អន្តរជាតិ
រូបភាព៖ Thaiger
×![]()
គ្រោះថ្នាក់ចរាចរណ៍នៅប្រទេសថៃ ដែលបានកើតឡើងចំនួន ១៩៨៨ ករណី បានសម្លាប់មនុស្ស ២០៨ នាក់ និងរបួស ២០៣១នាក់ អំឡុងពេល៤ថ្ងៃនៃដំណើរកម្សាន្តឆ្លងឆ្នាំថ្មី ២០២០ រាប់ចាប់ពីថ្ងៃសុក្រ ដល់ថ្ងៃចន្ទ ៣០ ធ្នូ ឆ្នាំ២០១៩ ។
តាមការចុះផ្សាយរបស់កាសែតបាងកកប៉ុស្តិ៍ មន្ត្រីថៃ បានអះអាងនៅថ្ងៃអង្គារ ទី៣១ ខែធ្នូ ថា តួលេខអ្នកស្លាប់និងរបួស នៅតែមានកម្រិតខ្ពស់ ទោះបីជាអាជ្ញាធរព្យាយាមធ្វើយុទ្ធនាការដើម្បីសុវត្ថិភាពចរាចរណ៍ក៏ដោយ។ តួលេខករណីគ្រោះថ្នាក់ចរាចរណ៍ខ្ពស់បំផុត គឺកើតឡើងក្នុងខេត្ត ឈៀងម៉ៃ ដែលជាទិសដៅទេសចរណ៍ពេញនិយមបំផុត គឺមានដល់ទៅ ៦១ករណី។
តាមប្រភពដដែល នៅថ្ងៃអង្គារនេះ អាជ្ញាធរថៃ បន្តពង្រឹងកិច្ចប្រឹងប្រែងក្នុងការអនុវត្តយុទ្ធនាការសម្រាប់សុវត្ថិភាពផ្លូវថ្នល់ ព្រោះថាមនុស្សភាគច្រើន នឹងនាំគ្នាអបអរសាទរបុណ្យឆ្លងឆ្នាំសកល ហើយវាងាយនឹងកើតគ្រោះថ្នាក់ចរាចរណ៍ខ្លាំងណាស់។
បើរាប់តែថ្ងៃចន្ទ គ្រោះថ្នាក់ចរាចរណ៍នៅថៃ បានកើតឡើងចំនួន ៤៨៥ករណី ដែលក្នុងនោះ មនុស្ស ៤៨នាក់ បានស្លាប់ និង ៤៨៤ នាក់ផ្សេងទៀត រងរបួស។ ការផឹកគ្រឿងស្រវឹងហើយបើកបរនៅតែជាមូលហេតុដ៏ធំ ដែលស្មើនឹង ៣៣ ភាគរយ និងបើកដោយល្បឿនលឿន ស្មើនឹង ២៨ភាគរយ។ ក្នុងគ្រោះថ្នាក់ទាំងអស់ អ្នកបើកបរម៉ូតូរងគ្រោះច្រើនជាងគេ ដែលស្មើនឹង ៨១,៨ភាគរយ។ ម្យ៉ាងវិញទៀត ចាប់ពីថ្ងៃសុក្រ ទី២៧ ខែធ្នូ ដល់ថ្ងៃចន្ទ ទី៣០ ខែធ្នូ មនុស្សចំនួន ៤៨៥៦នាក់ ត្រូវបានកាត់ទោសពីបទផឹកគ្រឿងស្រវឹងហើយបើកបរ និង ៦៣នាក់នៃពួកគេ បានបំពានផ្ទួនៗ។
សូមបញ្ជាក់ថា មនុស្ស ១៣ ៦៩២នាក់ បានស្លាប់ និង៧៥៧ ០១០ នាក់រងរបួស ដោយសារគ្រោះថ្នាក់ចរាចរណ៍ក្នុងប្រទេសថៃ អំឡុងពេល១០ខែដំបូងនៃឆ្នាំ២០១៩នេះ ។ ជាមធ្យម គ្រោះថ្នាក់ចរាចរណ៍ សម្លាប់មនុស្ស ៤៥នាក់ក្នុងមួយថ្ងៃ។ នេះបើតាមរបាយការណ៍ចុងក្រោយ ចុះផ្សាយដោយកាសែតបាងកកប៉ុស្តិ៍។ បើតាមអង្គការសុខភាពពិភពលោក (WHO) ប្រទេសថៃ ជាប់ចំណាត់ថ្នាក់ជាប្រទេសលំដាប់ទី៨ ដែលមានអត្រាគ្រោះថ្នាក់ចរាចរណ៍អាក្រក់បំផុតលើពិភពលោក៕
Tag:
ថៃ
គ្រោះថ្នាក់ចរាចរណ៍
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
