លោកពូទីន អរគុណលោកត្រាំដែលផ្តល់ព័ត៌មានសម្ងាត់ជួយរុស្ស៊ីផុតពីការវាយប្រហារភេរវកម្ម

អន្តរជាតិ

លោកពូទីន អរគុណលោកត្រាំដែលផ្តល់ព័ត៌មានសម្ងាត់ជួយរុស្ស៊ីផុតពីការវាយប្រហារភេរវកម្ម

30, Dec 2019 , 9:59 pm

រូបភាព

លោក ពូទីន (ឆ្វេង) និងលោក ដូណាល់ ត្រាំ (AFP)

ដោយ:

ប្រធានាធិបតីរុស្ស៊ី វ្ល៉ាឌីមៀ ពូទីន បានអរគុណដល់សមភាគីអាមេរិក ដូណាល់ ត្រាំ សម្រាប់ព័ត៌មានសម្ងាត់ដែលបានជួយឲ្យរុស្ស៊ីរួចផុតពីការវាយប្រហារភេរកម្ម នាពេលឆ្លងឆ្នាំថ្មី ២០២០ ខាងមុខ។ នេះបើតាមសេចក្តីថ្លែងការណ៍របស់វិមានក្រេមឡាំង។

មេដឹកនាំរុស្ស៊ី និងអាមេរិកបានពិភាក្សាគ្នាតាមរយៈទូរសព្ទ នៅថ្ងៃអាទិត្យ ២៩ ខែធ្នូ ។ វិមានក្រេមឡាំង បញ្ជាក់បែបនេះ ដោយបន្ថែមថា ព័ត៌មានអំពីការប៉ុនប៉ងវាយប្រហារភេរវកម្មដែលក្រុងមូស្គូទទួលបាន គឺតាមរយៈភ្នាក់ងារសម្ងាត់របស់សហរដ្ឋអាមេរិក ។ ក៏ប៉ុន្តែ វិមានក្រេមឡាំង ពុំបានបញ្ជាក់ព័ត៌មានលម្អិតជុំវិញរឿងនេះឡើយ។

សារព័ត៌មានក្នុងស្រុករុស្ស៊ី នៅពេលថ្មីៗនេះ បានចុះផ្សាយពីការរកឃើញផែនការវាយប្រហារលើទីក្រុង St Petersburg ដែលជាទីក្រុងផែជាប់សមុទ្រ Baltic នាពេលឆ្លងឆ្នាំថ្មី ២០២០ ខាងមុខ។ ទាក់ទិននឹងរឿងនេះ ជនជាតិរុស្ស៊ី ២ នាក់ ត្រូវបានចាប់ឃាត់ខ្លួន ហើយគម្រោងវាយប្រហារលើទីប្រជុំជនរបស់ពួកគេ ត្រូវបានទប់ស្កាត់។ នេះបើតាមការចុះផ្សាយរបស់ទីភ្នាក់ងារព័ត៌មានរុស្ស៊ី TASS ដោយដកស្រង់ការលើកឡើងរបស់ទីភ្នាក់ងារសម្ងាត់រុស្ស៊ី (FSB) ។

វិមានក្រេមឡាំង លើកឡើងទៀតថា អំឡុងកិច្ចសន្ទនាតាមរយៈទូរសព្ទដដែល លោក ពូទីន បានសន្យាជួយផ្តល់ព័ត៌មានទៅវិញ អំពីការគំរាមកំហែងភេរវកម្មប្រឆាំងសហរដ្ឋអាមេរិក។ មែនទែនទៅ ចាប់តាំងពីឡើងកាន់តំណែងជាប្រធានាធិបតីអាមេរិក លោកប្រធានាធិបតី ពូទីន និងលោកត្រាំ បានជជែកពិភាក្សាតាមរយៈទូរសព្ទ និងដោយផ្ទាល់ ជាច្រើនលើក ហើយសម្រាប់កិច្ចសន្ទនាកន្លងមក មេដឹកនាំទាំងពីរ ជារឿយៗ ជជែកពីបញ្ហាស៊ីរី កិច្ចព្រមព្រៀងនុយក្លេអ៊ែររបស់កូរ៉េខាងជើង ក៏ដូចជាពាណិជ្ជកម្ម។

គួររំឭកថា កាលពីខែធ្នូ ឆ្នាំ២០១៧ លោក ពូទីន ក៏ធ្លាប់អរគុណដល់លោកប្រធានាធិបតី ដូណាល់ ត្រាំ សម្រាប់ការព្រមានផ្សេងមួយទៀតពីសំណាក់ភ្នាក់សម្ងាត់អាមេរិក ដែលម្តងទៀតត្រូវបានគេមើលឃើញថា បញ្ចៀសផែនការភេរវកម្មមួយក្នុងទីក្រុង St Petersburg ។ ដោយមានទំនាក់ទំនងល្អរវាងបុគ្គលនឹងបុគ្គល មេដឹកនាំទាំងពីរ ក៏បានប្តេជ្ញាសហការគ្នាក្នុងគោលដៅប្រយុទ្ធប្រឆាំងនឹងអំពើភេរវកម្ម ដោយប្រទេសទាំងពីរ យល់ឃើញ ពួកគេរងការគំរាមកំហែងដូចគ្នាពីសំណាក់ក្រុមរដ្ឋឥស្លាម ISIS៕