អន្តរជាតិ
ចិន រិះគន់អាមេរិកបង្កើតទ័ពអវកាស លោក Geng Shuang អ្នកនាំពាក្យក្រសួងការបរទេសចិនក្នុងសន្និសីទសារព័ត៌មានថ្ងៃទី២៣ ខែធ្នូ។ រូបថតពីវេបសាយក្រសួងការបរទេសចិន
× ទីក្រុងប៉េកាំង នៅថ្ងៃទី២៣ ខែធ្នូ ចេញមុខរិះគន់ការបង្កើតទ័ពអវកាសរបស់អាមេរិក ដោយចាត់ទុកជាការធ្វើយោធូបនីយកម្មទីលំហដើម្បីប្រយោជន៍ផ្ទាល់ខ្លួន។ អ្នកនាំពាក្យក្រសួងការបរទេសចិន ចាត់ទុកការបង្កើតអង្គភាពទ័ពថ្មីនេះ ជាការបំផ្លាញតុល្យភាពយុទ្ធសាស្ត្រពិភពលោក។ ឯការយកចិន និងរុស្ស៊ីដើម្បីជាលេសពង្រឹងអំណាចយោធាដោយអាមេរិក ក៏ជារឿងមិនត្រឹមត្រូវដែរ ខណៈចិននឹងបន្តអនុវត្តគំនិតសន្តិភាពនិយមនៅទីលំហដដែល។
ការបង្កើតកម្លាំងទ័ពអវកាស ដែលជាអង្គភាពទ័ពទី៦ របស់យោធាអាមេរិក ធ្វើឲ្យចិនមិនសប្បាយចិត្តឡើយ។ អង្គភាពទ័ពនេះ ត្រូវលេចជារូបរាងក្រោមច្បាប់ថវិកាការពារជាតិឆ្នាំ២០២០ ដែលលោកប្រធានាធិបតី ដូណាល់ ត្រាំ ចុះហត្ថលេខាដាក់ឲ្យប្រើកាលពីចុងសប្ដាហ៍មុន។ គោលដៅសំខាន់របស់អង្គភាពទ័ពថ្មីនេះ គឺការពារប្រយោជន៍អាមេរិក និងឥទ្ធិពលអាមេរិកនៅទីលំហដែលរងការគំរាមកំហែងដោយរុស្ស៊ី និងចិន។
លោក Geng Shuang អ្នកនាំពាក្យក្រសួងការបរទេសចិន បានរិះគន់អាមេរិកដែលប្រឹងពង្រឹងយុទ្ធសាស្ត្រអនុត្តរភាពលំហអាកាស ហើយកំពុងតែធ្វើឲ្យទីលំហក្លាយជាទីតាំងប្រកួតប្រជែងអាវុធទៀតផង។ ក្នុងសន្និសីទសារព័ត៌មានថ្ងៃទី២៣ ខែធ្នូ លោក Geng Shuang បន្តថា សកម្មភាពបែបនេះ បានបំពានការមូលមតិជាទូទៅដែលចាត់ទុកលំហអាកាសជាតំបន់សម្រាប់គោលដៅសន្តិភាព ហើយវាក៏ធ្វើឲ្យប៉ះពាល់តុល្យភាពសាកល បង្កការគំរាមដល់សន្តិភាព និងសន្តិភាពលំហអាកាសខាងក្រៅ។
«ចិន បារម្ភជាខ្លាំង និងប្រឆាំងដាច់ខាត។» នេះជាការបញ្ជាក់របស់អ្នកនាំពាក្យក្រសួងការបរទេសចិនទៅនឹងសំណួររបស់អ្នកកាសែតដែលចង់ដឹងពីជំហររបស់ចិនក្រោយអាមេរិកបង្កើតទ័ពអវកាស។ មន្ត្រីដដែលបន្តថា សម្រាប់សន្តិសុខទីលំហ អាមេរិកគិតតែពីសន្តិសុខខ្លួនប៉ុណ្ណោះ ខណៈគោលដៅសហគមន៍អន្តរជាតិ គឺការពារសន្តិសុខមនុស្សគ្រប់រូបនៅលំហខាងក្រៅនេះ។
អ្នកនាំពាក្យរូបនេះ ក៏បន្តរិះគន់អាមេរិកដែលយកឈ្មោះចិន និងរុស្ស៊ីដើម្បីសម្រេចគោលដៅរបស់ខ្លួន។ លោក Geng Shuang ចាត់ទុកទង្វើរបស់អាមេរិក ជាការទម្លាក់កំហុសលើអ្នកស្លូតត្រង់ ហើយយករួចខ្លួនតែឯង។
ទន្ទឹមនឹងការប្រតិកម្មនឹងអាមេរិក លោក Geng Shuang ក៏ប្រកាសពីជំហរបស់ចិនក្នុងការធានាសន្តិភាពនៅលំហអាកាស។ អ្នកនាំពាក្យរូបនេះបញ្ជាក់ថា ចិនឈរខាងការប្រើប្រាស់ដោយសន្តិភាពលំហខាងក្រៅ ហើយប្រឆាំងការរត់ប្រណាំងសព្វាវុធ។ ដោយមិននិយាយចំឈ្មោះអាមេរិក មន្ត្រីក្រសួងការបរទេសចិនដដែល បានអំពាវនាវឲ្យប្រទេសនានាអនុវត្តឲ្យត្រឹមត្រូវការការពារសន្តិភាពយូរអង្វែងនៅទីលំហ និងធានាថា ទីលំហមិនក្លាយជាសមរភូមិថ្មីឡើយ៕
© រក្សាសិទ្ធិដោយ thmeythmey.com