អន្តរជាតិ
ឥណ្ឌូណេស៊ី ទាត់ចោលយុត្តាធិការចិនក្នុងតំបន់សមុទ្រសេដ្ឋកិច្ចផ្តាច់មុខរបស់ខ្លួន
រូបភាព៖ Reuters
×![]()
ដោយ: ធៀន ភារិន្ទ
ឥណ្ឌូណេស៊ី នៅថ្ងៃទី១ ខែមករា បានចេញមុខច្រានចោល ដែនយុត្តាធិការរបស់ចិនក្នុងដែនសមុទ្ររបស់ខ្លួនថា គ្មានមូលដ្ឋានច្បាប់ត្រឹមត្រូវ បន្ទាប់ពីនាវាយាមល្បាតទីក្រុងប៉េកាំង មានវត្តមានក្នុងតំបន់សមុទ្រសេដ្ឋកិច្ចផ្តាច់មុខរបស់ខ្លួន (EEC)។ 
វត្តមាននាវាយាមល្បាតចិន ក្នុងតំបន់សេដ្ឋកិច្ចផ្តាច់មុខ ដែលស្ថិតនៅភាគខាងជើងកោះ Natuna របស់ឥណ្ឌណេស៊ី បានបង្កឲ្យផ្ទុះការតវ៉ាយ៉ាងខ្លាំងពីសំណាក់រដ្ឋាភិបាលទីក្រុងហ្សាការតា។ ទាក់ទងនឹងបញ្ហានេះ ឥណ្ឌូណេស៊ី បានកោះហៅអគ្គរដ្ឋទូតចិនប្រចាំនៅឥណ្ឌូណេស៊ីដើម្បីមកបំភ្លឺ។
ពាក់ព័ន្ធទៅនឹងវត្តមាននាវាយាមល្បាត អ្នកនាំពាក្យក្រសួងការបរទេសចិន លោក Geng Shuang នៅថ្ងៃទី១ ខែមករា បាននិយាយការពារថា ចិនមានដែនយុត្តាធិការលើប្រជុំកោះ Spratly និងតំបន់ដែនទឹកជុំវិញតំបន់នោះ ក្នុងសមុទ្រចិនខាងត្បូង ដែលទូកនេសាទចិន និងឥណ្ឌូណេស៊ី មានវត្តមានជាធម្មតា ក្នុងការនេសាទត្រី។
ជាការឆ្លើយតបទៅនឹងអំណះអំណាងរបស់ភាគីចិន រដ្ឋមន្ត្រីការបរទេសឥណ្ឌូណេស៊ី Retno Marsudi បានទាមទារឲ្យទីក្រុងប៉េកាំង ពន្យល់ឲ្យបានច្បាស់ពីមូលដ្ឋានច្បាប់ និងព្រំដែនលើតំបន់សេដ្ឋកិច្ចផ្តាច់មុខរបស់ខ្លួន ដោយផ្អែកទៅតាមអនុសញ្ញាអង្គការសហប្រជាជាតិស្តីពីច្បាប់សមុទ្រ ឆ្នាំ១៩៨២ (UNCLOS)។
បើតាមការពន្យល់ដោយផ្អែកទៅតាមច្បាប់អន្តរជាតិមួយនេះ អ្នកស្រីរដ្ឋមន្ត្រីការបរទេសឥណ្ឌូណេស៊ី បានបញ្ជាក់ថា ការអះអាងរបស់ទីក្រុងប៉េកាំងជុំវិញបញ្ហាដែនយុត្តាធិការលើ តំបន់សេដ្ឋកិច្ចផ្តាច់មុខ និងវត្តមានទូកនេសាទចិន ក្នុងតំបន់សមុទ្ររបស់ខ្លួន គឺគ្មានមូលដ្ឋានច្បាប់ និងមិនត្រូវបានទទួលស្គាល់ដោយច្បាប់អន្តរជាតិទេ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
កន្លងមក ឥណ្ឌូណេស៊ី មិនធ្លាប់ចាត់ទុកខ្លួនឯងជាភាគីជម្លោះជាមួយចិន ក្នុងតំបន់សមុទ្រចិនខាងត្បូងឡើយ។ ម្យ៉ាងទីក្រុងហ្សាការតា មិនធ្លាប់ទាមទារប្រជុំកោះ Spratly ដែលស្ថិតនៅភាគខាងជើង ប្រជុំកោះ Natuna របស់ខ្លួន។ ជាពិសេសឥណ្ឌូណេស៊ី មិនបានទាមទារដែនយុត្តាធិការរបស់ខ្លួន ជាន់លើការទាមទាររបស់ចិនរបស់ខ្លួន ក្នុងសមុទ្រចិនខាងត្បូងឡើយ។ ប៉ុន្តែប្រទេសចិន និងឥណ្ឌូណេស៊ី ប៉ះទង្គិចគ្នា តែជុំវិញបញ្ហាទូកនេសាទចិន ដែលតែងតែចូលមកក្នុងតំបន់ប្រជុំកោះ Natuna តែប៉ុណ្ណោះ។
សូមបញ្ជាក់ថា បញ្ហាសមុទ្រចិនខាងត្បូង ដែលទីក្រុងប៉េកាំងអះអាងថា ជាដែនទឹករបស់ខ្លួន មានធនធានធម្មជាតិយ៉ាងច្រើនមហាសាលចាប់ពីត្រី ឧស្ម័នធម្មជាតិ និងប្រេងជាដើម។ មិនត្រឹមតែមានធនធានធម្មជាតិទេ ប៉ុន្តែតំបន់មួយនេះ គឺជាផ្លូវសម្រាប់ធ្វើនាវាចរ និងជាតំបន់យុទ្ធសាស្ត្រដ៏សំខាន់សម្រាប់ចិន៕
Tag:
ឥណ្ឌូណេស៊ី
ចិន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
