អន្តរជាតិ
ចិន និងរុស្ស៊ី បន្តរកការគាំទ្រដើម្បីបន្ធូរទណ្ឌកម្មលើកូរ៉េខាងជើង ក្រុមប្រឹក្សាសន្តិសុខអង្គការសហប្រជាជាតិ។ រូបភាព៖ AP
× ក្រុមប្រឹក្សាសន្តិសុខនៅថ្ងៃទី ៣០ ខែធ្នូ នឹងបើកកិច្ចប្រជុំមិនផ្លូវការ តាមសំណើរបស់ចិន និងរុស្ស៊ី លុបចោលទណ្ឌកម្មសេដ្ឋកិច្ចលើកូរ៉េខាងជើងមួយចំនួនធំ។ កិច្ចប្រជុំក្រុមប្រឹក្សាសន្តិសុខនៅពេលនេះ គឺធ្វើឡើងតែមួយថ្ងៃប៉ុណ្ណោះ មុនថ្ងៃឱសានវាទដំណាច់ឆ្នាំរបស់កូរ៉េខាងជើងមកដល់។
ចិន និងរុស្ស៊ី បានស្នើក្រុមប្រឹក្សាសន្តិសុខបើកកិច្ចប្រជុំនៅដើមខែធ្នូមក ដើម្បីជជែកពីការលុបចោលទណ្ឌកម្មសេដ្ឋកិច្ចលើកូរ៉េខាងជើង។ បើតាមសំណើរបស់ចិន និងរុស្ស៊ី ក្រុមប្រឹក្សាសន្តិសុខ គួរតែលុបចោល បំរាមនាំចេញរបស់កូរ៉េខាងជើងដូចជា គ្រឿងសមុទ្រ វាយទណ្ឌ(សំលៀកបំពាក់) និងបន្ធូរបន្ថយការរឹតត្បិតកម្មករកូរ៉េខាងជើងនៅបរទេស។ កិច្ចប្រជុំលើកទីមួយ មិនបានសម្រេចឡើយ។ ឯនេះគឺជាកិច្ចប្រជុំលើកទីពីរ។
សំណើរបស់ចិន និងរុស្ស៊ីបែបនេះ បានបង្កឲ្យមានភាពមិនពេញចិត្តពីសំណាក់មន្ត្រីការទូតរបស់ក្រុមប្រឹក្សាសន្តិសុខ។ តាមរយៈការលើកឡើងរបស់មន្ត្រីការទូតជាច្រើន ដែលសុំមិនបញ្ចេញអត្តសញ្ញាណ ការស្នើរបស់ចិន និងរុស្ស៊ី ឲ្យលើកចោលទណ្ឌកម្មលើកូរ៉េខាងជើងយ៉ាងច្រើនបែបនេះ គឺអាចបំផ្លាញដល់សាមគ្គីភាពក្នុងចំណោមក្រុមប្រឹក្សាសន្តិសុខ ដែលបានអនុម័តដំណោះស្រាយដាក់ទណ្ឌកម្មនៅឆ្នាំ ២០១៦ និងឆ្នាំ២០១៧ មក។
អ្នកការទូតក្រុមប្រឹក្សាសន្តិសុខ បានបន្តទៀតថា អាមេរិក បានដាក់សេចក្តីថ្លែងការណ៍ព្រាងមួយ ជុំវិញទណ្ឌកម្មកូរ៉េខាងជើងនេះ ប៉ុន្តែត្រូវបានរុស្ស៊ី និងចិនច្រានចោល ហើយស្នើឲ្យបើកកិច្ចប្រជុំលើកទីពីរនេះ ជំនួសវិញ។ នេះបើតាមទីភ្នាក់ងារព័ត៌មាន Reuter។
ចំណែកមន្ត្រីការទូតម្នាក់ ដែលសុំមិនបញ្ចេញឈ្មោះដែរ បានចោទចិន និងរុស្ស៊ីចំៗថា ប្រទេសទាំងពីរកំពុងជួសសម្រួលកូរ៉េខាងជើងផងដែរ។ ក្នុងនោះរួមមានការតាក់តែងសេចក្តីព្រាងពីសំណាក់ទីក្រុងព្យុងយ៉ាងផ្ទាល់ មុននឹងដាក់ទៅក្រុមប្រឹក្សាសន្តិសុខ។ មន្ត្រីការទូតរូបនេះ បានបញ្ជាក់ថា ក្រុមប្រឹក្សាសន្តិសុខមិនអាចគាំទ្រ សំណើរបស់ទីក្រុងប៉េកាំង និងទីក្រុងមូស្គូបានទេ ព្រោះវាប្រៀបដូចជាគាំទ្រការអភិវឌ្ឍកម្មវិធីអាវុធរបស់កូរ៉េខាងជើងដែរ។
ជាការពិតណាស់ ចិន និងរុស្ស៊ី បានស្នើឲ្យក្រុមប្រឹក្សាសន្តិសុខអង្គការសហប្រជាជាតិឲ្យលុបចោលទណ្ឌកម្មកូរ៉េខាងជើងច្រើន ដើម្បីជាសម្បទានឲ្យកូរ៉េខាងជើង ព្រមចូលតុចរចាជាមួយអាមេរិក ហើយឥឡូវនេះ អាមេរិក អង់គ្លេស និងបារាំង កំពុងពិចារណាអំពីបញ្ហានេះ។
សូមបញ្ជាក់ថា ទណ្ឌកម្មសេដ្ឋកិច្ចរបស់ក្រុមប្រឹក្សាសន្តិសុខ ដែលដាក់លើកូរ៉េខាងជើងតាំងពីឆ្នាំ២០១៦ និង ២០១៧នេះ បានធ្វើឲ្យកូរ៉េខាងជើង បាត់បង់ចំណូលជាច្រើនរយលានដុល្លារក្នុងមួយឆ្នាំ។ ជាពិសេសកិច្ចប្រជុំលើកនេះ គឺធ្វើឡើងមុនតែមួយថ្ងៃប៉ុណ្ណោះ ដែលកូរ៉េខាងជើងព្រមានថា នឹងផ្តល់កាដូដ៍សាកសមសម្រាប់អាមេរិក នាដំណាច់ឆ្នាំ បើអាមេរិកនៅតែមិនផ្លាស់ប្តូររបៀបវារៈរបស់ខ្លួន ក្នុងកិច្ចចរចារំសាយកម្មវិធីនុយក្លេអ៊ែរ ៕
Tag:
UNSC
កូរ៉េខាងជើង
ចិន
រុស្ស៊ី
© រក្សាសិទ្ធិដោយ thmeythmey.com