ភ្នំពេញ៖ ហាងលក់ស្រាក្រឡុកឬ Cocktail តាមចិញ្ចើមផ្លូវជាច្រើន កំពុងបើកដំណើរការ និងបានទាក់ទាញភ្ញៀវពីហាងទំនើបៗ នៅភ្នំពេញ។ ដ្បិតមិនមានកន្លែងអង្គុយឱ្យស្រួលដូចហាងទំនើបពិតមែន តែCocktail ចិញ្ចើមផ្លូវ បានរៀបចំការតុបតែងយ៉ាងស្រស់ស្អាត តាមរយៈការរៀបចំភ្លើងពណ៌ចម្រុះ និងមានរសជាតិ មិនចាញ់ហាងធំៗ ឬSky Bar ល្បីៗប៉ុន្មានឡើយ ។
នៅខាងក្រោយវិទ្យាល័យចតុមុខ ឆៀងខាងឆ្វេងបន្តិច ត្រូវបានគេស្គាល់ថា ជាប្លុកលក់ស្រាក្រឡុក ដែលមានហាងជាច្រើនយីហោផ្សេងគ្នា និងមានមនុស្សម្នាជាច្រើន ទៅស្តាប់ភ្លេង សម្រាកលំហែនៅទីនោះ។ ចំណែកកន្លែងផ្សេងទៀត ក៏កំពុងពង្រឹងសេវាកម្ម និងរសជាតិស្រាក្រឡុកដល់ភ្ញៀវប្រជែងនឹងហាងធំៗដែរ។
លោក យ៉ាន ដារ៉ូ ម្ចាស់ហាងស្រាក្រឡុកមួយកន្លែង ដែលមានយីហោ Friend Zone មានទីតាំងស្ថិតនៅឆៀងខាងឆ្វេងមន្ទីរពេទ្យសែនសុខ ជាទីដែលសម្បូរទៅដោយភោជនីយដ្ឋាន និងជាកន្លែងសម្រាប់អ្នកចូលចិត្តដើរលេងពេលយប់។ ដោយឃើញឱកាសល្អមកដល់ និងមានចិត្តស្រឡាញ់ផងនោះ ធ្វើឲ្យលោក ដារ៉ូ ចាប់បើកហាងមួយនេះ បានរយះពេល៦ខែហើយ។ មានវ័យ៣០ឆ្នាំ លោក ដារ៉ូ បានរៀបរាប់ថា« មុនបើកដំណើរការហាងនេះ យើងបានសិក្សាទៅលើទីតាំងនិងរៀនរបៀបក្រឡុកស្រា។ ខ្ញុំត្រូវចំណាយពេលប្រមាណ២ខែ ទើបភ្ញៀវស្គាល់ហាងនេះ! ហើយបច្ចុប្បន្ន មានភ្ញៀវទាំងចាស់និងថ្មី មកញាំជាហូរហែ ដែលមានអាយុ២០ឡើង ទាំងបុរសនិងនារី» ។
ភ្ញៀវប្រមាណជាង២០០ បានចូលទៅហាង Friend Zone របស់លោក ដារ៉ូ ជារៀងរាល់ថ្ងៃ។ ភ្ញៀវទាំងនោះ ភាគច្រើនមកទទួលទានស្រាក្រឡុក និងម្ហូបអារហារនៅហាងលោក ដារ៉ូ នៅពេលល្ងាច ,ពាក់កណ្តាលយប់ និងទៀបភ្លឺ ដែលអាចផ្តល់ចំណូលឲ្យលោករាប់រយដុល្លាក្នុងមួយខែ។ មានវ័យ៣០ឆ្នាំម្ចាស់ហាងរូបនេះបញ្ជាក់ទៀតថា បរិយាកាសនៅទីនេះ( ហាងFriend Zone) ប្លែកពីហាងធំៗ និងមានតម្លៃធូរថ្លៃ ដែលអាចភ្ញៀវមានលទ្ធភាពញាំបាន ដោយមិនចាំបាច់ទៅហាងទំនើបៗ។ រីឯរសជាតិគឺអាស្រ័យលើអតិថិជនដែលចង់បាន ស្រាលឬធ្ងន់។ បច្ចុប្បន្ននេះ លោក យ៉ាន ដារ៉ូ មានសាខាហាងលក់ស្រាក្រឡុកមួយទៀត ដែលនៅមិនឆ្ងាយប៉ុន្មានពីហាង Friend Zone ឡើយ។
មិនខុសគ្នាពីលោកដារ៉ូឡើយ កញ្ញាពិសី ជាម្ចាស់ហាងលក់ស្រាក្រឡុក De Moon cocktail ដែលមានទីតាំងនៅខាងក្រោយសាលាចតុមុខ ក៏មានភ្ញៀវជាច្រើនបានចូលហាងរបស់នាងដែរ ជាពិសេសនៅថ្ងៃចុងសប្តាហ៍ និងថ្ងៃឈប់សម្រាក។ «ខ្ញុំមិនបារម្ភថាលក់មិនដាច់នោះទេ ព្រោះទីនេះត្រូវបានគេស្គាល់ជាកន្លែងដែលសម្បូរទៅដោយហាងលក់ស្រាក្រឡុក »។ នេះជាការអះអាងរបស់កញ្ញា ពិសី ដែលបានបន្ថែមថា គ្មានបញ្ហាចោទដល់ហាង De Moon cocktail ដែលបានបើកដំណើរការ រយៈពេល៩ខែនេះទេ ក្រៅពីការប្រកួតប្រជែងជាមួយហាងស្រាក្រឡុកតាមចិញ្ចើមផ្លូវផ្សេងទៀត។
មានសម្បុរសណ្តែកបាយ ម្ចាស់ហាងស្រាក្រឡុករូបនេះ បានបន្ថែមថា ៖«បើប្រៀបធៀបទៅនឹងហាងធំៗ ល្បីៗដែលនៅទីខ្ពស់ នៅទីនេះ មានទាំងតម្លៃធូរថ្លៃជាង និងរសជាតិប្រហាក់ប្រហែលគ្នា បរិយាកាសក៏ប្លែកពីគ្នា គ្រាន់តែថានៅទាប»។
ក្បែរទីតាំងហាងកញ្ញាពិសី គឺជាហាង NANA Cocktial របស់លោក សុធន់ ។ ម្ចាស់ហាង NANA Cocktial ជឿជាក់លើរសជាតិនិងតម្លៃផលិតផលហាងខ្លួន ដែលធ្វើឱ្យអតិថិជនទទួលយកបាន ។
លោក សុធន់ ដែលចាប់ផ្ដើមដំណើរការបើកហាងខ្លួនតាំងពីឆ្នាំ២០១៧ ហើយកំពុងមានហាងលក់ស្រាក្រឡុក២សាខានេះ បានថ្លែងប្រាប់សារព័ត៌មានថ្មីៗថា«ដើម្បីទាក់ទាញភ្ញៀវ ខ្ញុំបានគិតគូពី តម្លៃ រសជាតិ និងសេវាកម្ម»។
បើតាមលោក សុធន់ របរលក់ស្រាក្រឡុកតាមចិញ្ចើមផ្លូវនេះ មានការគាំទ្រច្រើនពីអតិថិជន និងបានផ្តល់ចំណូលសមរម្យដល់រូបលោក និងគ្រូសារ គ្រាន់បើជាងធ្វើការងារឲ្យគេ។ ដ្បិតផ្ដល់ចំណូលសមរម្យក្តី ប៉ុន្តែម្ចាស់ហាងទាំង៣ខាងលើ សុទ្ធតែស៊ូទ្រាំងងុយគេង ដោយសារត្រូវបើកដំណើរការហាងរហូតដល់ម៉ោង៣ ឬ ៤ទៀបភ្លឺជារៀងរាល់ថ្ងៃ ដើម្បីផ្គាប់ចិត្តអតិថិជន៕