ជាតិ
សេដ្ឋកិច្ច
សម្ដេច ហ៊ុន សែន ៖អភិបាលខេត្តត្បូងឃ្មុំនឹងអស់តំណែង បើសិនគ្រប់គ្រង«ផ្សារគំរូព្រំដែន»បរាជ័យ
× ភ្នំពេញ៖ សម្ដេច ហ៊ុន សែន ព្រមានដកតំណែងអភិបាលខេត្តត្បូងឃ្មុំ បើសិនជាគ្រប់គ្រង«ផ្សារគំរូព្រំដែនកម្ពុជា» បរាជ័យ។ លោកនាយករដ្ឋមន្ត្រី ថ្លែងបែបនេះ នៅក្នុងពិធីសម្ពោធផ្សារដោះដូរទំនិញកម្ពុជា-វៀតណាម(ផ្សារគំរូព្រំដែន កម្ពុជា) នៅខេត្តត្បូងឃ្មុំ នាព្រឹកថ្ងៃទី២៤ ធ្នូនេះ។
«ប្រតិភូកម្មអំណាចមកច្រើនហើយ ដូច្នេះបើមើលបណ្ណឹងមិនបាន គឺចប់ហើយ មិនចាំបាច់ត្រួតត្រាខេត្តមួយទេ»។ នេះជាការលើកឡើងរបស់សម្ដេច ហ៊ុន សែន ដែលប្រាប់ឱ្យអភិបាលខេត្តត្បូងឃ្មុំ លោក ជាម ច័ន្ទសោភ័ណ្ឌ ប្រឹងយកចិត្តទុកដាក់គ្រប់គ្រងលើផ្សារគំរូព្រំដែន ដំបូងនៅកម្ពុជាមួយនេះ។
លោកនាយករដ្ឋមន្រ្តី ហ៊ុន សែន មិនចង់ឃើញផ្សារគំរូព្រំដែនដំបូងគេនេះ ដួលរលំនោះទេ។ ថ្លែងចំពោះមុខមន្ត្រី និងថ្នាក់ដឹកនាំខេត្តទាំងអស់ ប្រមុខរដ្ឋាភិបាល អះអាងថា ផ្សារគំរូមួយនេះ គឺជាសមិទ្ធផលថ្មីមួយ ដែលសម្រេចបានតាមទិសដៅរដ្ឋាភិបាល ក្នុងការរៀបចំតំបន់ព្រំដែនឱ្យមានសន្តិភាព និងស្ថិរភាព សម្រាប់ពលរដ្ឋ។
«ផ្សារគំរូព្រំដែនកម្ពុជា» ឬ «ផ្សារដារ» ដែលមានទីតាំងនៅតំបន់សេដ្ឋកិច្ចពិសេសថារីត្បូងឃ្មុំ ឃុំដារ ស្រុកមេមត់ ខេត្តត្បូងឃ្មុំ លើផ្ទៃដីទំហំប្រមាណ២ហិកតា ចម្ងាយប្រមាណ៣០០ម៉ែត្រពីព្រំប្រទល់ជាមួយខេត្តតៃនិញ ប្រទេសវៀតណាម។ ផ្សារនេះសាងសង់ឡើង ដោយចំណាយទឹកប្រាក់ជិត២លានដុល្លារអាមេរិក ដែលជាជំនួយរបស់រដ្ឋាភិបាលវៀតណាម។
ផ្សារគំរូព្រំដែនកម្ពុជានេះ ត្រូវបានអនុញ្ញាតឱ្យដាក់លក់តែផលិតផលរបស់កម្ពុជា និងវៀតណាមប៉ុណ្ណោះ ដោយមិនអនុញ្ញាតឱ្យលក់ផលិតប្រទេសដទៃនោះឡើយ។ នេះបើតាមលោកនាយករដ្ឋមន្ត្រី ហ៊ុន សែន ដែលបានរំពឹងថា សក្ដានុពលនៃផ្សារគំរូព្រំដែននេះ នឹងជួយបង្កើនទំហំពាណិជ្ជកម្មភាគីទាំងពីរឱ្យដល់៥ពាន់ដុល្លារអាមេរិក តាមការគ្រោងទុក៕
Tag:
ហ៊ុន សែន
ផ្សារគំរូ
© រក្សាសិទ្ធិដោយ thmeythmey.com