កីឡាអន្តរជាតិ
អន្តរជាតិ
លោក Shin Tae-yong អតីតគ្រូបង្វឹកកូរ៉េខាងត្បូង ទៅដឹកនាំឥណ្ឌូណេស៊ី
× សហព័ន្ធកីឡាបាល់ទាត់ឥណ្ឌូណេស៊ី (PSSI) នៅថ្ងៃទី២៧ ខែធ្នូ បានប្រកាសតែងតាំងលោក Shin Tae-yong អតីតគ្រូបង្វឹកក្រុមជម្រើសជាតិកូរ៉េខាងត្បូង ដើម្បីធ្វើជាគ្រូរបស់ពួកគេ។ លោក Shin ធ្លាប់បានដឹកនាំកូរ៉េខាងត្បូងយកឈ្នះក្រុមអាល្លឺម៉ង់ ២-០ ក្នុងព្រឹត្តិការណ៍ World Cup ឆ្នាំ២០១៨ នៅរុស្ស៊ី។
លោក Mochamad Iriawan ប្រធាន PSSI បាននិយាយក្នុងសេចក្តីថ្លែងការណ៍មួយថា៖«យើងបានអញ្ជើញលោក Shin ដើម្បីធ្វើកិច្ចសន្យារួចហើយ។ បន្ទាប់មកគាត់នឹងត្រូវណែនាំខ្លួន និងឡើងដឹកនាំឥណ្ឌូណេស៊ីជាផ្លូវកានៅថ្ងៃ២៨ ខែធ្នូ»។
ការសម្រេចតែងតាំងបុរសសញ្ជាតិកូរ៉េខាងត្បូង វ័យ៥០ឆ្នាំនេះ កើតឡើងបន្ទាប់ពី PSSI បញ្ចប់តំណែងគ្រូសញ្ជាតិស្កុតឡែនលោក Simon McMenemy កាលពីខែវិច្ឆិកា ក្រោយដឹកនាំឥណ្ឌូណេស៊ីក្នុងវគ្គជម្រុះ World Cup ២០២២ ដោយទទួលបានពិន្ទុអ្វីសោះក្នុងការប្រកូតចំនួន៥លើក។
ឥណ្ឌូណេស៊ី ក៏ធ្វើមិនបានល្អដែរក្នុងការប្រកួតពាន Suzuki Cup ឆ្នាំ២០១៨ ដោយពួកគេបញ្ចប់ទៅក្នុងចំណាត់ថ្នាក់ទី៤ ចំណោម៥ក្រុមក្នុងពូល។
លោក Shin Tae-yong ដែលចាកចេញពីក្រុមជម្រើសជាតិកូរ៉េក្រោយចប់ World Cup នៅរុស្ស៊ី ត្រឹមរយៈពេល១ខែនោះ មិនត្រឹមតែមានភារកិច្ចដឹកនាំក្រុមឈុតធំរបស់ឥណ្ឌូណេស៊ីនោះទេ លោកត្រូវមើលការខុសត្រូវក្រុម U23 និង U20 ផងដែរ។
បញ្ហាជាច្រើនបានកើតឡើងក្នុងវិស័យកីឡាបាល់ទាត់ឥណ្ឌូនេស៊ី ទាំងក្រុមជម្រើសជាតិ និងក្នុងលីគអាជីពរបស់ពួគគេ នារយៈពេលចុងក្រោយនេះ។ អ្វីដែលគួរកត់សម្គាល់ក្រៅពីបញ្ហាលើទីលាន គឺមានអតីតប្រធានពីររូបបានចាកចេញពី PSSI នៅឆ្នាំនេះ ដោយសារមានការចោទប្រកាន់ថាពួកគេជាប់ពាក់ព័ន្ធការកំណត់លទ្ធផលប្រកួតទុកមុន។
PSSI កាលពីខែតុលាក៏ត្រូវបានសហព័ន្ធកីឡាបាល់ទាត់អន្តរជាតិ (FIFA) ពិន័យជាប្រាក់ចំនួន ៤៥០០០ដុល្លារអាមេរិកផងដែរ ដោយសារអ្នកក្រុមអ្នកគាំទ្រខ្លួនបង្កភាពរញ៉េរញ៉ៃក្នុងជំនួបវគ្គជម្រុះ World Cup ជុំទី២ រវាងឥណ្ឌូណេស៊ីជាមួយម៉ាឡេស៊ីនៅក្រុងហ្សាការតា៕
Tag:
ឥណ្ឌូណេស៊ី
PSSI
Shin Tae-yong
© រក្សាសិទ្ធិដោយ thmeythmey.com