អន្តរជាតិ
អតីតទីប្រឹក្សាសន្តិសុខលោក ត្រាំ៖ គោលនយោបាយលើបញ្ហាកូរ៉េខាងជើង បរាជ័យហើយ អតីតទីប្រឹក្សាសន្តិសុខជាតិអាមេរិក លោក ចន ប៊ូលតុន, រូបភាព៖ Yonhap
× អតីតទីប្រឹក្សាសន្តិសុខជាតិអាមេរិក លោក ចន ប៊ូលតុន នៅថ្ងៃទី ២៣ ខែធ្នូ បានលើកឡើងថា គោលនយោបាយអាមេរិកលើកូរ៉េខាងជើង ជុំវិញបញ្ហារំសាយកម្មវិធីនុយក្លេអ៊ែរ កំពុងតែទទួលបរាជ័យ ហើយអាមេរិកត្រូវតែទទួលស្គាល់ពីបញ្ហានេះ។ ទន្ទឹមគ្នានេះ លោក ប៊ូលតុន ក៏បានព្រមានផងដែរ ការគំរាមកំហែងរបស់ទីក្រុងព្យុងយ៉ាងទៅលើកងទ័ពអាមេរិក និងសម្ពន្ធមិត្តនៅក្នុងតំបន់ អាចកើតឡើងក្នុងពេលឆាប់ៗខាងមុខ។
សរសេរនៅលើបណ្តាញសង្គម Twitter លោក ចន ប៊ូលតុន អតីតទីប្រឹក្សាសន្តិសុខជាតិអាមេរិក បានគូសបញ្ជាក់ថា កងទ័ពអាមេរិក ក៏ដូចជាសម្ពន្ធមិត្ត អាចប្រឈមនឹងគ្រោះថ្នាក់ ក្នុងពេលឆាប់ៗខាងមុខ។ អតីតទីប្រឹក្សាលោក ដូណាល់ ត្រាំ រូបនេះក៏ស្នើឲ្យអាមេរិក ត្រូវតែកែប្រែគោលនយោបាយរបស់ខ្លួនឲ្យកាន់តែមានប្រសិទ្ធភាព នៅចំពោះមុខកូរ៉េខាងជើង មុនពេលប្រទេសមួយនេះ មានអាវុធទំនើបៗ ដែលអាចគំរាមកំហែងដល់ដែនដីរបស់អាមេរិក។
ក្នុងន័យនេះ លោកជំរុញឲ្យអាមេរិក ផ្លាស់ប្តូរគោលនយោបាយរបស់ខ្លួនជាបន្ទាន់ បើមិនចង់ឲ្យកងទ័ព និងសម្ព័ន្ធមិត្តរបស់ខ្លួន ជួបគ្រោះថ្នាក់ផ្សេងៗ ដែលបង្កដោយទីក្រុងព្យុងយ៉ាង។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ក្រៅពីការសរសេរលើTwitter នាកិច្ចសម្ភាសជាមួយសារព័ត៌មានអាមេរិក Axios នៅថ្ងៃទី ២៣ ខែធ្នូ លោក ប៊ូលតុន បានអះអាងថា អាមេរិក គ្មានបំណងបញ្ឈប់មហិច្ឆតាកូរ៉េខាងជើង ក្នុងការក្លាយជាមហាអំណាចនុយក្លេអ៊ែរទេ។ បើតាមអតីតទីប្រឹក្សាអាមេរិករូបនេះ ប្រសិនបើទីក្រុងវ៉ាស៊ីនតោន មានចេតនាចង់បញ្ចប់កម្មវិធីនុយក្លេអ៊ែររបស់ក្រុងព្យុងយ៉ាងមែននោះ អាមេរិក អាចប្រើប្រាស់គោលនយោបាយផ្សេងពីនេះ។
ក្នុងកិច្ចសម្ភាសដដែលនេះ លោក ប៊ូលតុន ត្រូវបានគេចោទសួរថា តើកូរ៉េខាងជើងអាចសាកល្បងដ៏សំខាន់ នៅពេលផុតកំណត់ឱសានវាទដែរឬទេ។ ទាក់ទងនឹងបញ្ហានេះ អតីតទីប្រឹក្សាជាតិអាមេរិក បាននិយាយថា អាមេរិកគួរតែទទួលស្គាល់កំហុសរបស់ខ្លួនថា គោលនយោបាយអាមេរិកទទួលបរាជ័យហើយ។
សូមបញ្ជាក់ថា កិច្ចចរចារំសាយកម្មវិធីនុយក្លេអ៊ែររវាងអាមេរិក និងកូរ៉េខាងជើង បានទទួលបរាជ័យជាបន្តបន្ទាប់ ពោលគឺចាប់តាំងពីជំនួបលើកទីមួយ រវាងលោក ដូណាល់ ត្រាំ និងលោក គីមជុងអ៊ុន នៅសិង្ហបុរី រហូតដល់ កិច្ចចរចាថ្នាក់មន្ត្រីនាប្រទេសស៊ុយអ៊ែត។ ជាពិសេសមួយរយៈចុងក្រោយនេះ ទំនាក់ទំនងរវាងទីក្រុងវ៉ាស៊ីនតោន និងទីក្រុងព្យុងយ៉ាង បានប្រឈមភាពតានតឹងដាក់គ្នាឡើងវិញ ដោយសារតែបញ្ហាសិទ្ធិមនុស្ស ការកៀកថ្ងៃឱសានវាទរបស់កូរ៉េខាងជើងជាដើម ៕
Tag:
អាមេរិក
កូរ៉េខាងជើង
© រក្សាសិទ្ធិដោយ thmeythmey.com