ភ្នំពេញ៖ ស្ត្រីរៀនជំនាញជួសជុលរថយន្ត? ធ្វើការក្រោមរថយន្ត? ដៃ ជើង ខោអាវ ប្រឡាក់ប្រេងម៉ាស៊ីន? ការលើកឡើងនេះ មិនមែនជាឧបសគ្គសម្រាប់កញ្ញា ហង់ ណាវី ដែលខំប្រឹងរៀនរហូតដល់បញ្ចប់ជំនាញយានសាស្ត្ររថយន្តឡើយ។ មានវ័យ២៤ឆ្នាំ កញ្ញា ហង់ ណាវី បច្ចុប្បន្នជាអ្នកគ្រប់គ្រងយានដ្ឋាន នាវិទ្យាស្ថានពហុបច្ចេកទេសភូមិភាគតេជោសែនតាកែវ។ បើតាមកញ្ញា ហង់ ណាវី ដោយសារក្ដីស្រឡាញ់ ជំរុញឲ្យរៀនជំនាញបច្ចេកទេសបែបនេះ។
កញ្ញា ហង់ ណាវី ជាអតីតនិស្សិតសិក្សាជំនាញយានសាស្ត្ររថយន្ត នៃវិទ្យាស្ថានពហុបច្ចេកទេសភូមិភាគតេជោសែនតាកែវ។ យុវតីវ័យ២៤ឆ្នាំរូបនេះ បានបញ្ចប់ការសិក្សាជំនាញយានសាស្ត្ររថយន្តនៅឆ្នាំ២០១៧ ដោយបច្ចុប្បន្ននាងជាអ្នកគ្រប់គ្រងយានដ្ឋាន នាវិទ្យាស្ថានពហុបច្ចេកទេសភូមិភាគតេជោសែនតាកែវ។
រូបភាពពីហ្វេសប៊ុកកញ្ញា ហង់ ណាវី
ជំនាញបច្ចេកទេសជួសជុលរថយន្តនេះ មិនសូវមាននិស្សិតស្រីសិក្សាឡើយ ជាពិសេស គេគិតជំនាញនេះ សម្រាប់តែនិស្សិតប្រុសប៉ុណ្ណោះ។ កញ្ញា ហង់ ណាវី រៀបរាប់យ៉ាងដូច្នេះថា៖ «ពេលចូលរៀនដំបូង គ្រូៗ គាត់ឆ្ងល់ថាហេតុអ្វីខ្ញុំ មករៀនជំនាញនេះ ព្រោះមិនដែលមានសិស្សស្រីមករៀនទេ។ ខ្ញុំឆ្លើយប្រាប់ថា ស្រីប្រុសបើយើងនៅតែប្រកាន់អញ្ចឹង មិនទៅមុខទេ។ ម្យ៉ាងទៀត ខ្ញុំប្រាប់គាត់ថាខ្ញុំស្រឡាញ់ជំនាញនេះ គាត់ថា បើស្រឡាញ់ហ៊ានអត់ ខ្ញុំថា ធ្វើអ្វីក៏ខ្ញុំធ្វើដែរឲ្យតែចេះ»។
រូបភាពពីហ្វេសប៊ុកកញ្ញា ហង់ ណាវី
កត្តាដែលជំរុញឲ្យ ហង់ ណាវី ចាប់ចិត្តនឹងជំនាញបច្ចេកទេសនេះ គឺក្ដីស្រឡាញ់។ ក្ដីស្រឡាញ់លើជំនាញបច្ចេកទេស បានធ្វើឲ្យណាវី ហ៊ានប្រឆាំងជាមួយឪពុកម្ដាយ ដែលចង់ឲ្យរៀនជំនាញគណនេយ្យ។ កញ្ញា ហង់ ណាវី ប្រាប់យ៉ាងដូច្នេះ៖ «មុនដំបូងគាត់មិនឲ្យរៀនជំនាញនេះទេ គាត់ថារូបរាងស្អាតហើយទៅរៀនអីជំនាញអញ្ចឹង ខុសគេខុសឯង គាត់ឲ្យខ្ញុំរៀនគណនេយ្យវិញ។ ខ្ញុំថាខ្ញុំអត់រៀនទេ ខ្ញុំអត់ចូលចិត្តជំនាញគណនេយ្យ»។
រូបភាពពីហ្វេសប៊ុកកញ្ញា ហង់ ណាវី
ការខិតខំប្រឹងប្រែង តស៊ូ ផ្ដល់ជាលទ្ធផលល្អដល់និស្សិតស្រី ហង់ ណាវី ដែលធ្វើឲ្យឪពុកម្ដាយជឿជាក់លើជំនាញដែលនាងជ្រើសរើស។ ជាកូនច្បង ក្នុងចំណោមបងប្អូន៣នាក់ ហង់ ណាវី និយាយថា នៅឆ្នាំដំបូងឪពុកម្ដាយនាងមិនគាំទ្រឡើយ ប៉ុន្តែក្រោយមកពួកគាត់យល់ពីជំនាញនេះ ក៏សម្រចចិត្តឲ្យនាងរៀនជំនាញតាមក្ដីស្រឡាញ់របស់នាង។
មានស្រុកកំណើតនៅខេត្តតាកែវ ហង់ ណាវី យល់ថាជំនាញបច្ចេកទេសមិនសូវមានអ្នករៀន ម្យ៉ាងបច្ចុប្បន្នរោងចក្រ ឧស្សាហកម្ម និងយានយន្តនៅកម្ពុជាមានការកើនឡើង ដែលជួយឲ្យរកចំណូលបានកាន់តែច្រើន។ តាមរយៈជំនាញដែលកើតពីក្ដីស្រឡាញ់នេះ កញ្ញា ហង់ ណាវី មានគោលបំណងយ៉ាងដូច្នេះ៖ « ខ្ញុំស្រឡាញ់ជំនាញនេះ និងចង់បង្កើតអាជីវកម្មខ្នាតតូចមួយ ដោយខ្លួនឯង មិនចង់ពឹងពាក់គ្រួសារ។ បើខ្ញុំអាចបើកយានដ្ឋាន គឺអាចជួយការងារក្មេងៗជំនាន់ក្រោយបានមួយផ្នែកដែរ បើខ្ញុំទៅធ្វើការឲ្យគេ ខ្ញុំមិនអាចជួយអ្នកដទៃបានទេ។ តែបើយើងព្យាយាម ខំប្រឹង តស៊ូទៅថ្ងៃមុខ យើងអាចបើកអាជីវកម្មខ្នាតតូចមួយ ពេលអាជីវកម្មយើងដើរ យើងអាចផ្ដល់ការងារដល់ប្រជាជនក្នុងភូមិបាន»។
រូបភាពពីហ្វេសប៊ុកកញ្ញា ហង់ ណាវី
ជំនាញជួសជុលរថយន្តនេះ ពេលខ្លះត្រូវធ្វើការក្រោមកម្ដៅថ្ងៃ និងនៅក្រោមរថយន្ត ពិសេសត្រូវប្រើកម្លាំងខ្លាំង។ កញ្ញា ណាវី និយាយថា ជួសជុលរថយន្តត្រូវប្រឡូកប្រឡាក់ នឹងប្រេងម៉ាស៊ីន ដោយប្រែពីមនុស្សស្រីមកមនុស្សប្រុស ហើយនាងមិនអាចទុកក្រចកស្អាតដូចមុនឡើយ។ «នៅពេលដែលយើងស្រឡាញ់អ្វីមួយ ទោះបីមានឧបសគ្គ គឺទ្រាំ»។ នេះជាការលើកឡើងរបស់កញ្ញា ហង់ ណាវី។
បើតាមកញ្ញា ហង់ ណាវី ជំនាញយានសាស្ត្ររថយន្តនេះ មាននិស្សិតស្រី តែ២នាក់ប៉ុណ្ណោះ ដែលសិក្សា ប៉ុន្តែដោយសារជំនាញនេះ មានផលលំបាក ធ្វើឲ្យនិស្សិតស្រីម្នាក់ សម្រេចចិត្តឈប់រៀន ខណៈនាងបន្តរៀនរហូតដល់បញ្ចប់។ ក្រោយបញ្ចប់ការសិក្សាជំនាញបច្ចេកទេសរយៈពេល ២ឆ្នាំ ណាវី ចេះទាំងជំនាញជួសជុលម៉ូតូ និងរថយន្ត។
រូបភាពពីហ្វេសប៊ុកកញ្ញា ហង់ ណាវី
ទោះបីរៀនចប់ក្ដី ណាវី ក៏នៅតែសិក្សាស្រាវជ្រាវនៅតាមសៀវភៅ ប្រព័ន្ធអ៊ីនធឺណិត និងចុះទៅកន្លែងជាងផ្ទាល់។ យុវតីរូបនេះ ក៏អំពាវនាវដល់និស្សិតស្រី ឲ្យងាកមករៀនជំនាញបច្ចេកទេស ដែលអាចជួយដល់សេដ្ឋកិច្ចប្រទេស និងមិនបាច់ចំណាយស្រុក ជាពិសេសងាយរកការងារធ្វើ។ ប្រសិនបើមានឱកាស កញ្ញា ហង់ ណាវី នឹងរៀនជំនាញនេះបន្តទៀត៕