អន្តរជាតិ
យន្តហោះចម្បាំងរុស្ស៊ី Su-57 ធ្លាក់អំឡុងពេលហោះសាកល្បង យន្តហោះចម្បាំងរុស្ស៊ី Su-57 (ប្រភពរូប៖ RT)
× យន្តហោះចម្បាំង Sukhoi Su-57 របស់រុស្ស៊ី បានធ្លាក់អំឡុងពេលធ្វើបេសកកម្មហ្វឹកហ្វឺន នៅថ្ងៃអង្គារ ២៤ ខែធ្នូ នៅភូមិភាគចុងបូព៌ានៃប្រទេសនេះ។ ក៏ប៉ុន្តែ របាយការណ៍ បញ្ជាក់ថា អ្នកបើកបរយន្តហោះចម្បាំងទំនើបផុតលេខនេះ ពុំមានគ្រោះថ្នាក់អ្វីឡើយ។
ហោះបានចម្ងាយ១១១ គីឡូម៉ែត្រពីទីលានសាកល្បងហោះហើរក្បែរទីក្រុង Komsomolsk-on-Amur យន្តហោះចម្បាំង Su-57 បានដាំក្បាលចុះក្រោម។ នេះបើតាមការបញ្ជាក់របស់សាជីវកម្មយន្តហោះរុស្ស៊ី (UAC) ក្នុងសេចក្តីថ្លែងការណ៍មួយ ដែលទីភ្នាក់ងារព័ត៌មានរដ្ឋរុស្ស៊ី RIV Novosti ទទួលបាន។ យ៉ាងណាមិញ មិនមានរបាយការណ៍អំពីការស្លាប់និងការខូចខាតនៅលើដីទេ។
យន្តហោះបំបាំងកាយជំនាន់ទី៥ ដែលជាកម្មសិទ្ធិរបស់ក្រុមហ៊ុន Sukhoi នេះ កំពុងត្រូវបានសាកល្បងដោយជនស៊ីវិលនៅពេលនោះ។ តាមទីភ្នាក់ងារព័ត៌មានយោធារុស្ស៊ី TASS ក្រសួងការពារជាតិ នឹងបង្កើតគណៈកម្មការមួយដើម្បីបើកការស៊ើបអង្កេតលើឧបទ្ទវហេតុនេះ ដែលមើលទៅទំនងជាបង្កឡើងដោយសារបញ្ហាប្រព័ន្ធចង្កូត។
យន្តហោះ Su-57 ដែលបានធ្លាក់នេះ គឺជាយន្តហោះមួយគ្រឿងក្នុងចំណោមយន្តហោះដំបូងគេដែលត្រូវបានផលិតទ្រង់ទ្រាយធំ ហើយគ្រោងប្រគល់ទៅឲ្យកងទ័ពអាកាសរុស្ស៊ីក្នុងសប្តាហ៍នេះ។ យន្តហោះ Su-57 ដែលបានហោះហើរលើកដំបូងកាលពីឆ្នាំ ២០១០ គឺជាយន្តហោះចម្បាំងទំនើបបំផុតរបស់រុស្ស៊ី។ វា មានសមត្ថភាពបំបាំងកាយនិងដឹកឧបករណ៍និងអាវុធទំនើបៗ។ យន្ដហោះមានម៉ាស៊ីនភ្លោះនេះ ត្រូវបានរចនាឡើងដោយក្រុមហ៊ុន Sukhoi ដើម្បីប្រកួតប្រជែងជាមួយយន្តហោះបំបាំងកាយ F-22 Raptor របស់សហរដ្ឋអាមេរិក។
យន្តហោះស៊េរីទំនើបផុតលេខ Su-57 របស់រុស្ស៊ី ធ្លាប់ត្រូវបានសាកល្បងដោយជោគជ័យនៅប្រទេសស៊ីរី ។ ការធ្លាក់យន្តហោះលើកនេះដែរ គឺជាការបាត់បង់ដំបូងរបស់យន្តហោះ Su-57 ដែលក្នុងនោះ ១០ គ្រឿងត្រូវបានសាងសង់នៅឯរោងចក្ររបស់ Sukhoi ក្នុងទីក្រុងចុងបូព៌ា Komsomolsk-on-Amur សម្រាប់ការសាកល្បងមុនផលិតកម្ម និងវាយតម្លៃសមត្ថភាពប្រយុទ្ធ។ កងទ័ពអាកាសរុស្ស៊ី បានបញ្ជាទិញយន្តហោះប្រភេទនេះចំនួន ៧៦ គ្រឿងដែលត្រូវប្រគល់ឲ្យនាឆ្នាំ ២០២៨ ៕
Tag:
រុស្ស៊ី
យន្តហោះចម្បាំង
Su-57
© រក្សាសិទ្ធិដោយ thmeythmey.com