កីឡាជាតិ
ជាតិ
FFC ជប់លៀងដល់ក្រុមបាល់ទាត់គ្រប់ឈុត និងប្រគល់រង្វាន់៣២០០០ដុល្លារដល់ U22
× សហព័ន្ធកីឡាបាល់ទាត់កម្ពុជា (FFC) កាលពីយប់ថ្ងៃទី២៦ ខែធ្នូ បានរៀបចំពិធីជប់លៀងចុងឆ្នាំ ដើម្បីអរគុណដល់មន្ត្រីសហព័ន្ធ អ្នកធ្វើការពាក់ព័ន្ធកីឡាបាល់ទាត់ ជាពិសេសគ្រូបង្វឹក គ្រូជំនួយ និងក្រុមកីឡាករគ្រប់ឈុតទាំងអស់នៃជម្រើសជាតិកម្ពុជា។
ពិធីដែលរៀបចំឡើងនៅសាលនៃពហុកីឡដ្ឋានជាតិអូឡាំពិក មានការចូលរួមជាអធិបតីពីសំណាក់សម្តេចឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ និងជាប្រធានគណៈកម្មការរៀបចំការប្រកួតកីឡាអាស៊ីអាគ្នេយ៏លើកទី៣២ ឆ្នាំ២០២៣ ឬហៅកាត់ថា CAMSOC។
លោក សៅ សុខា ប្រធានសហព័ន្ធកីឡាបាល់ទាត់កម្ពុជា បានលើកឡើងពីការសម្រេចបានលទ្ធផលដ៏ល្អរបស់ក្រុមបាល់ទាត់កម្ពុជាក្នុងព្រឹត្តិការណ៍ថ្នាក់តំបន់ ជាពិសេសការឈានទៅជុំចុងក្រោយរបស់ U18 ក្នុងព្រឹត្តិការណ៍ AFC U-19 Championship ឆ្នាំ២០២០ និងការឈានទៅវគ្គពាក់កណ្តាលផ្តាច់ព្រ័ត្រជាប្រវត្តិសាស្ត្ររបស់ U22 ក្នុងព្រឹត្តិការណ៍កីឡាស៊ីហ្គេម។
ជាមួយគ្នានេះ លោក សៅ សុខា បានប្រកាសផ្តល់ប្រាក់រង្វាន់លើកទឹកចិត្ត៣២០០០ដុល្លារអាមេរិក ដល់ក្រុម U22 កម្ពុជា ដែលមាន៣២នាក់ក្រោមការដឹកនាំដោយគ្រូបង្វឹកអាហ្សង់ទីន Felix Dalmas ដោយម្នាក់ៗទទួលបាន១០០០ដុល្លារអាមេរិក។
នាពិធីជប់លៀងនោះផងដែរ សមាសភាពក្រុមជម្រើសជាតិ បានបង្ហាញវត្តមានជាបន្តបន្ទាប់នៅលើវេទិកា ដែលក្នុងនោះមាន ក្រុមជម្រើសជាតិនារី ក្រុមហ្វុតសាល ក្រុម U16 ក្រុម U18 ក្រុម U22 និងក្រុមជម្រើសជាតិឈុតធំ៕
រូបថតទាំងអស់ពី៖ សហព័ន្ធកីឡាបាល់ទាត់កម្ពុជា
© រក្សាសិទ្ធិដោយ thmeythmey.com