ជាតិ
សង្គមជាតិ
បិទល្បែងអនឡាញនៅព្រះសីហនុ ធ្វើឲ្យបុគ្គលិកខ្មែរជាង៨ពាន់នាក់ បាត់ការងារ, សភាពាណិជ្ជកម្ម កំពុងរកការងារថ្មីឲ្យ
កិច្ចប្រជុំរបស់សមាគមសភាពាណិជ្ជកម្មកម្ពុជា-ចិនប្រចាំខេត្តព្រះសីហនុ (រូបពី AKP)
×![]()
ដោយ: ផាត ដាណេ
ការបិទល្បែងភ្នាល់គ្រប់ប្រភេទតាមប្រព័ន្ធអ៊ីនធឺណិតនៅខេត្តព្រះសីហនុ បានបណ្តាលឲ្យបុគ្គលិកខ្មែរដល់ទៅជាង៨ពាន់នាក់ បានបាត់បង់ការងារ។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា (AKP)។
សមាគមសភាពាណិជ្ជកម្មកម្ពុជា-ចិនប្រចាំខេត្តព្រះសីហនុ បានរៀបចំកិច្ចប្រជុំមួយ កាលពីថ្ងៃទី៣១ ខែធ្នូ ឆ្នាំ២០១៩ ដើម្បីរកដំណោះស្រាយជួយអ្នកទាំងនោះ ឲ្យមានការងារឡើងវិញ។ កិច្ចប្រជុំនេះ មានការចូលរួមពីថ្នាក់ដឹកនាំរោងចក្រ និងក្រុមហ៊ុនចិនជាង៤០នាក់។
AKP បានស្រង់សម្តីរបស់លោក Jiang Kexing អគ្គលេខាធិការនៃសមាគមសភាពាណិជ្ជកម្មកម្ពុជា-ចិនប្រចាំខេត្តព្រះសីហនុ ថា ក្រុមហ៊ុនមកពីចិន ដែលបានសាងសង់រោងចក្រនិងរកស៊ីនៅកម្ពុជា ត្រូវបំពេញកាតព្វកិច្ចសង្គម ដោយត្រូវសកម្មនិងជួយប្រជាពលរដ្ឋកម្ពុជាក្នុងតំបន់ តាមសមត្ថភាព ពេលខ្លួនទទួលបានផលប្រយោជន៍។ លោកសង្ឃឹមថា សហគ្រាសទាំងអស់ នឹងមានគំនិតត្រឹមត្រូវ ចំពោះការជ្រើសរើសកម្មករ ដែលបាត់បង់ការងារពីកន្លែងកាស៊ីណូ។
លោក បញ្ជាក់ដូច្នេះថា៖«នេះមិនមែនគ្រាន់តែអាចបំពេញតម្រូវការធនធានមនុស្សរបស់ក្រុមហ៊ុនខ្លួនឯងប៉ុណ្ណោះទេ ថែមទាំងចូលរួមចំណែកក្នុងស្ថិរភាពសង្គមនិងសុភមង្គលរបស់ប្រជាជននៅក្រុងព្រះសីហនុ និងបង្កើតគំរូល្អរបស់វិនិយោគិនចិនផងដែរ»។
បើតាម AKP ដដែល លោក Jiang Kexing បានជំរុញឲ្យរោងចក្រចិនទាំងអស់ ទទួលយកបុគ្គលិកថ្មីដែលចង់ធ្វើការនៅរោងចក្រក្នុងតំបន់ ដើម្បីកែលម្អជីវភាពរស់នៅរបស់ប្រជាពលរដ្ឋក្នុងតំបន់។ លោក បន្តថា សហគ្រាសដែលចូលរួមក្នុងកិច្ចប្រជុំនេះ បានស្វាគមន៍និយោជិតកម្ពុជាទាំងអស់ ទៅធ្វើការនៅក្នុងរោងចក្ររបស់ពួកគេ។
លោក គួច ចំរើន អភិបាលខេត្តព្រះសីហនុ អះអាងថា ល្បែងអនឡាញ ក្នុងកាស៊ីណូទាំង៧៣កន្លែង នៅខេត្តព្រះសីហនុ ត្រូវបានបិទទាំងស្រុង ត្រឹមថ្ងៃទី១ ខែមករា ឆ្នាំ២០២០។ លោក ប្រាប់សារព័ត៌មានថ្មីៗ កាលពីថ្ងៃទី១ ខែមករាថា ទោះល្បែងអនឡាញត្រូវបានបិទអស់ហើយក៏ដោយ ក៏សមត្ថកិច្ចនៅតែបន្តចុះពិនិត្យបន្ថែមនៅតាមកាស៊ីណូដែរ។
មុនដំណាច់ឆ្នាំ២០១៩ លោក នេត សាវឿន អគ្គស្នងការនគរបាលជាតិ បានបើកកិច្ចប្រជុំមួយជាមួយ តំណាងក្រសួងសេដ្ឋកិច្ច អភិបាលរងរាជធានីខេត្ត ស្នងការ-ស្នងការរងរាជធានីខេត្ត ប្រធាន-តំណាងក្រុមហ៊ុនកាស៊ីណូទាំងអស់ និងមន្ត្រីពាក់ព័ន្ធផ្សេងទៀត ស្តីពីវិធានការនៃការបិទល្បែងអនឡាញនេះ។ ក្នុងកិច្ចប្រជុំនោះ លោក បានរម្លឹកពីសារាចរណែនាំរបស់រដ្ឋាភិបាល ដែលតម្រូវឲ្យបិទល្បែងអនឡានឲ្យអស់ ចាប់ពីឆ្នាំ២០២០ទៅ៕
Tag:
បិទល្បែងអនឡាញ
© រក្សាសិទ្ធិដោយ thmeythmey.com
