អត្ថបទពាណិជ្ជកម្ម
សាលាបឋមសិក្សាចំនួន៣នៅភ្នំពេញ និងខេត្តកណ្តាល ត្រូវបានទទួលស្គាល់ជាសាលាគំរូ ក្នុងកម្មវិធីអប់រំចំណេះដឹងផ្នែកហិរញ្ញវត្ថុសម្រាប់សិស្ស
×![]()
ដោយ: ថ្មីៗ
ភ្នំពេញ ថ្ងៃទី ២៦ ខែធ្នូ ឆ្នាំ ២០១៩៖ សាលាបឋមសិក្សាចំនួន៣ នៅរាជធានីភ្នំពេញ និងខេត្ត កណ្តាល ត្រូវបានទទួលស្គាល់ជាសាលាគំរូ ដោយមានស្នាដៃដ៏ល្អ ក្នុងការបង្រៀនជំនាញចំណេះដឹងហិរញ្ញវត្ថុមូលដ្ឋាន ដល់សិស្សរបស់ខ្លួន តាមរយៈការអនុវត្តកម្មវិធី ឆា-ឈីង (Cha-Ching Money Smart Kids)។ កម្មវិធីនេះ រៀបចំឡើងដោយ ក្រុមហ៊ុនព្រូដិនសលកម្ពុជា និងមូលនិធិព្រូដិនស៍ ដែលជាដៃគូអភិវឌ្ឍន៍សហគមន៍ របស់ក្រុមហ៊ុនព្រូដិនសល ក្នុងទ្វីបអាស៊ី និងអាហ្វ្រិក។
ពិធីអបអរសាទរសាលារៀនជ័យលាភី ដែលបានរៀបចំឡើងនៅមជ្ឈមណ្ឌល ដាយកូនៀ (Diakonia Center) កាលពីថ្ងៃទី២៣ ខែធ្នូនេះ មានការចូលរួមពីមន្ត្រីក្រសួងអប់រំ យុវជន និងកីឡា នាយក-នាយិកាសាលា និងលោកគ្រូ អ្នកគ្រូ ព្រមទាំងអ្នកតំណាងក្រុមហ៊ុន ព្រូដិនសលកម្ពុជា និងមូលនិធិព្រូដិនស៍ និងអ្នកតំណាង អង្គការមូលនិធិសិទ្ធិកុមារ។
សាលារៀនចំនួន៣ ត្រូវបានជ្រើសរើស និងទទួលស្គាល់ដោយមន្ត្រីក្រសួងអប់រំ យុវជន និងកីឡា ដោយផ្អែកលើអត្ថប្រយោជន៍ និងការគាំទ្រដល់សិស្សរបស់ខ្លួន ដែលទទួលបានតាមរយៈការអនុវត្តកម្មវិធី ឆា-ឈីង ដើម្បីជួយអភិវឌ្ឍជំនាញចំណេះដឹងផ្នែកហិរញ្ញវត្ថុរបស់ពួកគេបន្ថែមទៀត។
កម្មវិធី ឆា-ឈីង«Cha-Ching Money Smart Kids» គឺជាកម្មវិធីអប់រំហិរញ្ញវត្ថុ ដែលទទួលបានពានរង្វាន់ និងជាកម្មវិធីដែលបង្រៀនក្មេងៗ អំពីជំនាញជាមូលដ្ឋាននៃការគ្រប់គ្រងសាច់ប្រាក់។ កម្មវិធីនេះ មានតួអង្គជាគំនូជីវចលចំនួន៦នាក់ ក្នុងក្រុមតន្ត្រីមួយដែលផ្សព្វផ្សាយ ពីមូលដ្ឋានគ្រឹះហិរញ្ញវត្ថុចំនួន៤ រួមមានការរកលុយ ការសន្សំ ការចំណាយ និងការបរិច្ចាគ តាមរយៈបទចម្រៀងដ៏គួរឱ្យចាប់អារម្មណ៍ជាច្រើនបទ។
កម្មវិធី ឆា-ឈីង ផ្តល់នូវសម្ភារសិក្សា និងអនុវត្តដល់ លោកគ្រូ អ្នកគ្រូ និងឪពុក ម្តាយ ដើម្បីជួយបង្រៀន សិស្សានុសិស្ស កូនៗរបស់ពួកគេ ឱ្យចេះអំពីរបៀបចំណាយថវិកា។ កម្មវិធីនេះ ក៏ត្រូវបានណែនាំដល់សាលារៀនជាច្រើនផ្សេងទៀត តាមរយៈកម្មវិធីអប់រំ ដែលមានបុគ្គលិកស្ម័គ្រចិត្ត មកពីក្រុមហ៊ុនព្រូដិនសលកម្ពុជា ចូលរួមដោយផ្ទាល់ជាមួយនិស្សិត ដែលជារឿយៗ មានការស្លៀកពាក់សំលៀកបំពាក់ជាតួអង្គគំនូរជីវចល ឆា-ឈីង ផងដែរ។
លោកស្រី ស៊ាង លក្ខិណា ប្រធានត្រួតពិនិត្យជាន់ខ្ពស់ផ្នែកការងារអភិវឌ្ឍន៍សហគមន៍ និងការឧបត្ថម្ភ នៃក្រុមហ៊ុនព្រូដិនសលកម្ពុជា បានមានប្រសាសន៍ថា៖«យើងមានមោទកភាពក្រៃលែងចំ ពោះកម្មវិធី ឆា-ឈីង និងការឆ្លើយតបជាវិជ្ជមាន និងការសាទរពីសិស្សានុសិស្ស ឪពុកម្តាយ និងលោកគ្រូ អ្នកគ្រូ។ យើងក៏សូមថ្លែងអំណរគុណយ៉ាងជ្រាលជ្រៅ ចំពោះការគាំទ្រពីក្រសួងអប់រំ យុវជន និងកីឡា ក្នុងការដាក់ឱ្យដំណើការកម្មវិធីនេះ នៅតាមសាលារដ្ឋនៅកម្ពុជា។ ពួកគេបានចូលរួមចែករំលែកទស្សនៈជាមួយពួកយើងថា ចំណេះដឹងអក្ខរកម្មហិរញ្ញវត្ថុ និងជំនាញនៃការគ្រប់គ្រងថវិកា គឺមានសារៈសំខាន់ខ្លាំងណាស់ សម្រាប់កុមារនៅថ្នាក់បឋមសិក្សា និងអាចផ្ដល់អនាគតដ៏រុងរឿងមួយដល់ពួកគេ នៅពេលដែលពួកគេរកចំណូល ចំណាយ សន្សំ និងបរិច្ចាគ។ ជំនាញទាំងនេះ ចូលរួមចំណែកធ្វើឱ្យកាន់តែប្រសើឡើង ដល់សុខុមាលភាព ការរស់នៅរបស់ពួកគេ និងក៏ជំរុញការអភិវឌ្ឍរបស់ប្រទេសកម្ពុជាផងដែរ។
លោក សឹង ឈុន អនុប្រធានការិយាល័យអប់រំខណ្ឌច្បារអំពៅ និងជាគណៈកម្មការវិនិច្ឆ័យ នៃកម្មវិធី ឆា-ឈីង បានមានប្រសាសន៍ថា៖«ដោយសារតែមានការប្រែប្រួលឥរិយាបទ (ក្នុងការគ្រប់គ្រងប្រាក់) ខ្ញុំចង់ឱ្យមានការពង្រីកកម្មវិធីនេះនៅទូទាំងប្រទេស។ ដូច្នេះហើយ ខ្ញុំសូមសំណូមពរ ដល់ក្រសួងអប់រំ និងដៃគូ ជួយគាំទ្រកម្មវិធីនេះបន្តទៀត»។
មូលនិធិព្រូដិនស៍ និងក្រុមហ៊ុនព្រូដិនសលកម្ពុជា មានគោលបំណងពង្រីកការអនុវត្តកម្មវិធី ឆា-ឈីង រយៈពេល២ឆ្នាំខាងមុខទៀត នៅតាមសាលារៀនចំនួន១៥០ ក្នុងខេត្តចំនួន ៣ នៃប្រទេសកម្ពុជា៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
