ជាតិ
ដើម្បីចិញ្ចឹមទន្សាយឱ្យបានល្អ តើគួរធ្វើដូចម្ដេច?
× ភ្នំពេញ៖ដើម្បីចិញ្ចឹមទន្សាយនៅផ្ទះ ឲ្យបានល្អ គេត្រូវដឹងពីគន្លឹះខ្លីៗមួយចំនួន ដែលមានដូចជា ការថែទាំ របៀបដាក់ចំណី ការដឹងពីអាយុទន្សាយ ដែលត្រូវជ្រើសរើសមកចិញ្ចឹមជាដើម។ អ្នកស្រី កែវ ម៉ាឡែន ម្ចាស់កសិដ្ឋានចិញ្ចឹមទន្សាយ ខេមបូហ្វាម បានចែករំលែកវិធីសាស្ត្រខ្លីៗ ពីរបៀបចិញ្ចឹមទន្សាយនៅផ្ទះ។
បច្ចុប្បន្ន គេឃើញថា នៅតាមផ្ទះនីមួយៗ មានចិញ្ចឹមទន្សាយ ដើម្បីលម្អ និងដោយក្តីស្រឡាញ់។ រីឯរបៀបថែទាំវិញនោះ អ្នកចិញ្ចឹមខ្លះ ពុំទាន់បានយល់ច្បាស់នៅឡើយ ជាហេតុធ្វើឲ្យទន្សាយមិនមានសុខភាពល្អ ឬងាប់ជាដើម។
អ្នកស្រី កែវ ម៉ាឡែន ម្ចាស់កសិដ្ឋានចិញ្ចឹមទន្សាយ ខេមបូហ្វាម ដែលមានទីតាំងស្ថិតនៅភូមិ ព្រែកតាឡុង សង្កាត់ចាក់អង្រែក្រោម ខណ្ដមានជ័យ រាជធានីភ្នំពេញ បានចែករំលែកគន្លឹះខ្លីៗ ដើម្បីថែទាំទន្សាយនៅផ្ទះឲ្យបានល្អ។
អ្នកស្រី ម៉ាឡែន បានរៀបរាប់ថា ការចិញ្ចឹមទន្សាយនៅកសិដ្ឋាន និងនៅតាមផ្ទះគឺពុំដូចគ្នាឡើយ ហើយវាពុំមែនជារឿងលំបាក និងគ្មានបញ្ហាទេ ប្រសិនបើអនុវត្តតាមបច្ចេកទេសត្រឹមត្រូវ។ អង្គុយនៅជិត កូនទន្សាយ ដែលដាក់តាំងដើម្បីលក់ ម្ចាស់កសិដ្ឋានដែលមានវ័យ ៣០ឆ្នាំរូបនេះ បានបញ្ជាក់ថា អាយុទន្សាយដែលគួរយកទៅចិញ្ចឹមនៅផ្ទះ គឺមានចន្លោះ ពី១ខែកន្លះ ទៅ២ខែ ព្រោះវាមានសុខភាពរឹងមាំ ងាយសាំនឹងបរិយាកាសថ្មី។
ទន្សាយដែលមានអាយុតិចជាងនេះ ឬ ច្រើនជាងនេះ មិនល្អឡើយ។ទន្សាយដែលមានអាយុក្រោម១ខែ ជាទន្សាយដែលនៅបៅ មិនអាចយកទៅចិញ្ចឹមនៅផ្ទះបានទេ ពោលគឺមិនសង្ឃឹមថារស់ ។ ឯទន្សាយ មានអាយុចន្លោះ៣ទៅ៤ខែ គឺមិនងាយសាំ នឹងកន្លែងរស់នៅថ្មីឡើយ។ នេះជាការបញ្ជាក់របស់លោក ម៉ាឡែន។
ទាក់ទងនឹងចំណីវិញ អ្នកស្រី ម៉ាឡែន បានបញ្ជាក់ថា«ត្រូវជ្រើសរើសចំណីដែលល្អ ដាក់ចំណីឲ្យបានទៀងទាត់ គឺគ្រប់គ្រាន់ហើយ។ ចំណីមានពីរប្រភេទ គឺចំណីគ្រាប់ ដាក់មានការកំណត់។ ចំណីមួយប្រភេទទៀតនោះគឺ ស្មៅស្ងួត តម្រូវឲ្យដាក់គ្រប់ពេល»។
ក្រៅពីចំណីទាំងពីប្រភេទខាងលើ ទន្សាយអាចស៊ីចំណីស្រស់បានដូចជាត្រកួន តែត្រូវប្រាកដថាជាត្រកួនធម្មជាតិ ដែលដាំខ្លួនឯង។ ប្រសិនបើបន្លែដែលមានជាតិពុលឬ គីមី នោះបង្ករទៅជាបញ្ហា។ ម្ចាស់កសិដ្ឋាន ខេមបូហ្វាម បានឲ្យដឹងទៀតថា ទន្សាយដែលមានជំងឺរាគ ងាយនឹងងាប់ ក្នុងរយៈពេលត្រឹមតែ ១ថ្ងៃប៉ណ្ណោះ។ ចំណែកឯទីតាំង ដែលល្អសម្រាប់ទន្សាយរស់នៅ គឺជាកន្លែងដែលត្រជាក់៕
Tag:
កែវ ម៉ាឡែន
ទន្សាយ
© រក្សាសិទ្ធិដោយ thmeythmey.com