អន្តរជាតិ
លោក មូន ជំរុញលោក អាបេ ឲ្យដកចោលការរឹតត្បិតលើនាំចេញសារធាតុកម្រទៅកូរ៉េខាងត្បូង ប្រធានាធិបតីកូរ៉េខាងត្បូង មូន ចេអ៊ីន ចាប់ដៃនាយករដ្ឋមន្រ្តីជប៉ុន ស៊ិនហ្សូ អាបេ នាជំនួបនៅទីក្រុង Chengdu ។ រូបភាព AFP
× ក្នុងជំនួបមួយទល់នឹងមួយរយៈពេលជិត ១ម៉ោងនៅទឹកដីចិន នាថ្ងៃទី២៤ ខែធ្នូ ប្រធានាធិបតីកូរ៉េខាងត្បូង លោក មូន ចេអ៊ីន បានជំរុញឲ្យនាយករដ្ឋមន្ត្រីជប៉ុន ស៊ិនហ្សូ អាបេ ដកចោលការរឹតត្បិតលើការនាំចេញធាតុកម្របីប្រភេទមកកូរ៉េខាងត្បូង។ បើតាមលោក មូន ចេអ៊ីន ទំនាក់ទំនងពាណិជ្ជកម្មរវាងទីក្រុងតូក្យូ និងទីក្រុងសេអ៊ូល គួរតែវិលទៅរកភាពប្រក្រតីវិញ។
តាមរយៈជំនួបលើកទីមួយ ក្នុងរយៈពេល ១៥ខែកន្លងមកនេះ លោក មូន ចេអ៊ីន ប្រធានាធិបតីកូរ៉េខាងត្បូង បានទទូចឲ្យ ស៊ិនហ្សូ អាបេ នាយករដ្ឋមន្ត្រីជប៉ុន លុបចោលការរឹតត្បិតលើការនាំចេញធាតុកម្រ ៣ប្រភេទ ទៅកូរ៉េខាងត្បូង ឲ្យកាន់តែឆាប់រហ័ស ដើម្បីឲ្យស្ថានភាពទំនាក់ទំនងពាណិជ្ជកម្មរវាងប្រទេសទាំងពីរ វិលទៅរកភាពប្រក្រតីវីញ។ ពោលគឺ ឲ្យដូចមុនថ្ងៃទី១ ខែសីហា មុនពេល ដែលទីក្រុងតូក្យូ បានរឹតត្បិតលើការនាំចេញធាតុកម្របីប្រភេទទៅកូរ៉េខាងត្បូង។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ជាមួយគ្នានេះ លោកមូន ក៏បានស្នើឲ្យមានកិច្ចពិភាក្សាថ្នាក់មន្ត្រី ឲ្យកាន់តែឆាប់រហ័សផងដែរ លើបញ្ហាពាណិជ្ជកម្មរវាងប្រទេសទាំងពីរ។
ចំណែកបញ្ហាប្រាក់សំណងលើថ្លៃជនរងគ្រោះកូរ៉េខាងត្បូង ដែលត្រូវបានគេបង្ខំឲ្យធ្វើការក្នុងសម័យអាណានិគម មេដឹកនាំប្រទេសទាំងពីរ ក៏បានអះអាងថា មានយល់ផ្សេងគ្នាផងដែរ។ បើតាមលោកស្រី Ko Min-jung អ្នកនាំពាក្យវិមានប្រធានាធិបតីកូរ៉េខាងត្បូង Cheong Wa Dae ដើម្បីដោះស្រាយបញ្ហានេះ កូរ៉េខាងត្បូង និងជប៉ុន យល់ព្រមដោះស្រាយបញ្ហាទាំងនេះតាមរយៈកិច្ចចរចាជាមួយគ្នា។
ក្រៅពីបញ្ហាជម្លោះពាណិជ្ជកម្ម មេដឹកនាំប្រទេសទាំងពីរ ក៏បានជជែកពិភាក្សា ពីបញ្ហាស្នូលនៅលើឧបទ្វីបកូរ៉េផងដែរ។ ក្នុងនោះលោក អាបេ បានស្នើឲ្យកូរ៉េខាងត្បូង គាំទ្ររដ្ឋាភិបាលរបស់លោកជុំវិញបញ្ហាការចាប់ខ្លួនជនជាតិជប៉ុនពីសំណាក់កូរ៉េខាងជើង ក្នុងរយៈពេលប៉ុន្មានទសវត្សរ៍មុន ហើយលោកមូន ក៏បានសន្យាគាំទ្របញ្ហានេះដែរ។
សូមបញ្ជាក់ថា បើទោះបីជាកូរ៉េខាងត្បូង និងជប៉ុន មានជម្លោះពាណិជ្ជកម្មជាមួយគ្នាក៏ពិតមែន ប៉ុន្តែប្រទេសទាំងពីរ មិនបានធ្វើឲ្យបាក់បែកសម្ពន្ធមិត្តរបស់ខ្លួនឡើយ។ ជាក់ស្តែងកូរ៉េខាងត្បូង បានប្រកាសផ្អាកការអស់សុពលភាពនៃកិច្ចព្រមព្រៀងព័ត៌មានសន្តិសុខយោធាទូទៅ (GSOMIA) ជាមួយជប៉ុនវិញដោយភ្ជាប់ជាមួយលក្ខខណ្ឌ។ កាលពីសប្តាហ៍មុន ជប៉ុន ក៏បានបន្ធូរបន្ថយ ការនាំចេញផលិតផលមួយចំនួនទៅកូរ៉េខាងត្បូងវិញផងដែរ៕
Tag:
ជប៉ុន
កូរ៉េខាងត្បូង
© រក្សាសិទ្ធិដោយ thmeythmey.com