អន្តរជាតិ
មេធាវីអតីត CEO ក្រុមហ៊ុន Nissan ភ្ញាក់ផ្អើលក្រោយកូនក្តីរត់ចេញពីជប៉ុនទៅលីបង់
អតីតនាយកប្រតិបត្តិក្រុមហ៊ុនរថយន្ត Nissan លោក Carlos Ghosn (Reuters)
×![]()
មេធាវីម្នាក់របស់អតីតនាយកប្រតិបត្តិ (CEO) ក្រុមហ៊ុនរថយន្ត Nissan លោក Carlos Ghosn បញ្ជាក់ថា លោកភ្ញាក់ផ្អើលជាខ្លាំង ក្រោយទទួលដំណឹងថា កូនក្តីលោក បានភៀសខ្លួនទៅដល់ប្រទេសលីបង់ បន្ទាប់ទទួលការអនុញ្ញាតឲ្យក្រៅឃុំក្នុងប្រទេសជប៉ុន ។ ទាក់ទិននឹងរឿងនេះ លោក Ghosn បានអះអាងថា លោកមិនបានរត់គេចពីការប្រឈមមុខនឹងយុត្តិធម៌ឡើយ ក៏ប៉ុន្តែលោករត់គេចពី «ការកាត់ទោសផ្នែកនយោបាយ»។
ប្រាប់អ្នកសារព័ត៌មានក្នុងប្រទេសជប៉ុន កាលពីថ្ងៃអង្គារ ៣១ ធ្នូ ឆ្នាំ ២០១៩ លោក Junichiro Hironaka ដែលជាប្រធានក្រុមមេធាវីការពារក្តីឲ្យលោក Ghosn បញ្ជាក់ថា លោកពិតជាភ្ញាក់ផ្អើលជាខ្លាំងចំពោះដំណឹងអំពីការរត់ភៀសខ្លួនរបស់កូនក្តីលោក។ លោក សង្កត់ធ្ងន់ថា លោកមិនដឹងថា លោកអាចទាក់ទងលោក Ghosn បានឬអត់ទេ។ យ៉ាងណាមិញ លោក បន្ថែមថា ក្រុមលោក នៅតែកាន់កាប់លិខិតឆ្លងដែនរបស់លោក Ghosn ដដែល។
លោក Ghosn ត្រូវដោះលែងឲ្យនៅក្រៅឃុំ កាលពីខែមេសា ឆ្នាំ២០១៩ ដោយបង់លុយចំនួន ៩ លានដុល្លារ ជាមួយនឹងលក្ខខណ្ឌតឹងរ៉ឹងមួយ។ នោះគឺហាមឃាត់លោកពីការធ្វើដំណើរទៅបរទេស។ មែនទែន គេនៅតែមិនទាន់ច្បាស់ថា អតីត CEO រូបនេះ អាចចាកចេញពីប្រទេសជប៉ុនដោយរបៀបណាឡើយ។ ក៏ប៉ុន្តែ គេសង្ស័យថា លោកអាចមានលិខិតឆ្លងដែនចម្លង ដ្បិតអ្នកជំនួញខ្លះ ច្រើនតែធ្វើបែបនេះ។ សារព័ត៌មានក្នុងស្រុកលីបង់ បានចុះផ្សាយថា លោក Ghosn បានធ្វើដំណើរចេញពីប្រទេសជប៉ុនដោយប្រើប្រាស់យន្តហោះឯកជន។
តាមការចុះផ្សាយរបស់សារព័ត៌មាន BBC កាលពីថ្ងៃអង្គារ អតីត CEO របស់ក្រុមហ៊ុនផលិតរថយន្ត Nissan របស់ជប៉ុន ដែលរង់ចាំឡើងសវនាការក្នុងបទចោទធ្វើឲ្យបាត់បង់ហិរញ្ញវត្ថុ (Financial misconduct) បានបញ្ជាក់ថា លោកពិតជាបានចាកចេញពីប្រទេសជប៉ុនមែន។ ទាក់ទិននឹងការចាកចេញនេះ លោក បានអះអាងថា លោក នឹងលែងងក្លាយជាចំណាប់ខ្មាំងរបស់ប្រព័ន្ធយុត្តិធម៌ជប៉ុនដែលក្លែងក្លាយ ទីដែលទោសកំហុសត្រូវបានរៀបចំឡើង ហើយសិទ្ធិមនុស្សជាមូលដ្ឋាន ត្រូវបានគេទាត់ចោល។ ត្រង់ចំណុចនេះ លោកសង្កត់ធ្ងន់ថា លោកពុំរត់គេចពីការប្រឈមមុខនឹងយុត្តិធម៌ឡើយ ក៏ប៉ុន្តែលោកគេចពី «ការកាត់ទោសផ្នែកនយោបាយ»។
សូមបញ្ជាក់ថា បុរសវ័យ ៦៥ ឆ្នាំនេះ គឺជាបុគ្គលដែលមានឥទ្ធិពលបំផុតមួយក្នុងឧស្សាហកម្មរថយន្តសាកល។ យ៉ាងណាមិញ លោកបានបាត់បង់អំណាចនេះ នៅពេលដែលលោកត្រូវបានចាប់ឃាត់ខ្លួន ក្នុងខែវិច្ឆិកា ឆ្នាំ២០១៨ ក្នុងទីក្រុង តូក្យូ ។ ក្រោយចាប់ខ្លួន លោក បានចំណាយពេល ១០៨ ថ្ងៃ ក្នុងមន្ទីរឃុំឃាំង។ ៣ ថ្ងៃប៉ុណ្ណោះក្រោយការចាប់ខ្លួនរបស់លោក ក្រុមហ៊ុនរថយន្ត Nissan បានសម្រេចដកហូតតំណែងលោក។
លោក Carlos Ghosn ត្រូវបានចោទប្រកាន់ថា លោកបានបរាជ័យក្នុងការផ្តល់របាយការណ៍ត្រឹមត្រូវពាក់ព័ន្ធនឹងប្រាក់បៀរវត្សរបស់លោក ហើយបានបង្វែរប្រាក់ពីក្រុមហ៊ុនផលិតរថយន្តនេះ ដើម្បីរ៉ាប់រងការខាតបង់ខាងផ្នែកពាណិជ្ជកម្មផ្ទាល់ខ្លួន។ ទន្ទឹមនេះ លោក ក៏ត្រូវបានចោទប្រកាន់ថា បានផ្ទេរប្រាក់របស់ក្រុមហ៊ុន Nissan ទៅឲ្យក្រុមហ៊ុនចែកចាយមួយក្នុងប្រទេស អូម៉ង់ ហើយបានកេងប្រវ័ញ្ចលុយ ៥លានដុល្លារសម្រាប់ប្រើប្រាស់ផ្ទាល់ខ្លួនផងដែរ។ ទោះជាបែបនេះក្តី លោក Ghosn បានបដិសេធការចោទប្រកាន់ទាំងអស់៕
Tag:
ជប៉ុន
Nissan
Carlos Ghosn
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
