អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
ប្រធានាធិបតីតួកគី រ៉េស៊ីប តៃយីប អ៊ែរដូហ្កាន់ នៅថ្ងៃទី២៦ ខែធ្នូ បានប្រកាសពីគម្រោងបញ្ជូនទ័ពទៅកាន់លីប៊ីតាមសំណើរបស់រដ្ឋាភិបាលទីក្រុងទ្រីប៉ូលីដែលទទួលស្គាល់ដោយអន្តរជាតិ។ គម្រោងបញ្ជូនទ័ពនេះ អាចនឹងអនុវត្តនៅដើមខែមករា ឆ្នាំ២០២០ ខាងមុខ ដោយរង់ចាំការយល់ព្រមពីសភាតួកគីសិន។ វត្តមានទ័ពតួកគី ទំនងធ្វើឲ្យវិបត្តិនៅប្រទេសអាហ្វ្រិកខាងជើងមួយនេះកាន់តែផុងជ្រៅ និងរាលដាល់កាន់តែខ្លាំង។ 
រដ្ឋាភិបាលលីប៊ីនៅទីក្រុងទ្រីប៉ូលី ដែលទទួលស្គាល់ដោយអន្តរជាតិ បានងាករកការការពារពីតួកគី ស្របពេលកំពុងតស៊ូក្នុងការវាយប្រយុទ្ធរាប់សិបខែទល់នឹងកម្លាំងទ័ពរបស់សេនាប្រមុខ ខាលីហ្វា ហាហ្វតា ដែលត្រួតត្រាតំបន់ភាគកើតប្រទេស។ កម្លាំងទ័ពលោក ខាលីហ្វា ដែលគាំទ្រដោយអេហ្ស៊ីប រុស្ស៊ី អេមីរ៉ាតអារ៉ាប់រួម និងហ្ស៊កដានី បានរុលសំដៅទីក្រុងទ្រីប៉ូលីក្នុងគោលដៅបង្រួបបង្រួមលីប៊ីដែលបែកខ្ញែកឡើងវិញ។
តួកគីដែលគាំទ្ររដ្ឋាភិបាលក្រុងទ្រីប៉ូលីនោះ បានផ្គត់ផ្គង់សម្ភារសឹកជាច្រើនរួចមកហើយ ទោះអង្គការសហប្រជាជាតិហាមប្រាមក្ដី។ ប៉ុន្តែក្នុងការវិវត្តចុងក្រោយនេះ តួកគី នឹងពង្រាយទ័ពដើម្បីជួយភាគីម្ខាងនេះនៃជម្លោះលីប៊ីតែម្ដង។ កាលពីខែមុន ទីក្រុងអង់ការ៉ា និងទ្រីប៉ូលី បានចុះកិច្ចព្រមព្រៀងពង្រឹងទំនាក់ទំនងយោធាផងដែរ។
បើតាមទីភ្នាក់ងារព័ត៌មាន Reuters មន្ត្រីលីប៊ីម្នាក់អះអាងថា សំណើទៅកាន់តួកគីដើម្បីសុំការពង្រាយទ័ពនោះ ទៅដល់ទីក្រុងអង់ការ៉ាហើយ។ ប្រធានាធិបតីតួកគី តៃយីប អ៊ែរដូហ្កាន់ ក្នុងកិច្ចប្រជុំបក្សកាន់អំណាចនៅថ្ងៃទី២៦ ខែធ្នូ អះអាងថា ដោយសារមានការស្នើសុំបែបនេះ តួកគីនឹងទទួលយកតែម្ដង។ លោក អ៊ែរដូហ្កាន់ បន្តថា រដ្ឋាភិបាលនឹងដាក់សេចក្ដីព្រាងច្បាប់មួយទៅកាន់សភា ដើម្បីបើកផ្លូវដល់ការពង្រាយទ័ព ហើយការអនុម័តអាចធ្វើនៅថ្ងៃទី៧ ឬទី៨ ខែមករាខាងមុខ។
វត្តមានកងទ័ពតួកគីដែលនឹងមានទាំងទ័ពជើងគោក ជើងទឹក និងជើងអាកាសផងនោះ នឹងធ្វើឲ្យជម្លោះផ្ទៃក្នុងលីប៊ីកាន់តែប្រេះឆា។ អាមេរិក មិនបានប្រកាសជំទាស់ដោយចំហរលើគម្រោងរបស់តួកគីឡើយ តែបដិសេធការកេងប្រវ័ញយកប្រយោជន៍ពីជម្លោះនេះដោយកម្លាំងបរទេស។ ក្នុងសេចក្ដីថ្លែងការណ៍របស់សេតវិមាន ប្រធានាធិបតី ដូណាល់ ត្រាំ បានជជែកជាមួយសមភាគីអេហ្ស៊ីប ហើយយល់ស្របគ្នាថា ជម្លោះនេះត្រូវតែដោះស្រាយឲ្យបានលឿន មុនពេលបរទេសចូលគ្រប់គ្រងលីប៊ី។
មិនត្រឹមតែអាមេរិក និងអេហ្ស៊ីបឡើយដែលបារម្ភពីវត្តមានទ័ពតួកគី រុស្ស៊ីដែលគាំទ្រឧត្តមសេនីយ៍ ហាហ្វតា ក៏មិនសប្បាយចិត្តដែរ។ ក្នុងការសន្ទនាតាមទូរសព្ទជាមួយនាយករដ្ឋមន្ត្រីអ៊ីតាលី Giuseppe Conte ប្រធានាធិបតីរុស្ស៊ី វ៉ា្លឌីមៀ ពូទីន ក៏លើកឡើងពីភាពចាំបាច់ក្នុងការដោះស្រាយជម្លោះនៅលីប៊ីដោយសន្តិវិធីដែរ។
ពាក់ព័ន្ធរឿងនេះ លោក អ៊ែដូហ្កាន់ អះអាងថា តួកគី មិនអាចនៅស្ងៀមចំពោះក្រុមអ្នកប្រយុទ្ធស៊ីឈ្នួលមានទំនាក់ទំនងជាមួយរុស្ស៊ីដែលកំពុងគាំទ្រលោក ហាហ្វតា បានឡើយ។ មេដឹកនាំតួកគីរូបនេះបន្ថែមថា មានពួកស៊ីឈ្នួលប្រយុទ្ធស្និទ្ធរុស្ស៊ីប្រមាណពីរពាន់នាក់នៅលីប៊ី។ លោក អ៊ែរដូហ្កាន់ ទំនងចង់សំដៅដល់ក្រុមស៊ីឈ្នួលធ្វើសង្គ្រាមមកពីស៊ូដង់៕
Tag:
តួកគី
លីប៊ី
© រក្សាសិទ្ធិដោយ thmeythmey.com
