ព្រៃវែង-ភ្នំពេញ ជាដំណើរផ្លូវជីវិតរបស់អ្នកស្រី នួន និងស្វាមី ដែលប្រកបរបស់លក់ផ្លែត្នោត

ជាតិ

ព្រៃវែង-ភ្នំពេញ ជាដំណើរផ្លូវជីវិតរបស់អ្នកស្រី នួន និងស្វាមី ដែលប្រកបរបស់លក់ផ្លែត្នោត

28, Dec 2019 , 4:59 pm

រូបភាព

ដោយ:

ភ្នំពេញ៖ អ្នកស្រី ធី ស្រីនួន មានមុខរបរជាអ្នកលក់ ផ្លែត្នោត កំពីងត្នោត ទឹកត្នោត និងស្ករត្នោត នៅផ្លូវ ២០០៤ ។ ក្រោកពីដំណេកនៅម៉ោង៣ទៀបភ្លឺ អ្នកស្រី នួន និងស្វាមី ត្រូវធ្វើដំណើរពីផ្ទះ នៅម្តុំទំនប់កប់ស្រូវ ឆ្ពោះទៅខេត្តព្រៃវែង ដើម្បីយកផ្លែត្នោត និងកំពីងត្នោត មកលក់នៅភ្នំពេញ រៀងរាល់ពីរថ្ងៃម្តង។ អ្នកស្រី នួន ក៏មានការព្រួយបារម្ភពីសុវត្ថិភាពផ្ទាល់ខ្លួនដែរ ប៉ុន្តែវាជម្រើសសម្រាប់អ្នកស្រី ដែលគ្មានការងារផ្សេងពីនេះឡើយ។ របរលក់ត្នោតនេះ ជារបរគោលមួយទៀត សម្រាប់គ្រួសារអ្នកស្រី នួន បន្ទាប់ពីធ្វើស្រែចម្ការ ដើម្បីផ្គត់ផ្គង់ជីវភាពគ្រួសារ។

មានវ័យ២០ឆ្នាំ អ្នកស្រី ធី ស្រីនួន និងស្វាមីបានចាប់ដៃគ្នា កសាងគ្រួសារ៤ឆ្នាំមកហើយ ។ អ្នកទាំងពីរបានប្រកបមុខរបរលក់ផ្លែត្នោត កំពីងត្នោត ទឹកត្នោត និងស្ករត្នោត ក្រៅពីធ្វើស្រែចម្ការ ដើម្បីផ្គត់ផ្គង់ជីវភាពគ្រួសារ និងជារបរបន្តពីម្តាយ-ឳពុក។ កំពុងឈរលក់ផ្លែត្នោតឲ្យភ្ញៀវ នៅផ្លូវ២០០៤ ស្ថិតនៅក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ អ្នកស្រី នួន បានរៀបរាប់ថា៖«ស្ករត្នោត និងទឹកត្នោត ខ្ញុំយកពីបងជីដូនមួយធ្វើខ្លួនឯងនៅទំនប់កប់ស្រូវ។ ឯផ្លែត្នោត និង គ្រាប់ត្នោតទុំ(យកកំពីង) ត្រូវឡើងទៅយកនៅព្រៃវែង ពីរថ្ងៃម្តង។ យើងទិញគេម៉ៅជាដើម ហើយត្រូវឡើងកាប់ខ្លួនឯងទៀត(ស្វាមី)»។

ជាអ្នកខេត្តកំពង់ចាម និងប្តូរមកតាំងទីលំនៅជាយរាជធានីភ្នំពេញបានជិត១ខែ អ្នកស្រី ស្រីនួន មានក្តីបារម្ភពីសុវត្ថិភាពផ្ទាល់ខ្លួន នៅពេលធ្វើដំណើរផ្លូវឆ្ងាយរហូតដល់៧០គីឡូម៉ែត្រ ដែលសម្បូរឡានធំៗ ឯប្តីអ្នកស្រីក៏ត្រូវឡើងកាប់ត្នោត ជួនកាលមានសត្វទិច ដែលជាការងារប្រឈមនឹងគ្រោះថ្នាក់ផងដែរ។ ដ្បិតដឹងថា មានបញ្ហាប្រឈមបែបនេះក្តី ប៉ុន្តែអ្នកស្រីមិនបោះបង់មុខរបរនេះឡើយ ព្រោះអ្នកស្រីមិនដឹងថាត្រូវធ្វើអ្វីក្រៅពីនេះ ។ ដូច្នេះអ្នកស្រី នួន និងស្វាមី មានតែបង្កើនការប្រុងប្រយ័ត្នទេ !

មានសម្បុរខ្មៅស្រឯម អ្នកស្រី ស្រីនួន បានឲ្យដឹងទៀតថា ត្នោតដែលរកទិញនៅ ស្រុកស្វាយន្ទរ ខេត្តព្រៃវែង មួយដើមត្រូវម៉ៅក្នុងតម្លៃ ចន្លោះពី៥០០០-១៥០០០រៀល និងត្រូវដើររកទិញរហូតពេញរ៉ឺម៉ក ទើបត្រឡប់មកភ្នំពេញវិញនៅពេលរសៀល។

ជាមធ្យមអ្នកស្រី និងស្វាមី អាចរកចំណូល បាន១០ម៉ឺនរៀល ដោយការលក់កំពីងត្នោត និងផ្លែត្នោត១ថង់លក់បានតម្លៃ ៤ពាន់-៥ពាន់រៀល ទឹកត្នោត១ដបតម្លៃ២ពាន់រៀល និងស្ករត្នោតតម្លៃចន្លោះ១៥,០០០-៣0,000រៀល។ «ផាត់ថ្លៃចំណាយផ្សេងៗ សល់បាន៣-៤ម៉ឺនរៀលក្នុងមួយថ្ងៃ ទុកសម្រាប់តម្រូវការផ្សេងៗនិងផ្គត់ផ្គង់កូនប្រុសតែម្នាក់ មានអាយុ៣ឆ្នាំ ដែលអ្នកស្រីយកមករស់នៅជាមួយ »។ នេះជាការបញ្ជាក់របស់អ្នកស្រី ស្រីនួន និងស្វាមី ដែលបាននិយាយបន្ថែមទាំងទឹកមុខញញឹមថា ខ្លួនប្រឹងប្រែងប្រកបរបរនេះ ដើម្បីឲ្យកូនបានរៀនបានខ្ពង់ខ្ពស់ ហើយមានការងារល្អ ព្រោះមិនចង់ឲ្យធ្វើការងារលំបាកដូចខ្លួន៕