ជាតិ
នៅចុងឆ្នាំ២០២០ ស្រុកបន្ទាយស្រីនឹងមានអំពូលបំភ្លឺមុខផ្ទះទាំងអស់
× សៀមរាប៖ យុទ្ធនាការ «ផ្ទះ១អំពូល១» ត្រូវបានដាក់ឱ្យដំណើរការហើយ ដោយភូមិព្រះដាក់ត្រូវបានជ្រើសរើសជាភូមិដំបូងក្នុងការសាកល្បងយុទ្ធនាការនេះ។ អភិបាលស្រុកបន្ទាយស្រី មានមហិច្ឆតាចង់ប្រែក្លាយស្រុកមួយនេះឱ្យមានការរីកចម្រើនគ្រប់វិស័យ និងមានសុវត្ថិភាពទាំងពេលថ្ងៃនិងយប់ ដោយក្នុងនោះលោកអភិបាលស្រុកបានប្រកាសថានឹងរៀបចំឱ្យផ្ទះទាំងអស់ក្នុងស្រុកនេះមានអំពូលបំភ្លឺមុខផ្ទះនៅត្រឹមចុងឆ្នាំ២០២០។
ប្រជាពលរដ្ឋភូមិព្រះដាក់ចំនួន ៥១៨ ខ្នងផ្ទះ បានមកទទួលយកអំពូលដើរដោយថាមពលពន្លឺព្រះអាទិត្យ ឬអំពូលសូឡា ដែលរដ្ឋបាលស្រុកបន្ទាយស្រី រៀបចំពិធីចែកនៅបរិវេណវត្តព្រះដាក់ នៅព្រឹកថ្ងៃទី២៦ ធ្នូ។ ម្នាក់នីមួយៗ ទទួលបានអំពូលសូឡាមួយ រួមនិងបង្គោលភ្លើងមួយ។
អភិបាលស្រុកបន្ទាយស្រី លោក ឃឹម ហ្វីណង់ បានឱ្យដឹងថា គម្រោងទីមួយនេះរដ្ឋបាលស្រុកទទួលបានកិច្ចការជាមួយវិស័យឯកជន ដោយប្រជាពលរដ្ឋមួយផ្ទះ ទទួលបានអំពូលបំន្លឺមុខផ្ទះមួយដោយឥតគិតថ្លៃ ឬជាការផ្តល់អំណោយដល់អ្នកភូមិព្រះដាក់។ លោក ហ្វីណង់ ពន្យល់ថា លោកមិនចង់ឱ្យមានគោលការណ៍ជាការផ្តល់អំណោយបែបនេះទេ ព្រោះលោកជឿថា ការងារនេះមិនយូរអង្វែងនិងមិនសូវមានប្រសិទ្ធភាព អ្វីដែលលោកអភិបាលចង់បាននោះ គឺចង់ឱ្យពលរដ្ឋចូលជាបដិភាគមួយផ្នែកណាមួយក្នុងយុទ្ធនាការនេះ។ «គម្រោងនេះត្រូវការរូបមន្តផ្សេងៗគ្នា លើកទី១ផ្តល់ជាអំណោយ តែទៅថ្ងៃមុនវានឹងមានហានិភ័យ ខ្ញុំចង់ធ្វើជាគម្រោងថវិកាបដិភាគ... គម្រោងផ្សេងៗទៀត អាចធ្វើតាមរយៈបុណ្យផ្កា ឬគម្រោងអ្នកមានចូលរួមជួយអ្នកខ្វះខាត»។ លោក ហ្វីណង់ បន្ត។
គម្រោង ផ្ទះ១អំពូល១ ដែលជាគំនិតផ្ដួចផ្តើមរបស់អភិបាលស្រុកបន្ទាយស្រី ធ្វើឡើងក្នុងបំណងប្រែក្លាយស្រុកនេះ ទៅជាតំបន់ដែលមានភាពស្រស់ស្អាត ក្លាយជាទីក្រុងទី២បន្ទាប់ពីក្រុងសៀមរាប។ បន្ថែមពីនេះ យុទ្ធនាការនេះក៏ដើម្បីជួយកាត់បន្ថយគ្រោះថ្នាក់ចរាចរណ៍ បង្កើនសុវត្ថិភាពនាពេលយប់ និងជាភូមិមានសុវត្ថិភាព។ លោក ហ្វីណង់ ប្រាប់ថា ហេតុផលដែលលោកជ្រើសរើសភូមិព្រះដាក់ជាគម្រោងសាកល្បងនេះ ព្រោះភូមិនេះជាទីប្រជុំជនមានផ្ទះនៅជាប់ៗគ្នាងាយស្រួលសិក្សាពីការសាកល្បងនេះ ពិសេសភូមិនេះមានភាពល្បីល្បាញនិងនៅជិតក្រុង និងមានភាពងាយស្រួលអាចសិក្សាពីការសាកល្បងនេះ៕
Tag:
ផ្ទះ១អំពូល១
ឃឹម ហ្វីណង់
© រក្សាសិទ្ធិដោយ thmeythmey.com