ជាតិ
សេដ្ឋកិច្ច
បើកុនខ្មែរល្បី ជួយទាញទេសចរ បើតួកុនបរទេសល្បីថតនៅខ្មែរ ជួយផ្ដល់ទំនុកចិត្តអ្នកវិនិយោគ
×![]()
ភ្នំពេញ៖ ភាពយន្ត ក៏ដូចជារូបភាពក្នុងទម្រង់ផ្សេងៗទៀត មានឥទ្ធិពលណាស់ក្នុងការផ្សព្វផ្សាយបង្ហាញពីប្រទេសមួយ។ បើកម្ពុជាផលិតភាពយន្តឲ្យល្បី នោះនឹងមានឱកាសច្រើនក្នុងការស្រូបយកទេសចរអន្តរជាតិ។ ក្រៅពីទេសចរ វិស័យកុនក៏ជួយផ្ដល់ទំនុកចិត្តសម្រាប់អ្នកវិនិយោគចូលបោះទុនរកស៊ីនៅកម្ពុជាផងដែរ។
ប្រសាសន៍ផលិតករភាពយន្តដ៏ល្បី លោក ប៉ាន់ រិទ្ធី ក្នុងផ្នែកមួយនៃបទសម្ភាសរបស់សារព័ត៌មានថ្មីៗ ដែលបានធ្វើឡើងក្នុងសប្ដាហ៍នេះ៖
លោក ប៉ាន់ រិទ្ធី បានថ្លែងដូច្នេះថា៖«អ្វីដែលគេចង់មកលេងយើង ភាគច្រើនទៅតាមរូបភាពសិន។ កុនមិនមែនត្រឹមមើលកុននោះទេ បើកុនយើងល្បី ដំណើរការ មនុស្សឃើញច្រើន មនុស្សអាចចូលមក»។
ការដែលបរទេសចូលមកផលិតកុននៅកម្ពុជា គឺទាមទារស្ថេរភាព និងហេដ្ឋារចនាសម្ព័ន្ធសង្គមនានា ដូចជាផ្លូវ សណ្ឋាគារ ជាដើម។ ហើយកាលណាតារាបរទេសល្បីៗហ៊ានមកថតសម្ដែងនៅខ្មែរ គឺឆ្លុះបញ្ចាំងពីស្ថេរភាពរបស់កម្ពុជា។ ស្ថេរភាពនេះហើយជាទំនុកចិត្តរបស់អ្នកវិនិយោគ។ លោក ប៉ាន់ រិទ្ធី ឲ្យដឹងដូច្នេះថា៖«បើគេមកធ្វើកុន មានន័យថាស្រុកខ្មែរមានស្ថេរភាព ព្រោះការផលិតកុនចំណាយថ្លៃ ហើយបើយកតារាឯកមក ដូចជា Angelina Jolie កាលណាគាត់មកថតមួយ ខ្ញុំបានមើលកាសែតសេដ្ឋកិច្ចមួយគេចុះថា អូ!បើ Angelina Jolie ថតនៅស្រុកខ្មែរ យើងអាចទៅវិនិយោគបានហើយ»។
ក្រុមហ៊ុនអន្តរជាតិចូលមកផលិតភាពយន្តនៅខ្មែរ គឺអាចតាមរយៈពីររូបភាព គឺគេមកដាក់ទុននិងថតដោយខ្លួនឯង ឬតាមរយៈការចាប់ដៃសហការជាមួយផលិតករខ្មែរ។ លោក ប៉ាន់ រិទ្ធី ក៏បានអះអាងផងដែរថា ដើម្បីឲ្យឧស្សាហកម្មភាពយន្តរបស់កម្ពុជាអាចប្រកួតប្រជែងបាន កត្តាសំខាន់មួយគឺត្រូវសហការវិនិយោគជាមួយក្រុមហ៊ុនភាពយន្តបរទេស។ ហើយការចូលមកផលិតកុននៅកម្ពុជា បានផ្ដល់ប្រយោជន៍សេដ្ឋកិច្ច តាមរយៈការចាយវាយផ្សេងៗ រាប់ចាប់ការចាយវាយលើម្ហូបអាហារ ស្នាក់នៅ ធ្វើដំណើរ ជួលទីតាំងថត ជាដើម៕
Tag:
ប៉ាន់ រិទ្ធី
ឧស្សាហកម្មភាពយន្ត
© រក្សាសិទ្ធិដោយ thmeythmey.com
