ជាតិ
រដ្ឋបាលស្រុកបន្ទាយស្រីយកសាលា២អនុវត្តន៍គម្រោងរៀបចំសាលាគំរូប្រចាំប្រទេស
× សៀមរាប៖ រដ្ឋបាលស្រុកបន្ទាយស្រី បានជ្រើសរើសយកសាលាបឋមសិក្សាតាកុះ និងវិទ្យាល័យបន្ទាយស្រី ដើម្បីរៀបចំឱ្យក្លាយជាសាលាគំរូថ្នាក់តំបន់ និងឈានដល់ថ្នាក់ជាតិនាពេលអនាគត។ គម្រោងនេះបានប្រកាសឱ្យអនុវត្តន៍ចាប់ពីចុងឆ្នាំ២០១៩នេះតទៅ។
រដ្ឋបាលស្រុកបន្ទាយស្រី បានបង្កើតគម្រោងផ្តួចផ្ដើមឱ្យមានសាលាគំរូក្នុងថ្នាក់តំបន់និងថ្នាក់ជាតិ ដោយក្នុងនោះ បានជ្រើសរើសយកវិទ្យាល័យមួយនិងសាលាបឋមសិក្សាមួយ សម្រាប់អនុវត្តន៍គម្រោងមួយនេះ។ អភិបាលស្រុកបន្ទាយស្រី លោក ឃឹម ហ្វីណង់ បានឱ្យដឹងថា លោកនឹងជំរុញគម្រោងនេះឱ្យសម្រេចគោលដៅដែលចង់បាន។
ក្នុងការងារនេះ រដ្ឋបាលស្រុកបន្ទាយស្រីដោយមានកិច្ចការជាមួយក្រុមហ៊ុនឯកជន ជួយឧបត្ថម្ភគាំទ្រទាំងបច្ចេកទេសនិងថវិកា ដើម្បីអភិវឌ្ឍន៍សាលាបឋមសិក្សាតាកុះ ក៏ដូចជាវិទ្យាល័យបន្ទាយស្រី ឱ្យក្លាយជាសាលាគំរូថ្នាក់តំបន់ និងថ្នាក់ជាតិប្រចាំប្រទេស។ លិខិតផ្តួចផ្តើមដែលចុះហត្ថលេខាដោយលោក ឃឹម ហ្វីណង់ និងនាយកប្រតិបត្តិក្រុមហ៊ុន South East Asia Telecom លោក យ៉ាវ អ៊ីជិន នៅរសៀលថ្ងៃទី២៥ ធ្នូ នៅបរិវេណវិទ្យាល័យបន្ទាយស្រី មិនបញ្ជាក់ថានឹងជួយលើអភិវឌ្ឍន៍លើចំណុចណានៅឡើយ តែនៅពេលនោះ គម្រោងបំពាក់កង្ហារ ភ្លើង និងឯកសណ្ឋានសិស្សានុសិស្សបានប្រកាសអនុវត្តន៍ភ្លាមៗ។ គម្រោងរៀបចំសាលាគំរូនេះមានរយៈពេល៥ឆ្នាំ។
លោក ឃឹម ហ្វីណង់ ពន្យល់ថា គម្រោងនេះទាមទារឱ្យមានការសិក្សានិងគាំទ្រពីស្ថាប័នពាក់ព័ន្ធនានា ដោយមិនសំដៅតែក្រុមហ៊ុនឯកជនមួយទេ តែក្នុងនោះលោកក៏ចង់ឱ្យមានការជួយជ្រោមជ្រែងពីអង្គការជាតិ-អន្ដរជាតិ ក៏ដូចជាក្រសួងអប់រំ យុវជន និងកីឡាផងដែរ ដើម្បីកៀងគរធនធានក្នុងការអភិវឌ្ឍក្នុងតំបន់មួយនេះ៕
Tag:
ស្រុកបន្ទាយស្រី
ឃឹម ហ្វីណង់
សាលាគំរូ
© រក្សាសិទ្ធិដោយ thmeythmey.com