំង ត្រូវបានគេមើលឃើញថា នៅតែមានគំនិតវាតទីនិយម និងប្រកាន់គំនិតអាណនិគមនិយម ដែលនេះជាកំហុសដ៏ធ្ងន់ធ្ងររបស់បារាំង។ លោក ម៉ាក្រុង ដែលមានវ័យទើប៤២ឆ្នាំ បន្តថា លោកកើតក្នុងជំនាន់ដែលមិនមែនស្ថិតក្នុងសម័យកាលអាណានិគមអ្វីឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
«ទ្វីបអាហ្វ្រិក ជាទ្វីបក្មេងខ្ចី។ ប្រជាជនបីភាគមិនស្គាល់អាណានិគមឡើយ។» នេះជាការលើកឡើងរបស់ប្រធានាធិបតីបារាំង ដែលចង់សំដៅចំនួនមនុស្សវ័យក្មេងរបស់អាហ្វ្រិក។ លោកក៏ស្នើឲ្យមនុស្សជំនាន់ក្រោយទាំងនេះ បង្កើតភាពជាដៃគូថ្មីជាមួយបារាំង។
តាមពិតទៅ នេះជាមិនមែនជាលើកដំបូងដែលប្រធានាធិបតីបារាំងរូបនេះ បង្ហាញការសោកស្ដាយចំពោះគោលនយោបាយពីអតីតកាលរបស់បារាំង។ កាលពីយុទ្ធនាការបោះឆ្នោតជ្រើសរើសប្រធានាធិបតី លោក ម៉ាក្រុង ក៏បានធ្វើឲ្យគេឯងភ្ញាក់ផ្អើលគ្រប់គ្នា ដោយលោកបានហៅអាណានិគមបារាំងនៅអាល់ហ្សេរី ជាឧក្រិដ្ឋកម្មប្រឆាំងមនុស្សជាតិ។
អំឡុងពេលទស្សនកិច្ចនៅកូតឌីវ័រ លោក ម៉ាក្រុង ក៏ចូលរួមពិធីប្រកាសប្ដូរឈ្មោះរូបិយវត្ថុរបស់ប្រទេសអាហ្វ្រិកខាងលិចចំនួន៨ CFA ទៅជា Eco វិញ។ CFA នេះ ត្រូវបានចាត់ទុកជាកេរដំណែលបន្សល់ទុកដោយអាណានិគមបារាំង។ លោក ម៉ាក្រុង ចាត់ទុកការប្ដូរឈ្មោះនេះ ជាកំណែទម្រង់ប្រវត្តិសាស្ត្រ ហើយលុយថ្មី នឹងលេចជារូបរាងនៅឆ្នាំ២០២០ខាងមុខ៕
Tag:
បារាំង
អាហ្វ្រិក
អាណានិគម
អេម៉ានុយអែល ម៉ាក្រុង
© រក្សាសិទ្ធិដោយ thmeythmey.com