ជាតិ
បទយកការណ៍ / បទសម្ភាសន៍
វីដេអូ
លោក ស៊ូ សុជាតិ៖ យុវជនដឹងពីបញ្ហាប្រែប្រួលអាកាសធាតុច្រើន តែមិនទាន់ផ្លាស់ប្ដូរឥរិយាបថពេញលេញ
× ភ្នំពេញ៖ ដ្បិតយុវជនបច្ចុប្បន្ន បានយល់ដឹងពីការប្រែប្រួលអាកាសធាតុល្អប្រសើរជាងមុនក្តី ប៉ុន្តែពួកគេមិនទាន់ផ្លាស់ប្ដូរឥរិយាបថពេញលេញ លើការប្រើប្រាស់សម្ភារៈ និងថាមពល ដែលជះផលប៉ះពាល់ដល់បញ្ហាអាកាសធាតុនៅឡើយទេ។ លោក ស៊ូ សុជាតិ នាយកប្រតិបត្តិអង្គការកម្ពុជា អភិវឌ្ឍន៍សហគមន៍និងបរិស្ថាន ថ្លែងបែបនេះ ប្រាប់សារព័ត៌មានថ្មីៗ។
លោក ស៊ូ សុជាតិ បានកត់សម្គាល់ថា ការទប់ស្កាត់ និងកាត់បន្ថយការប្រែប្រួលអាកាសធាតុ កំពុងមានការចូលរួមពីយុវជន តាមរយៈការថែរក្សាបរិស្ថាន ដាំដើមឈើ និងកាត់បន្ថយការប្រើប្រាស់យានជំនិះជាដើម។ ប៉ុន្តែវាគ្រាន់តែជាសញ្ញាវិជ្ជមានមួយប៉ុណ្ណោះ ហើយមិនទាន់អាចចាត់ទុកជាការផ្លាស់ប្ដូរឥរិយាបថថាមពលអគ្គិសនីពេញលេញនៅឡើយទេ។ មិនទាន់ផ្លាស់ប្ដូរឥរិយាបថពេញលេញ ដោយសារវាជាតម្រូវការចាំបាច់របស់ពលរដ្ឋទូទៅ។
ក្នុងន័យនេះលោក សុជាតិ បានសង្កត់ធ្ងន់ថា ពលរដ្ឋ និងយុវជន នៅតែមិនទាន់អាចកាត់បន្ថយលើការប្រើប្រាស់ម៉ាស៊ីនត្រជាក់ ទូរទឹកកក ក៏ដូចជាសម្ភារៈដែលប្រើប្រាស់ថាមពលច្រើន ហើយជះផលអវិជ្ជមានលើបរិស្ថានបាននៅឡើយទេ។
ដើម្បីជ្រាប់កាន់តែច្បាស់សូមទស្សនាកិច្ចសម្ភាសរវាង កញ្ញា អ៊ុត រស្មី នៃសារព័ត៌មានថ្មីៗ និងលោក ស៊ូ សុជាតិ នាយកប្រតិបត្តិអង្គការកម្ពុជាអភិវឌ្ឍន៍សហគមន៍ និងបរិស្ថានដូចតទៅ៖
« អ្វីដែលយើងធ្វើនៅថ្ងៃនេះ វាគ្រាន់តែជាលទ្ធផលដែលអាចស្ដែងនៅថ្ងៃក្រោយ។ តែអ្វីដែលសំខាន់ យើងត្រូវតែធ្វើបន្តធ្វើទៀត ដើម្បីឲ្យការប្រែប្រួលអាកាសធាតុមានការថយចុះនាថ្ងៃអនាគត។ មានរឿងច្រើនដែលប្រជាពលរដ្ឋក៏ដូចជាយុវជនគួរតែធ្វើ គឺត្រូវកាត់បន្ថយការប្រើប្រាស់ថាមពលអគ្គិសនីឲ្យនៅតិច ព្រោះថាមពលអគ្គិសនីគឺជាប្រភពមួយដែលនាំឲ្យមានការបំភាយឧស្ម័នផ្ទះកញ្ចក់ចូលបរិយាកាសច្រើន»។ នេះគឺជាការពន្យល់របស់លោក ស៊ូ សុជាតិ ដែលចង់ឲ្យយុវជនចូលរួមអនុវត្តនៅសកម្មភាពទាំងនេះបន្ថែមឲ្យបានយូរអង្វែង ជាពិសេសចូលរួមកាត់បន្ថយការប្រើប្រាស់ថាមពលអគ្គិសនី ដោយសារប្រភពសំខាន់ដែលនាំឲ្យមានការប្រែប្រួលអាកាសធាតុកើតឡើងពីការបំភាយឧស្ម័នផ្ទះកញ្ចក់ដែលចេញពីវិស័យថាមពលអគ្គិសនី៕
© រក្សាសិទ្ធិដោយ thmeythmey.com