ជាតិ
សង្គមជាតិ
សម្តេច ទៀ បាញ់ ប្រាប់ទៅកងរាជអាវុធហត្ថឲ្យជួយទប់ស្កាត់ការបំពានរបស់អាជ្ញាធរលើពលរដ្ឋ សម្តេច ទៀ បាញ់ ធ្វើជាអធិបតីក្នុងពិធីបិទកិច្ចប្រជុំបូកសរុបការងារឆ្នាំ២០១៩ របស់កងរាជអាវុធហត្ថ (រូបពីក្រសួងការបារជាតិ)
× សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានណែនាំកងរាជអាវុធហត្ថហត្ថលើផ្ទៃប្រទេស ឲ្យគ្រប់គ្រងការងារផ្នែករដ្ឋបាលសាធារណៈ ហើយត្រូវចាត់វិធានការច្បាប់ឲ្យបានម៉ត់ចត់ ក្នុងការការពារមិនឲ្យមានអំពើពុករលួយ និង «ការរំលោភអំណាចពីសំណាក់អាជ្ញាធរ ទៅលើប្រជាពលរដ្ឋ»។ ការណែនាំរបស់សម្តេច គឺធ្វើឡើងក្នុងពិធីបិទកិច្ចប្រជុំបូកសរុបលទ្ធផលការងារឆ្នាំ២០១៩ របស់កងរាជអាវុធហត្ថ កាលពីរសៀលថ្ងៃទី២៦ ខែធ្នូ ឆ្នាំ២០១៩ ហើយត្រូវបានចុះផ្សាយដោយក្រសួងការពារជាតិ។
គេហទំព័ររបស់ក្រសួងការពារជាតិ បានសរសេរពីសម្តីរបស់សម្តេច ទៀ បាញ់ យ៉ាងដូច្នេះថា៖«កងរាជអាវុធហត្ថ ត្រូវបន្តខិតខំបង្កើនប្រសិទ្ធភាព និងគុណភាពនៃសេវាសាធារណៈ ព្រោះវា ជាបេសកកម្មដ៏ធំចម្បងក្នុងការលើកកម្ពស់ជីវភាពរស់នៅរបស់ប្រជាជន។ ត្រូវប្រែក្លាយកងរាជអាវុធហត្ថ ឲ្យទៅជាកម្លាំងដែលផ្តល់សេវាដ៏មានប្រសិទ្ធភាព សំដៅបម្រើប្រជាពលរដ្ឋឲ្យកាន់តែប្រសើរឡើង ដោយមានទឹកចិត្តមោះមុត មានភក្តីភាព ធ្វើជាអ្នកផ្តល់សេវាគួរឲ្យគោរព និងមានសីលធម៌វិជ្ជាជីវៈ»។
ទន្ទឹមនេះ រដ្ឋមន្ត្រីការពារជាតិ ក៏បានដាស់តឿនកងរាជអាវុធហត្ថ ឲ្យពង្រឹងការងារនិងគ្រប់គ្រងកងកម្លាំងខ្លួន ឲ្យមានប្រសិទ្ធភាពផងដែរ ដោយត្រូវបំបាត់ចោលអ្នក ដែលមិនគោរពបទបញ្ជា និងជំនាញវិជ្ជាជីវៈ។ លើសពីនេះ សម្តេចរដ្ឋមន្ត្រី បង្គាប់ឲ្យស្ថាប័នកងរាជអាវុធហត្ថ ផ្សព្វផ្សាយពីសភាពការណ៍ថ្មីៗ ហើយត្រូវអប់រំផ្នែកនយោបាយ និងសតិអារម្មណ៍ ដល់កងរាជអាវុធហត្ថនៅទូទាំងប្រទេស។ ម្យ៉ាងទៀត សម្តេច បានជំរុញឲ្យកងរាជអាវុធហត្ថ សហការជាមួយក្រសួង ស្ថាប័ន និងសមត្ថកិច្ចពាក់ព័ន្ធ ដើម្បីបង្ក្រាបបទល្មើសនានា។
របាយការណ៍របស់កងរាជអាវុធ ដែលផ្សព្វផ្សាយក្នុងកិច្ចប្រជុំបូកសរុបការងារឆ្នាំ២០១៩ បង្ហាញថា ក្នុងឆ្នាំ២០១៩ កងរាជអាវុធហត្ថ បានបង្ក្រាបបទល្មើសជាង២,៣ពាន់ករណី៕
Tag:
ទៀ បាញ់
កងរាជអាវុធហត្ថ
ពុករលួយ
© រក្សាសិទ្ធិដោយ thmeythmey.com