ភ្នំពេញ៖ មានការកត់សម្គាល់ថា ភាពយន្តខ្មែរហាក់មិនទាន់មានគុណភាពប្រកួតប្រជែងភាពយន្តបរទេស ឬមិនទាន់ដណ្ដើមបានទីផ្សារធំនៅឡើយ។ លោក ប៉ាន់ រិទ្ធី ស្ថាបនិកមជ្ឈមណ្ឌលបុប្ផាណា និងជាផលិតករភាពយន្តដ៏ល្បី បានលើកឡើងថា ឧស្សាហកម្មភាពយន្តរបស់កម្ពុជា ត្រូវការបង្កើនគុណភាពបន្ថែម ការរកដៃគូរបរទេស និងការជួយពីរដ្ឋាភិបាលផងដែរ។
សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក ប៉ាន់ រិទ្ធី ដូចតទៅនេះ៖
ចំណុចសំខាន់នៃការលើកកម្ពស់ភាពយន្តរបស់ខ្មែរ គឺការបង្កើនគុណភាព ដែលនិយាយទៅដល់ ការតែងនិពន្ធរឿង ការដឹកនាំរឿង តួសម្ដែង និងបច្ចេកទេសថត។ លោក ប៉ាន់ រិទ្ធី មិនចាត់ទុកលុយជាធនធានអាទិ៍ភាពបំផុតក្នុងការធ្វើឲ្យភាពយន្តមួយល្អនោះទេ ហើយភាពយន្តខ្មែរ ត្រូវតែមានភាពពិសេសដាច់ដោយឡែកពីភាពយន្តបរទេស ទើបចាប់យកចំណែកទីផ្សារបានប្រសើរ។
«លុយជួនកាលធ្វើចេញមកភាគច្រើនអត់ល្អដែរ គឺការនិពន្ធរឿង សម្ដែងល្អ គំនិត ការស្រមៃ ធ្វើរូបម៉េចឲ្យស្អាត អ្វីជាអត្តសញ្ញាណរបស់វា បើទិញពីយើងរឿងកាប់ចាក់ដដែលទិញអាមេរិកវិញល្អជាង បើទិញកុនខ្មែរទាល់តែមានអ្វីពិសេសក្នុងហ្នឹង»។ លោក ប៉ាន់ រិទ្ធី គូសបញ្ជាក់បែបនេះ។
លោកថ្លែងដូច្នេះទៀតថា៖«ដូចខ្ញុំធ្វើរឿងកង្វះរូបភាព គឺធ្វើពីដីឥដ្ឋហ្នឹង អត់ទាំងមានតួរផងហ្នឹង អត់ទាំងមានanimationផងហ្នឹង ក៏មនុស្សមើលដែរ។ អ៊ីចឹងបើគំនិតយើងល្អ យើងចេះដឹកនាំ ចេះដាក់កាមេរ៉ាកន្លែងល្អ ចេះវ៉ៃភ្លើងល្អ ធ្វើចេញហើយ។ គំនិតល្អរកលុយមកធ្វើបានហើយ»។ ហើយបើមានលុយតែអត់គំនិត គឺធ្វើបានមួយគឺបិទហើយ»។
ផលិតករភាពយន្តដ៏ល្បីរូបនេះ ប្រាប់ថា បច្ចេកទេសផលិតភាពយន្តរបស់កម្ពុជា នៅចាញ់ថៃនិងប្រទេសផ្សេងទៀតឆ្ងាយ តែមានចំណុចពិសេសផ្សេងពីគេ គឺនៅត្រង់វប្បធម៌និងប្រជាពលរដ្ឋ។ លោកបន្តដូច្នេះទៀតថា៖«គុណភាពនៅស្រុកខ្មែរមិនមែនសម្ភារៈអ្វីទេ គឺប្រជាពលរដ្ឋខ្មែរ ខ្ញុំបានស៊ើបសួរគេហើយថាហេតុអ្វីអ្នកឯងចូលចិត្តមកថតនៅស្រុកខ្មែរ គឺមកពីពលរដ្ឋខ្មែរ ចេះរួសរាយរាក់ទាក់ ពូកែផលិតពូកែច្នៃ»។
លោកគាំទ្រឲ្យផលិតករខ្មែរ ចាប់ដៃជាមួយក្រុមហ៊ុនបរទេស ក្នុងការវិនិយោគផលិតភាពយន្ត ដើម្បីប្រកួតប្រជែងក្នុងទីផ្សារអន្តរជាតិ។ ហើយដើម្បីទាញក្រុមហ៊ុនភាពយន្តមកផលិតក្នុងស្រុកបាន កម្ពុជាត្រូវមានស្ថេរភាព មានផ្លូវ មានសណ្ឋាគារ ហើយមានធនធានមនុស្សក្នុងវិស័យនេះមួយចំនួន ដែលជារួមគឺមានភាពងាយស្រួលដល់អ្នកមកផលិតកុន។ ប្រាង្គប្រាសាទ និងទេសភាពធម្មជាតិស្រុកស្រែជាដើម ក៏ជាចំណុចទាក់ទាញ់ឲ្យក្រុមហ៊ុនបរទេសចូលមកផលិតនៅកម្ពុជាផងដែរ។
មួយផ្នែក វិស័យភាពយន្តត្រូវការជួយពីរដ្ឋាភិបាល។ លោក ប៉ាន់ រិទ្ធី ថ្លែងដូច្នេះថា«(ស្ថាប័នពាក់ព័ន្ធ)ត្រូវសិក្សារកមធ្យោបាយថាតើកូរ៉េ និងអាស៊ានជាដើម គេជួយកុនរបស់គេដូចម្ដេច អាចថាជួយអនុគ្រោះពន្ធជាដើម»។
លោក ប៉ាន់ រិទ្ធី គឺជាស្ថាបនិកមជ្ឈមណ្ឌលបុប្ផាណា និងជាផលិតករភាពយន្តល្បីមួយរូប។ ភាពយន្តដែលលោកផលិត និងទទួលបានការគាំទ្រខ្លាំង ភាគច្រើនគឺរឿងទាក់ទងនឹងរបបខ្មែរក្រហម ដូចជារឿងកង្វះរូបភាព ឬ the missing picture និងរឿងផ្នូរគ្មានឈ្មោះ ដែលបានចូលរួមប្រកួតប្រជែងពានរង្វាន់ Oscar ៕