កីឡាអន្តរជាតិ
អន្តរជាតិ
ក្លិបបាល់ទាត់ចិន ផ្តើមរឹតត្បិតលើប្រាក់ខែកីឡាករ ចាប់ពីរដូវកាលក្រោយ រូបភាពពី AFP
× សហព័ន្ធកីឡាបាល់ទាត់ចិន (CFA) បានប្រកាសពីការទប់ស្កាត់ការចំណាយរបស់ក្លិបបាល់ទាត់ចិននៅមុនរដូវកាល ២០២០ ដោយរឹតត្បិតលើការដំឡើងប្រាក់ខែសម្រាប់កីឡាករបរទេស និងក្នុងស្រុក។ CFA ធ្វើបែបនេះដើម្បីចង់ទប់ស្កាត់ការខាតបង់ផ្នែកហិរញ្ញវត្ថុរបស់ក្លិបបាល់ទាត់អាជីពរបស់ខ្លួន។
នៅក្នុងកិច្ចប្រជុំបិទទ្វារជាមួយតំណាងវិនិយោគនៃក្លិបក្នុងលីគកីឡាបាល់ទាត់ចិន (CSL) លោក Chen Xuyuan ប្រធាន CFA ថាពួកគេបានសម្រេចចិត្តដាក់កម្រិតប្រាក់ខែយ៉ាងតឹងរឹងចាប់ពីរដូវកាលក្រោយបន្ទាប់ពីមានការពិភាក្សាយ៉ាងច្បាស់មួយជាមួយក្លិបទាំងអស់។
CFA បានចេញគោលនយោបាយរឹតត្បិតលើកីឡាករក្នុងស្រុកដែលលេងក្នុងក្របខណ្ឌ CSL ដោយមិនឲ្យមានប្រាក់ឈ្នួលលើសពី១០លានយន់ (១,៤៥ លានដុល្លារអាមេរិក) ក្នុង១ឆ្នាំឡើយ នេះមិនទាន់គិតថ្លៃបង់ពន្ធ និងប្រាក់រង្វាន់ទេ ខណៈប្រាក់ខែប្រចាំឆ្នាំសម្រាប់កីឡាករបរទេសមិនឲ្យលើស៣,៣៣លានដុល្លារបន្ទាប់ពីបង់ពន្ធរួច។
លោក Chen ដែលជាអតីតប្រធានក្លិប Shanghai SIPG ធ្លាប់បានប្តេជ្ញាថានឹងធ្វើឲ្យមានសុខភាពផ្នែកហិរញ្ញវត្ថុសម្រាប់ក្លិបបាល់ទាត់ចិននៅពេលលោកត្រូវបានគេបោះឆ្នោតឲ្យធ្វើជាប្រធាន CFA កាលពីខែសីហាកន្លងទៅ។
«ក្លិបរបស់យើងចំណាយលុយច្រើនពេកហើយ កីឡាបាល់ទាត់អាជីពរបស់យើងក៏មិនបានដំណើរការប្រកបដោយនិរន្តរភាពនោះដែរ។ ប្រសិនបើយើងមិនចាត់វិធានការទាន់ពេលវេលាទេខ្ញុំខ្លាចថាវានឹងដួលរលំ»។ នេះជាការបញ្ជាក់របស់ប្រធាន CFA។
សរុបក្រោយកិច្ចប្រជុំ ស្ថាប័ន CFA បានសម្រេចកំណត់ការចំណាយទូទៅរបស់ក្លិបនីមួយៗមិនឲ្យលើសពី ១,១ ពាន់លានយន់ (១៥៩ លានដុល្លារអាមេរិក) ក្នុងមួយឆ្នាំ គិតចាប់ពីរដូវកាលក្រោយទៅ ហើយចំនួនប្រាក់ខែសម្រាប់កីឡាករក៏មិនឲ្យលើសពី៦០ភាគរយនៃថ្លៃចំណាយសរុបដែរ។
ក្នុងរយៈពេលប៉ុន្មានឆ្នាំចុងក្រោយ គេបានដឹងហើយថាក្លិននៃលីគកំពូលចិនបានចំណាយប្រាក់ដ៏ច្រើនលើសលុបដើម្បីនាំយកកីឡាករដែលមានឈ្មោះល្បីទៅលេងឲ្យក្រុមពួកគេជាមួយនឹងប្រាក់ឈ្នួលកប់ពពកផងដែរ។ អ្វីទាំងអស់នេះក៏ព្រោះពួកគេចង់ឲ្យវិស័យកីឡាបាល់ទាត់ចិនរីកចម្រើន និងល្បីដូចលីគនៅតំបន់អឺរ៉ុបដែរ។ យ៉ាងណាក៏ដោយ ការចំណាយខុស អាចធ្វើឲ្យប៉ះពាល់ដល់ផ្នែកហិរញ្ញវត្ថុរបស់ក្លិប រហូតឈានដល់ការបិទទ្វារទៀតផង៕
Tag:
CFA
ចិន
Chen Xuyuan
© រក្សាសិទ្ធិដោយ thmeythmey.com