អន្តរជាតិ
អគ្គលេខាធិការអង្គការសហប្រជាជាតិ Antonio Guterres។ រូបភាព៖ AFP
×![]()
ដោយ: ធៀន ភារិន្ទ
អគ្គលេខាធិការអង្គការសហប្រជាជាតិ (UN) លោក អាន់តូនីញ៉ូ ហ្គូតេរ៉េស (Antonio Guterres) បានអះអាងថា ការទប់ស្កាត់ការរីកសាយអាវុធនុយក្លេអ៊ែរ គឺជាសសរស្តម្ភមួយ ដែលត្រូវតែការពារឲ្យបាន។ ការលើកឡើងរបស់ប្រមុខអង្គការសហប្រជាជាតិបែបនេះ គឺសំដៅទៅលើកូរ៉េខាងជើង ដែលព្រមានសាកល្បង អាវុធយុទ្ធសាស្ត្រថ្មីនាពេលខាងមុន។ នេះបើតាមការលើកឡើងរបស់អ្នកនាំពាក្យអង្គការសហប្រជាជាតិ លោក Stephane Dujarric នៅថ្ងៃទី១ ខែមករា។
នាជំនួបគណៈមជ្ឈិមបក្សពលករ មេដឹកនាំកូរ៉េខាងជើងគីម ជុងអ៊ុន បានអះអាងថា គ្មានហេតុផលអ្វី ដែលតម្រូវឲ្យទីក្រុងព្យុងយ៉ាងចងខ្លួនឯងមិនឲ្យសាកល្បងមីស៊ីលបាលីស្ទិក និងអាវុធនុយក្លេអ៊ែរបានទេ ហើយក្នុងពេលឆាប់ៗខាងមុខ កូរ៉េខាងជើងនឹងសាកល្បង «អាវុធយុទ្ធសាស្ត្រថ្មី» ឲ្យពិភពលោកមើល។
ការលើកឡើងរបស់ប្រមុខកូរ៉េខាងជើងបែបនេះ បានធ្វើឲ្យលោក អាន់តូនីញ៉ូ ហ្គូតេរ៉េស ប្រមុខអង្គការសហប្រជាជាតិមានការព្រួយបារម្ភជាខ្លាំង។ តាមការអះអាងរបស់អ្នកនាំពាក្យអង្គការសហប្រជាជាតិ លោក Dujarric នៅក្នុងសេចក្តីថ្លែងការណ៍មួយ លោកអគ្គលេខាធិការ បារម្ភជាខ្លាំងពីបញ្ហាសាកល្បងមីស៊ីលរបស់កូរ៉េខាងជើង។
តាមសេចក្តីថ្លែងការណ៍ដដែលនេះ លោកប្រមុខUN ក៏សង្ឃឹមដែរថា ទីក្រុងព្យុងយ៉ាង នឹងមិនបើកការសាកល្បងមីស៊ីលបាលីស្ទិកឡើងវិញឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ដោយព្រួយបារម្ភពីបញ្ហានេះ លោក ហ្គូតេរ៉េស បានទទូចឲ្យប្រទេសទាំងអស់ ត្រូវតែទប់ស្កាត់ឲ្យបាននូវការរីកសាយភាយអាវុធនុយក្លេអ៊ែរ ព្រោះវាជាសសរស្តម្ភមួយនៃ សន្តិសុខនុយក្លេអ៊ែរសកល។ ដើម្បីទប់ស្កាត់បញ្ហានេះ ការភ្ជាប់ទំនាក់ទំនងការទូត នៅតែជាយុទ្ធសាស្ត្រដ៍សំខាន់ សម្រាប់សន្តិភាពជានិរន្តន៍។
ក្នុងពេលថ្មីៗនេះ ក្នុងជំនួបគណៈមជ្ឈិមបក្សពលករ ប្រធានគណៈកម្មការកិច្ចការរដ្ឋរបស់កូរ៉េខាងជើង គីម បានប្រាប់មន្ត្រីរបស់ខ្លួនឲ្យពង្រឹងគោលការណ៍ពឹងផ្អែកលើខ្លួនឯងឲ្យបានរឹងមាំថែមទៀត ហើយត្រូវពុះពារប្រយុទ្ធនឹងសម្ពាធ និងទណ្ឌកម្មរបស់អាមេរិកដែលអូសបន្លាយរយៈពេលវែង ព្រោះអាមេរិក នឹងមិនទុកឲ្យកូរ៉េខាងជើងនៅស្ងៀមជាមួយសន្តិភាពឡើយ៕
Tag:
UN
កូរ៉េខាងជើង
© រក្សាសិទ្ធិដោយ thmeythmey.com
