អន្តរជាតិ
រដ្ឋបាលអាកាសចរណ៍អាមេរិក ព្រមានក្រុមហ៊ុនហោះហើរពីលទ្ធភាពដែលកូរ៉េខាងជើងសាកល្បងមីស៊ីល រូបភាព KCNA
× រដ្ឋបាលអាកាសចរស៊ីវិលរបស់អាមេរិក បានព្រមានក្រុមហ៊ុនអាកាសចរណ៍នានាឲ្យប្រុងប្រយ័តន្ន ខណៈកូរ៉េខាងជើង អាចសាកល្បងមីស៊ីលបាលីស្ទិកចម្ងាយឆ្ងាយរបស់ខ្លួននៅពេលឆាប់ៗខាងមុខនេះ។ ការលើកឡើងបែបនេះ ធ្វើឡើងក្រោយកូរ៉េខាងជើងគំរាមថា ផ្ដល់អំណោយដល់អាមេរិក ប្រសិនបើអាមេរិក នៅតែមិនផ្លាស់ប្តូររបៀបវារៈចរចារបស់ខ្លួននៅដំណាច់ឆ្នាំ២០១៩នេះ។ អំណោយនោះ ត្រូវគេជឿថា ជាការសាកល្បងមីស៊ីល។
តាមការផ្សាយរបស់សារព័ត៌មានABC ថ្ងៃទី២៣ ខែធ្នូ ដែលស្រង់ចេញពីរដ្ឋបាលអាកាសចរសហព័ន្ធអាមេរិក កូរ៉េខាងជើង អាចសាកល្បងមីស៊ីលចម្ងាយឆ្ងាយនៅចុងឆ្នាំ ២០១៩នេះ ឬ ដើមឆ្នាំ ២០២០ខាងមុខ។ តាមរបាយការណ៍ កូរ៉េខាងជើង ក៏អាចសាកល្បងគ្រាប់រ៉ុក្កែតប្រើថាមពលឥន្ធនៈ ឬមីស៊ីលបាលីស្ទិកដែលបាញ់ចេញពីសមុទ្រផងដែរ។
បើតាមទីក្រុងព្យុងយ៉ាង ខ្លួនអាចលុបចោលការសាកល្បងនុយក្លេអ៊ែរ និងមីស៊ីលបាលីស្ទិកអន្តរទ្វីប ដរាបណា ទីក្រុងវ៉ាស៊ីនតោន យល់ព្រមកែប្រែរបៀបវារៈរបស់ខ្លួន នៅដំណាច់ឆ្នាំ ២០១៩នេះ ដើម្បីបន្តកិច្ចចរចារំសាយកម្មវិធីនុយក្លេអ៊ែរ។ ក្នុងន័យនេះ បើអាមេរិកនៅតែផ្គើនដាក់កូរ៉េខាងជើង អាមេរិក អាចទទួលការដូបុណ្យណូអែល បែបណាក៏បាន បើខ្លួនពេញចិត្ត។ ពិតណាស់ កូរ៉េខាងខាងជើង ទំនងជាអាចសាកល្បងមីស៊ីលបាលីស្ទិកអន្តរទ្វីបរបស់ខ្លួនឡើងវិញ នៅដំណាច់ឆ្នាំ ២០១៩នេះ។
ថ្មីៗនេះ ប្រមុខដឹកនាំ គីម ជុងអ៊ុន ក៏ដឹកនាំកិច្ចប្រជុំយោធាជាន់ខ្ពស់ដើម្បីពង្រឹងសមត្ថភាពកងទ័ព និងជជែកលើបញ្ហាសំខាន់ទាំងក្នុងស្រុក និងក្រៅស្រុក។ ប៉ុន្មានថ្ងៃទៀត បក្សពលករកូរ៉េ ក៏នឹងបើកកិច្ចប្រជុំរបស់ខ្លួនដើម្បីពិភាក្សាពីបញ្ហានានា និងដាក់ទិសដៅឆ្នាំថ្មី។ អ្វីដែលគេរំពឹងនោះ គឺកូរ៉េខាងជើងអាចប្រកាសបញ្ចប់ការផ្អាកការសាកល្បងនុយក្លេអ៊ែររបស់ខ្លួនផងដែរ។
សូមបញ្ជាក់ថា ទីក្រុងព្យុងយ៉ាង បានបើកការសាកល្បងសំខាន់ៗពីរលើកនៅមជ្ឈមណ្ឌលបាញ់បង្ហោះផ្កាយរណប Sohae នារយៈពេលថ្មីៗនេះ។ ការណ៍នេះ ត្រូវបានអ្នកជំនាញ គិតថាទីក្រុងព្យុងយ៉ាង អាចសាកល្បងម៉ាស៊ីនប៉ាញ់គ្រាប់រ៉ុក្កែតសម្រាប់ជាជំនួយក្នុងការបាញ់មីស៊ីលបាលីស្ទិកអន្តរទ្វីបចម្ងាយឆ្ងាយ។
Tag:
អាមេរិក
កូរ៉េខាងជើង
© រក្សាសិទ្ធិដោយ thmeythmey.com