អន្តរជាតិ
ចិនចេញច្បាប់ថ្មីការពារវេជ្ជបណ្ឌិត ក្រោយគ្រូពេទ្យស្រីម្នាក់ត្រូវចាក់ស្លាប់ ប្រភពរូប៖ AFP
× ប្រទេស ចិន បានដាក់ចេញច្បាប់ថ្មីមួយជាមួយគោលដៅបង្ការអំពើហិង្សាប្រឆាំងបុគ្គលិកផ្នែកវេជ្ជសាស្ត្រ។ ការប្រកាសនេះ ធ្វើឡើងប៉ុន្មានថ្ងៃប៉ុណ្ណោះក្រោយពីគ្រូពេទ្យស្រីម្នាក់ ត្រូវបានចាក់សម្លាប់ នៅមន្ទីរពេទ្យមួយនៅទីក្រុង ប៉េកាំង។
ច្បាប់នេះ នឹងហាមឃាត់រាល់បុគ្គល ឬស្ថាប័នទាំងអស់ពីការគំរាមកំហែង ឬបៀតបៀនដល់សុវត្ថិភាពផ្ទាល់ខ្លួន ឬសេចក្តីថ្លៃថ្នូររបស់បុគ្គលិកវេជ្ជសាស្ត្ររួមមាន គ្រូពេទ្យ និងអ្នកមើលថែអ្នកជំងឺជាដើម។ នេះបើការចុះផ្សាយរបស់សារព័ត៌មានរដ្ឋចិន ។ ច្បាប់នេះ នឹងចូលជាធរមាន នាថ្ងៃ ០១ មិថុនា ឆ្នាំ២០២០ តទៅ។
ក្រោមច្បាប់នេះ បុគ្គលដែលល្មើសបម្រាម នឹងត្រូវទទួលទោសរដ្ឋបាល ដូចជា ការឃុំខ្លួន ឬពិន័យជាប្រាក់។ ទន្ទឹមនេះ វាក៏នឹងដាក់ទោសមនុស្សដែលរកឃើញថា ទទួលយក ប្រើប្រាស់ ឬទម្លាយព័ត៌មានសុខភាពឯកជនរបស់អ្នកជំងឺដោយខុសច្បាប់ផងដែរ។
ការដាក់ចេញច្បាប់នេះ ធ្វើឡើងក្រោយពី គ្រូពេទ្យជនជាតិចិនភេទស្រីម្នាក់ ឈ្មោះថា Yang Wen ដែលបម្រើការនៅមន្ទីរពេទ្យ Beijing Civil Aviation General ក្នុងទីក្រុងប៉េកាំង ត្រូវបានចាក់សម្លាប់ដោយបុរសម្នាក់ កាលពីថ្ងៃ ២៤ ខែធ្នូ ឆ្នាំ២០១៩ នៅពេលរូបនាងប្រចាំការនៅវេនសង្គ្រោះបន្ទាន់។ សារព័ត៌មានចិនជាច្រើន ចុះផ្សាយថា បុរសជាជនដៃដល់ម្នាក់នោះ អាចជាសាច់ញាតិរបស់អ្នកជំងឺម្នាក់ដែលទទួលការព្យាបាលនៅវេនសង្គ្រោះបន្ទាន់ដែលនាង Yang Wen បានបម្រើការ។
មែនទែនទៅ នេះពុំមែនជាករណីហិង្សា ឬស្លាប់ទីមួយ ដែលបានកើតឡើងក្នុងមន្ទីរពេទ្យចិនឡើយ។ យោងតាមសារព័ត៌មានចិន CGTN វាមានឧបទ្ទវហេតុស្រដៀងគ្នានេះ យ៉ាងតិច ១២ ករណី ដែលពាក់ព័ន្ធនឹងអំពើហិង្សា ហើយបុគ្គលិកផ្នែកវេជ្ជសាស្ត្រ ២ នាក់ ត្រូវបានគេសម្លាប់ក្នុងឆ្នាំ ២០១៨ ។
បើតាមការស្ទង់មតិមួយ កាលពីថ្មីៗនេះ ដោយវេបសាយអនឡាញមួយឈ្មោះថា Dingxiang Yuan គ្រូពេទ្យប្រមាណ ៨០ភាគរយ មានបទពិសោធទទួលរងអំពើហិង្សានៅកន្លែងធ្វើការពួកគេ។ អត្ថបទដដែលនេះ ចោទជាសំណួរថា៖« គ្រូពេទ្យមានទំនួសខុសត្រូវការពារសង្គមពីជំងឺព្យាបាទ។ តើនរណាការពារគ្រូពេទ្យ?»។
សូមបញ្ជាក់ថា ក្នុងខែតុលា ឆ្នាំ២០១៩ ស្ត្រីជាវេជ្ជបណ្ឌិតម្នាក់ ត្រូវបានចាក់សម្លាប់ដោយអ្នកជំងឺមហារីកម្នាក់ នៅមន្ទីរពេទ្យមួយ ក្នុងខេត្ត Lanzhou ប្រទេសចិន។ ហើយកាលពីខែ សីហា ឆ្នាំ២០១៨ វេជ្ជបណ្ឌិតម្នាក់នៅមន្ទីរពេទ្យក្នុងទីក្រុង Tianjin ត្រូវបានចាក់សម្លាប់ ដោយបុរសបីនាក់ ។ ប៉ុន្មានខែកន្លងទៅនេះ វេជ្ជបណ្ឌិតចិនម្នាក់ទៀត ក្នុងខេត្ត Anhui ត្រូវបានចាក់សម្លាប់ក្រោយពីឈ្លោះប្រកែកជាមួយស្វាមីអ្នកជំងឺម្នាក់។ បច្ចុប្បន្ន មន្ទីរពេទ្យខ្លះក្នុងប្រទេសចិន បានចាប់ផ្តើមបង្ហាត់បង្រៀនបុគ្គលិកវេជ្ជសាស្ត្រពីវិធីសាស្ត្រការពារខ្លួន៕
Tag:
ចិន
វេជ្ជបណ្ឌិត
ច្បាប់
© រក្សាសិទ្ធិដោយ thmeythmey.com