អន្តរជាតិ
ឥណ្ឌូណេស៊ី៖ យ៉ាងហោច២៥នាក់ស្លាប់ក្នុងគ្រោះថ្នាក់រថយន្តធ្លាក់ក្នុងជ្រោះ រូបភាព៖ AP
× មនុស្ស យ៉ាងហោចណាស់ ២៥នាក់ បានបាត់បង់ជីវិត និង១៤នាក់ទៀត រងរបួស នៅក្នុងឧបទ្ទវហេតុឡានធ្លាក់ចូលទៅក្នុងជ្រោះជ្រៅមួយនៅឥណ្ឌូណេស៊ី។ នេះបើតាមការអះអាងពីសំណាក់ក្រុមអ្នកជួយសង្គ្រោះនៅថ្ងៃទី២៤ ខែធ្នូ។
ហេតុការណ៍ធ្លាក់ឡានក្រុង ចូលទៅក្នុងជ្រោះមួយកម្ពស់ ១៥០ម៉ែត្រ នៅក្នុងតំបន់ដាច់ស្រយាលមួយ នៅក្បែរទីក្រុង Pagar Alam ខេត្តស៊ូម៉ាត្រាភាគខាងត្បូង ឥណ្ឌូណេស៊ី បានកើតឡើងនៅថ្ងៃទី២៣ ខែធ្នូ នាវេលាជិតរំលងអធ្រាត។ ឧបទ្ទវហេតុនេះ បានបង្កឲ្យមនុស្សយ៉ាងហោចណាស់ ២៥នាក់បានទទួលមរណភាព ខណៈពេលក្រុមអ្នកជួយសង្គ្រោះ កំពុងស្វែងរកមនុស្សមួយចំនួនទៀត ដែលកំពុងបាត់ខ្លួននៅឡើយ។
ប្រាប់ទីភ្នាក់ងារព័ត៌មាន AFP លោក Dolly Gumara អ្នកនាំពាក្យប៉ូលិសស្រុក បានបញ្ជាក់ថា រថយន្តក្រុង បានបើកបុករនាំងបេតុង មុននឹងធ្លាក់ចូលទៅក្នុងជ្រោះ ហើយមានមនុស្សមួយចំនួន កំពុងជាប់នៅក្នុងរថយន្ត។ រហូតមកទល់ពេលនេះ មន្ត្រីប៉ូលិសមិនទាន់បានបញ្ជាក់ថា ករណីនេះ បណ្តាលមកពីមូលហេតុអ្វីនៅឡើយទេ ប៉ុន្តែ វាទំនងជាបណ្តាលមកពីផ្លូវចោតពេក។
សូមបញ្ជាក់ថា គ្រោះថ្នាក់ចរាចរណ៍ ដែលបានកើតឡើងនៅលើតាមតំបន់កោះក្នុងរដ្ឋអាស៊ីអាគ្នេយ៍មួយនេះ គឺបណ្តាលមកពីបញ្ហារថយន្តចាស់ គ្មានការថែរក្សា ឬត្រួតពិនិត្យត្រឹមត្រូវ និងការមិនគោរពច្បាប់ចរាចរណ៍ជាដើម។
កាលពីមិថុនា គ្រោះថ្នាក់ចរាចរណ៍មួយ បានបង្កឲ្យមនុស្សស្លាប់ ១២នាក់ និងរបួសជាច្រើននាក់ នៅលើកោះជ្វាភាគខាងលិច ដោយសារតែអ្នកដំណើរឈ្លោះគ្នាជាមួយអ្នកបើកឡាន ហើយអ្នកដំណើរ ព្យាយាមទាញចង្កូតឡានពីអ្នកបើកបរ៕
© រក្សាសិទ្ធិដោយ thmeythmey.com