កីឡាអន្តរជាតិ
អន្តរជាតិ
Liverpool នាំមុខដាច់១៣ពិន្ទុ ខណៈ Spurs និង Man Utd ឡើងកៀកតំបន់ Top4
× ការប្រកួតក្នុងក្របខណ្ឌ Premier League នៅថ្ងៃ Boxing Day បន្សល់ទុកកាដូដ៏រីករាយសម្រាប់ Liverpool, Tottenham Hotspurs ក៏ដូចជា Manchester United និង Everton ជាដើម ដែលពួកគេសុទ្ធតែរកបានបីពិន្ទុរៀងៗខ្លួន។
Liverpool បន្តយុទ្ធនាការរបស់ខ្លួននៅសប្តាហ៍ទី១៩ ដោយមិនទាន់ស្គាល់បរាជ័យឡើយ តាមរយៈជ័យជម្នះដល់ទៅ ៤-០ លើក្រុមម្ចាស់ផ្ទះ Leicester City នៅយប់ថ្ងៃទី២៦ ខែធ្នូ។ ខ្សែប្រយុទ្ធ Roberto Firmino រកបានដល់ទៅ២គ្រាប់ម្នាក់ឯង ខណៈ James Milner និង Trent Alexander-Arnold រកបានម្នាក់១គ្រាប់។ ៣ពិន្ទុនេះ បាននាំហង្សក្រហមកើនដល់៥២ពិន្ទុ ដោយនាំមុខក្រុមលេខ២ Leicester ចំនួន១៣ពិន្ទុ។
មាន់ខ្នាយមាស ក្រោមការដឹកនាំរបស់អ្នកចាត់ការ Jose Mournho បានឡើងលេខ៥ ក្រោយវាយបកយកឈ្នះ Brighton ២-១ ដោយកើនដល់២៩ពិន្ទុ។ ២គ្រាប់របស់ Spurs រកបានដោយខ្សែប្រយុទ្ធ Harry Kane និង Dele Alli មុនពេល Adam Webster តែតឲ្យ Brighton នាមុខ១គ្រាប់មុខ។ Spurs កាន់តែមានពិន្ទុកៀក Chelsea ដែលបរាជ័យក្នុងផ្ទះខ្លួនឯងក្រោយចាញ់ Southampton ២-០។ តៀខៀវនៅឈរលេខ៤ ដែលមាន៣២ពិន្ទុ។
ដោយឡែក Manchester United នៅជំនួបនៅថ្ងៃ Boxing Day នេះ បានយកឈ្នះ Newcastle United ៤-១ ដោយគ្រាប់បាល់វាយបក បន្ទាប់ពីពួកគេបរាជ័យយ៉ាងអាម៉ាសក្រោយចាញ់ក្រុមបាតតារាង Watford ២-០ កាលពីសប្តាហ៍មុន។ Matthew Longstaff ជាអ្នកស៊ុតនាំមុខឲ្យក្រុមសារិកាព្រៃនៅនាទី១៧ មុនពេល Anthony Martial ស៊ុតតាមស្មើនៅ៧នាទីបន្ទាប់។ Mason Greenwood និង Marcus Rashford រកបានម្នាក់១គ្រាប់បន្តបន្ទាប់ មុនពេល Martial បន្ថែមគ្រាប់ទី២របស់ខ្លួន។
ជ័យជម្នះនេះ បានជួយក្រុមដែលដឹកនាំដោយអ្នកចាត់ការលោក Ole Gunnar Solskjaer កើនដល់២៨ពិន្ទុ ពីការប្រកួត១៩លើក និងកំពុងរំកិលខ្លួនទៅចិត្តតំបន់ Top4 ដោយមានគម្លាតពិន្ទុពីក្រុមលេខ៤ Chelsea ចំនួន៤ពិន្ទុ។
ជំនួបគូដទៃទៀត Everton ឈ្នះ Burnley ១-០, Crystal Palace វាយបកឈ្នះ West Ham United ២-១, Aston Villa ឈ្នះ Norwich City ១-០ រីឯ Bournemouth ស្មើជាមួយ Arsenal ១-១ ដូចជំនួបរវៀង Sheffled United និង Watford ដែរ៕
Tag:
Boxing Day
Premier League
© រក្សាសិទ្ធិដោយ thmeythmey.com