អន្តរជាតិ
ស៊ូដង់ កាត់ទោសប្រហារជីវិតមន្ត្រីចារកម្ម២៩នាក់រឿងសម្លាប់គ្រូបង្រៀនម្នាក់នៅមន្ទីរឃុំឃាំង
× តុលការស៊ូដង់ នៅថ្ងៃទី៣១ ខែធ្នូ បានសម្រេចកាត់ទោសប្រហារជីវិតមន្ត្រីចារកម្ម ២៩ នាក់ ក្នុងសំណុំរឿងធ្វើទារុណកម្ម និងសម្លាប់គ្រូបង្រៀនម្នាក់ អំឡុងពេលឃុំឃាំងខ្លួន។
គ្រូបង្រៀនរូបនោះឈ្មោះថា Ahmad al-Khair អាយុ ៣៦ ឆ្នាំ បានស្លាប់ក្នុងមន្ទីរឃុំឃាំង កាលពីខែកុម្ភៈ ក្រោយពីលោកត្រូវបានចាប់ខ្លួនដោយសារចូលរួមធ្វើបាតុកម្មប្រឆាំងអតីតមេដឹកនាំក្រាញអំណាចរបស់ស៊ូដង់ គឺលោក អូម៉ា អាល់-បាសៀ។
ជនជាប់ចោទ ត្រូវបានរកឃើញថាមានទោសពាក់ព័ន្ធនឹងឃាតកម្មលើលោកគ្រូ Ahmed al-KHair ហើយតុលាការបានសម្រេចកាត់ទោសពួកគេដោយការព្យួរក ។ នេះបើតាមការចុះផ្សាយរបស់ទូរទស្សន៍កាតា Aljazeera ដោយដកស្រង់សម្តីរបស់ចៅក្រម Sadok Abdelrahman ។
ចៅក្រមរូបនេះ បញ្ជាក់ទៀតថា គ្រូបង្រៀនម្នាក់នេះ ត្រូវបានវាយដំ និងរងការធ្វើទារុណកម្មរហូតដល់ស្លាប់ នៅមន្ទីរឃុំឃាំង ក្នុងរដ្ឋ Kassala ភាគខាងកើតនៃប្រទេស ក្រោយលោកត្រូវបានចាប់ខ្លួន កាលពីចុងមករា ឆ្នាំ២០១៩នេះ ដោយភ្នាក់ងារចារកម្មស៊ូដង់ ។
រឿងក្តីនេះ គឺជាការទោសប្រហារលើកទីមួយរបស់តុលាការស៊ូដង់ ពាក់ព័ន្ធនឹងការបង្ក្រាបលើសកម្មជនគាំទ្រលទ្ធិប្រជាធិបតេយ្យ ក្រោយអតីតប្រធានាធិបតីស៊ូតង់ លោកបាសៀ វ័យ៧៥ឆ្នាំរូបនេះ ត្រូវបានបណ្ដេញចេញពីតំណែងកំពូលនេះក្នុងខែមេសា។
សូមបញ្ជាក់ថា ប្រជាជន បានផ្តើមធ្វើសកម្មភាពតវ៉ា តាំងពីខែធ្នូ ឆ្នាំ ២០១៨ ដែលដំបូងឡើងគឺមានគោលដៅប្រឆាំងនឹងតម្លៃនំប៉័ងខ្ពស់ ក៏ប៉ុន្តែការតវ៉ានេះ បានប្តូរទៅជាការទាមទារឲ្យលោក Al-Bashir ចុះចេញពីតំណែង។ យ៉ាងហោចណាស់ មនុស្ស ១៧០នាក់ ត្រូវបានសម្លាប់អំឡុងពេលបង្ក្រាបរាប់ខែប្រឆាំងនឹងចលនាបះបោរ។ ចុងក្រោយ លោក ត្រូវបានទម្លាក់ចេញពីតំណែងដោយយោធា ៣០ ឆ្នាំក្រោយលោកបានចូលក្តាប់អំណាចនេះដោយការធ្វើរដ្ឋប្រហារ៕
Tag:
ស៊ូដង់
គ្រូបង្រៀន
ទោសប្រហារជីវិត
© រក្សាសិទ្ធិដោយ thmeythmey.com