អន្តរជាតិ
នៅអាស៊ាន ប្រទេស៥មាននាវាមុជទឹក ឯថៃជាប្រទេសតែមួយគត់មាននាវាដឹកយន្តហោះ
នាវាមុជទឹកធុន Kilo របស់កងទ័ពជើងទឹកវៀតណាម។ រូបភាព AFP
×![]()
ដោយ: តន ចាន់រិទ្ធារ៉ា
កងទ័ពជើងទឹក ជាអង្គភាពសំខាន់មួយក្នុងជួរកងទ័ពរបស់ប្រទេសនៅក្នុងតំបន់អាស៊ីអាគ្នេយ៍ ពិសេសរដ្ឋសមាជិកដែលមានដែនទឹកសមុទ្រ។ ការពង្រឹងសមត្ថភាពលើផ្ទៃទឹកជារឿងសំខាន់ ប៉ុន្តែសមត្ថភាពក្រោមផ្ទៃទឹកក៏ជារឿងដែលត្រូវយកចិត្តទុកដាក់ដែរ។ មកទល់បច្ចុប្បន្ន មានតែប្រទេសប្រាំនៅអាស៊ីអាគ្នេយ៍ដែលមាននាវាមុជទឹក ខណៈថៃជាប្រទេសក្នុងតំបន់តែមួយគត់ដែលមាននាវាដឹកយន្តហោះចម្បាំង។
ឥណ្ឌូណេស៊ី ម៉ាឡេស៊ី វៀតណាម សិង្ហបុរី និងមីយ៉ាន់ម៉ា ជាប្រទេសបួននៅអាស៊ីអាគ្នេយ៍ដែលមាននាវាមុជទឹកក្នុងជួរកងទ័ពរបស់ខ្លួន ខណៈប្រទេសទាំងនេះ មានដែនសមុទ្រល្វឹងល្វើយ ហើយមានជម្លោះដែនទឹកទៅទៀត។
ជាមួយនាវាមុជ៦គ្រឿង វៀតណាមជាប្រទេសមាននាវាមុជទឹកច្រើនជាងគេរបស់អាស៊ាន។ វៀតណាមបានទិញនាវាមុជទឹកធុន Kilo របស់រុស្ស៊ីក្នុងតម្លៃសរុបជាងពីរពាន់លានដុល្លារ។ នាវាមុជទឹកប្រភេទនេះ ត្រូវបានអាមេរិកឲ្យរហស្សនាមថាចំណុចខ្មៅ ព្រោះវាពិបាកក្នុងការតាមចាប់ណាស់។ ឯមីយ៉ាន់ម៉ាវិញ ក៏ទើបដាក់ឲ្យប្រើប្រាស់នាវាមុជទឹកធុន Kilo នេះដែលទើបទទួលបានពីរុស្ស៊ីនៅក្នុងខែធ្នូនេះដែរ។
បើតាមការផ្សាយរបស់គេហទំព័រ Global Fire Power ឥណ្ឌូណេស៊ី ដែលត្រូវបានគេចាត់ទុកជាបងធំរបស់អាស៊ាន និងជាប្រទេសមានទ័ពជើងខ្លាំងក្លាមួយដែរ មាននាវាមុជទឹកចំនួន៥គ្រឿង ដែលបីគ្រឿងប្រើប្រាស់បច្ចេកវិទ្យាកូរ៉េខាងត្បូងតម្លៃ១,២ពាន់លានដុល្លារ និងពីរគ្រឿងទិញពីអាល្លឺម៉ង់។ នៅឆ្នាំ២០១៩ កងទ័ពជើងទឹកឥណ្ឌូណេស៊ីប្រកាសថា ខ្លួននឹងទិញនាវាមុជទឹកបន្ថែមទៀតឲ្យគ្រប់ចំនួន១២គ្រឿងដើម្បីការពារខ្លួន។
ម៉ាឡេស៊ីវិញ ក៏មាននាវាមុជទឹកដែរ គឺប្រភេទ Scorpene ដែលផលិតរួមគ្នាដោយបារាំង និងអេស្ប៉ាញ។ ម៉ាឡេស៊ី ទិញនាវាមុជទឹកនេះចំនួនពីរគ្រឿង ហើយដាក់ឲ្យប្រើក្នុងឆ្នាំ២០០៩ ។ នាវានេះ អាចនៅក្រោមទឹកដល់ទៅជាង៥០ ថ្ងៃឯណោះ ដោយដើរថាមពលប្រេងឥន្ធនៈ។ មីយ៉ាន់ម៉ាឯណោះ ក៏ទើបទិញនាវាមុជទឹករុស្ស៊ី ហើយនាវាមួយគ្រឿង នឹងដាក់ឲ្យត្រួតពិនិត្យដែនទឹកនៃសមុទ្រអង់ដាម៉ាន់។
ក្រៅពីប្រទេសធំៗ បុរីរដ្ឋសិង្ហបុរី ក៏មាននាវាមុជទឹកផងដែរ។ បច្ចុប្បន្ន ប្រទេសនេះមាននាវាមុជទឹកថ្នាក់ Challenger និងថ្នាក់ Archer ចំនួន៤គ្រឿង ដែលប្រើប្រាស់ជាងពីរទសវត្សរ៍មកហើយ។ ប្រទេសនេះ កំពុងតែទិញនាវាមុជទឹកថ្នាក់ Type 218SG ចំនួនបួនគ្រឿងទៀតពីអាល្លឺម៉ង់ តែមិនដឹងពីតម្លៃជាក់លាក់ឡើយ។ សិង្ហបុរី នឹងទទួលបាននាវាមុជទឹកធុននេះដំបូងនៅឆ្នាំ២០២១ខាងមុខ។
ថៃ មិនទាន់មាននាវាមុជទឹកឡើយ តែបានសម្រេចចិត្តទិញបួនគ្រឿងពីចិន ដែលគ្រោងនឹងទទួលបាននៅពេលខាងមុខ។ អត់មាននាវាមុជទឹកមែន តែថៃជាប្រទេសតែមួយគត់នៅអាស៊ានដែលមាននាវាដឹកយន្តហោះ។ នាវាដឹកយន្តហោះ HTMS Chakri Naruebet ដែលផលិតនៅអេស្ប៉ាញ ហើយដាក់ឲ្យដំណើរការនៅឆ្នាំ១៩៩៧ អាចដឹកយន្តហោះធុន Sea Harrier AV-8S និងឧទ្ធម្ភាគចក្រ SH-70B ៕
© រក្សាសិទ្ធិដោយ thmeythmey.com
