អន្តរជាតិ
សកម្មជនថៃ ចូលរួមយុទ្ធនាការមួយហៅថា «រាល់ថ្ងៃនិយាយថា ទេចំពោះថង់ប្លាស្ទិក» កាលពីថ្ងៃ ២៥ ខែធ្នូ ឆ្នាំ ២០១៩ នៅក្រុងបាងកក (ប្រភពរូប៖ បាងកកប៉ុស្តិ៍)
×![]()
ប្រទេស ថៃ បានផ្តើមឆ្នាំថ្មី ២០២០ ដោយការដាក់បម្រាមលើការប្រើថង់ប្លាស្ទិក នៅហាងទំនិញធំៗ ។ នេះ ជាបន្តយុទ្ធនាការដែលបង្កើតដោយរដ្ឋាភិបាលថៃ និងម្ចាស់អាជីវកម្ម ឆ្ពោះទៅកាន់ការហាមឃាត់ទាំងស្រុង ត្រឹមឆ្នាំ ២០២១ ក្នុងគោលដៅកាត់បន្ថយកាកសំណល់។ ទាក់ទិននឹងចំណាត់ការនេះ ពលរដ្ឋថៃជាអ្នកទិញទំនិញ ពេញចិត្តជាខ្លាំង។ 
ចាប់ពីថ្ងៃ ១ មករា ឆ្នាំ ២០២០ ហាងទំនិញធំៗ ចំនួន ៧៥កន្លែង និងបណ្ដាហាងទំនិញតូច និងមធ្យមជាង ២៤ ៥០០ ទីតាំងផ្សេងទៀត នៅទូទាំងរាជាណាចក្រថៃ បានយល់ព្រមអនុវត្តតាមគោលការណ៍អាទិភាពរបស់រដ្ឋមន្ត្រីបរិស្ថាននិងធនធានធម្មជាតិថៃ Varawut Silpaarcha ក្នុងការកាត់បន្ថយបរិមាណថង់ប្លាស្ទិក។
តាមការចុះផ្សាយរបស់កាសែតថៃបាងកកប៉ុស្តិ៍ ពួកគេ ប្តេជ្ញាបញ្ឈប់ការផ្តល់ថង់ប្លាស្ទិកទាំងនេះ។ ចំណែកហាងខ្លះ លក់ថង់ដែលមិនប៉ះពាល់បរិស្ថានក្នុងតម្លៃសមរម្យ ហើយពលរដ្ឋពេញចិត្តនឹងយកថង់ពួកគេពីផ្ទះពេលទៅទិញទំនិញ។
ទន្ទឹមនឹងការដាក់បម្រាមបែបនេះ ប្រជាជនថៃ ក៏និយាយថា «ទេ» ចំពោះថង់ប្លាស្ទិក ក៏ព្រោះតែកំណើនការយល់ដឹងរបស់ពលរដ្ឋថៃពាក់ព័ន្ធផលប៉ះពាល់ធ្ងន់ធ្ងររបស់វាលើបរិស្ថាន ជាពិសេស ជីវិតសត្វ។ ជាឧទាហរណ៍ ក្នុងប្រទេសថៃ កាលពីឆ្នាំមុន សត្វក្ដាន់មួយក្បាល និងកូនជ្រូកទឹកមួយក្បាល បានប្រទះឃើញថា ស្លាប់ ដោយមានប្លាស្ទិកជាច្រើនគីឡូក្រាមក្នុងពោះរបស់ពួកវា។
«ប្រទេស ថៃ ទទួលបានចំណាត់ថ្នាក់លេខ ៦ ក្នុងចំណោមប្រទេសលើពិភពលោក ដែលបោះចោលកាកសំណល់ចូលក្នុងសមុទ្រ»។ លោករដ្ឋមន្ត្រីថៃ Varawth ប្រាប់អ្នកសារព័ត៌មានបែបនេះ នៅថ្ងៃពុធ ០១ មករា ក្រោយពីលោកបានចែកថង់ដែលអាចប្រើឡើងវិញជូនសាធារណជន។ តាមការចុះផ្សាយរបស់ទីភ្នាក់ងារព័ត៌មាន Reuters លោក បញ្ជាក់ទៀតថា អំឡុងពេល៥ខែចុងក្រោយ ចំណាត់ថ្នាក់របស់ប្រទេសថៃ ធ្លាក់មកនៅលេខរៀងទី ១០។ ត្រង់នេះ លោកសូមអរគុណដល់ពលរដ្ឋថៃទាំងអស់សម្រាប់ការចូលរួម។
ក្រសួងបរិស្ថានថៃ បញ្ជាក់ថា ប្រទេសថៃបានកាត់បន្ថយការប្រើប្រាស់ថង់ប្លាស្ទិក ២លាន ឬប្រមាណ ៥៧៦៥ តោន កាលពីឆ្នាំមុន ។ នេះជាដំណាក់កាលទី១នៃយុទ្ធនាការ «រាល់ថ្ងៃ និយាយថា ទេ ចំពោះថង់ប្លាស្ទិក» ដើម្បីលើកទឹកចិត្តអ្នកទិញឲ្យបដិសេធដោយស្ម័គ្រចិត្តចំពោះការប្រើថង់ប្លាស្ទិកពីហាងទំនិញ។
យ៉ាងណាមិញ លោករដ្ឋមន្ត្រី Varawut អះអាងទៀតថា បញ្ហាប្រឈមបំផុតនៃការអនុវត្តបម្រាមនេះ គឺ ថង់ប្លាស្ទិកប្រមាណ ៤០ ភាគរយដែលប្រើនៅហាងលក់បន្លែ និងសាច់ស្រស់ៗ និងហាងទំនិញនៅទីជនបទ។ ត្រង់នេះ លោក និយាយដូច្នេះថា៖«វាមិនមែនជារឿងងាយស្រួលផ្លាស់ប្តូរការគិតនិងការប្រព្រឹត្តរបស់ប្រជាជនទាំងនោះណាស់»៕
Tag:
ថៃ
ប្លាស្ទិក
២០២០
© រក្សាសិទ្ធិដោយ thmeythmey.com
