អន្តរជាតិ
ទូរទស្សន៍ជប៉ុន NHK សុំទោសព្រោះជូនដំណឹងខុសទាក់ទងការបាញ់មីស៊ីលកូរ៉េខាងជើង ទីស្នាក់កណ្តាលរបស់ប្រព័ន្ធផ្សព្វផ្សាយសារធារណជប៉ុន NHK, រូបភាព៖Nikkei Asian Review
× សារព័ត៌មានជប៉ុន NHK នៅថ្ងៃទី២៧ ខែធ្នូ បានចេញផ្សាយសេចក្តីជូនដំណឹងខុស ជុំវិញបញ្ហាការសាកល្បងមីស៊ីលបាលីស្ទិករបស់កូរ៉េខាងជើង។ ភ្លាមៗបន្ទាប់ពីចេញផ្សាយ ប្រព័ន្ធផ្សព្វផ្សាយមួយនេះ បានចេញមុខសុំទោសជាសាធារណៈ ដោយអះអាងថា ការចេញផ្សាយបែបនេះ គ្រាន់តែជាកាហ្វឹកហាត់ការជូនដំណឹងបន្ទាន់ប៉ុណ្ណោះ។
ស្ថានការណ៍នៅតំបន់អាស៊ីខាងកើត កំពុងតែជ្រួលច្របល់ នាថ្ងៃបុណ្យណូអែល ទី២៦ ខែធ្នូ ដោយសារកូរ៉េខាងជើង បានគំរាមផ្តល់កាដូជាទីផ្គាប់ចិត្តអាមេរិកនៅចំថ្ងៃនេះ។ ផុតថ្ងៃបុណ្យណូអែលត្រឹមតែរយៈពេល ២២នាទីប៉ុណ្ណោះ សារព័ត៌មានជប៉ុន NHK បានចេញសេចក្តីជូនដំណឹងមួយនៅលើវេបសាយរបស់ខ្លួនថា «មីស៊ីលកូរ៉េខាងជើង ត្រូវបានគេមើលឃើញថាធ្លាក់ក្នុងសមុទ្រ ចម្ងាយ២ពាន់គីឡូម៉ែត្រ ពីជ្រោយ Cape Erimo កោះហុកកៃដូ »។
ក្នុងសេចក្តីជូនដំណឹងនេះ សារព័ត៌មាន NHK បានបញ្ជាក់ថា មីស៊ីលនេះ ក៏បានហោះរំលងទឹកដីជប៉ុនផងដែរ។ ប៉ុន្តែត្រឹមតែរយៈពេល ៣០នាទីក្រោយប៉ុណ្ណោះ ប្រព័ន្ធផ្សព្វផ្សាយមួយនេះ បានចេញសេចក្តីថ្លែងការមួយ ដើម្បីសុំទោសវិញ។ តាមរយៈការចេញមុខសុំទោស ទាំងក្នុងវេបសាយ ទូរទស្សន៍ និងវិទ្យុនោះ សារព័ត៌មាន NHK បានលើកឡើងយ៉ាងដូច្នេះថា៖ « យើងសុំទោសអ្នកអាន និងសាធារណជនទាំងអស់»។
ក្នុងន័យនេះ សារព័ត៌មាន បានពន្យល់ថា សេចក្តីជូនដំណឹងនេះ គ្រាន់តែធ្វើឡើងក្នុងគោលបំណងហ្វឹកហាត់សេចក្តីជូនដំណឹងតែប៉ុណ្ណោះ ហើយខ្លួននឹងទប់ស្កាត់ព័ត៌មានបែបនេះ មិនឲ្យមានលើកក្រោយទៀតឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ជាការពិត ប្រព័ន្ធផ្សព្វផ្សាយសាធារណៈ NHK គឺជាទីភ្នាក់ងារមួយ ដែលមានតួនាទីជូនដំណឹងដល់ប្រជាជនជប៉ុនអំពីបញ្ហាផ្សេងៗដូចជា គ្រោះមហន្តរាយ និងការគំរាមកំហែងសន្តិសុខជាដើម។ កាលពីឆ្នាំ២០១៧ សារព័ត៌មានមួយនេះ បានជូនដំណឹងអំពីកូរ៉េខាងជើងដែលបានបាញ់បង្ហោះមីស៊ីលរំលងពីលើជ្រោយ Cape Erimo កោះហុកកៃដូដែរ។
សូមបញ្ជាក់ថា នេះមិនមែនជាលើកទីមួយទេ ដែលសារព័ត៌មាន NHK បានចេញផ្សាយសេចក្តីជូនដំណឹងខុសបែបនេះ។ កាលពីដើមខែមករា ឆ្នាំ ២០១៨ សារព័ត៌មានមួយនេះ ក៏បានចេញសេចក្តីជូនដំណឹងខុសផងដែរ ជុំវិញបញ្ហាកូរ៉េខាងជើងបាញ់សាកល្បងមីស៊ីលកូរ៉េខាងជើង៕
© រក្សាសិទ្ធិដោយ thmeythmey.com